Read KIMERU BIBLE PROTESTANT EDITION 1Pet 4 Bible Online

1Pet 4 - KIMERU BIBLE PROTESTANT EDITION bible

1Pet 4

¹Tontû Kristû aathangîkîrue arî mwîrîîne, kinya buî nou bûbuîri gwikabîra bûrî na mathûgaanio ta jarîa aarî najo. Nîkwîthîrwa muntû ûrîa ûthirîtie kûthangîkua mwîrîîne, atîcokaga kwîyia.

²Ûtûûro bwaawe bûrîa bûtigeere arî mwîrîîne, atîcokaga kwathwa nî mairîrîîria ja mwîrî, îndî athagwa nî ûrîa Mûrungu endaga.

³Rekeni îgiita rîrîa rîkûrûkîte rîee nîrîo rîaarî rîa kûthithia mantû jarîa antû barîa batîtîkîtie Mûrungu beendaga kûthithia. Bwatûûraga bûkîthithagia mantû ja nthao na ja mairîrîîria jamaaî na ja wogiti na ja gwîtaga na kwinaga biathoone birîa bitîagîrîte na ja kûrombaga mîrungu ya mîng'uanano.

⁴Nandî bau batîtîkîtie Mûrungu ka barigaraga boona bûtîkûgwatanîra nabo mantûûne jau ja kwaga nthoni, na tontû bûû nî babûrumangaga.

⁵Îndî bo bagataarîîria mantû jau kîrî Mûrungu ûrîa ûkagambithia barîa barî mwoyo o na barîa bakuîte.

⁶Tontû kîu nîkîo gîatûmîre Nteto Injega itûmîîrua kinya kîrî barîa bakuîte, nîkenda o na këethîra bo bakagambithua mwîrîîne ta antû bangî, bo beeje batûûre na njîra ya roho o ta Mûrungu.

⁷Mûthia jwa mantû jonthe jûrî akuî gûkinya. Tontû bûû, rîkîîrieni na bûmaarîrie mathûgaanioone jeenu nîkenda bûkoomba kûromba.

⁸ Nkûrûki ya jau jonthe endanageni, nîkwîthîrwa wendo nî bûkunîkagîra meeyia jamaingî.

⁹Gwatanageni ûgeni bûtî kûnung'una.

¹⁰O ûmwe weenu abuîri gûtumagîra kîewa kîrîa Mûrungu amweete nîkenda aguna antû bangî arî mûrûngamîîri ûmwega wa biewa mwanya mwanya bia Mûrungu.

¹¹Muntû ûrîa ûkwaaria, nî aaragie ta muntû ûkwaria mawitho ja Mûrungu. Ningî ûrîa ûgûtumîkîra bangî, nî athithagie ûu kûringana na inya îrîa Mûrungu amweete. Nîkenda mantûûne jonthe Mûrungu agakumithagua ndeene ya Jesû Kristû ûrîa ûkumio na inya birî biaawe kenya na kenya Amen.

¹²Buî barîa mpendeete, bûkarigarueni nî magerio jarî na ûrûrû jarîa jabwîjagîîra nîkenda jathima wîtîkio bweenu. Bûkóna ta ûntû ûgeni bûkûbwîjîîra.

¹³Îndî gwîragueni tontû nî Kristû bûkûgwatanîra nawe mîthangîko yaawe, nîkenda bûkeethîrwa bûrî na kûgwîrua rîrîa ûkumio bwaawe bûkoonanua.

¹⁴Kîtharimo nî kîrî buî, këethîra bûkarumwa nîûntû bwa riîtwa rîa Kristû, tontû Roho wa ûkumio na wa Mûrungu arî kîrî buî.

¹⁵Gûkagîteni muntû kinya ûmwe kîrî buî wîja kûnyamaarua nîûntû nî mûûragani kana mwamba, kana muuni waatho kana mwitonyithia mantûûne ja antû bangî.

¹⁶Îndî muntû ûrëeja kûthangîkua nîûntû nî mûkristû, akaigua nthao. Nî akumithie Mûrungu o riîtweene rîu rîa Kristû.

¹⁷Tontû nandî îgiita nî rîkinyi rîa kûgambithia barîa barî ba Mûrungu. Gûkëeja kwîthîrwa îgamba rîkambîrîria na baatuî rî, nîatîa gûgakara kîrî barîa batîathîkagîra Nteto Injega cia Mûrungu?

¹⁸ Maandîko jariuga, “Gûkëeja kwîthîrwa kûrî na inya muntû ûrîa mwagîru kûonoka rî, barîa batîkîraga Mûrungu na eeyia nîkû bakeethîrwa barî?”

¹⁹Tontû bûû, barîa bathangîkagua kûringana na kwenda kwa Mûrungu nî bathithagia ûrîa kwagîrîte na nî bainenkanîîre kîrî Mûûmbi waao ûrîa mwîtîkîkua.