Read KIMERU BIBLE PROTESTANT EDITION 1Pet 5 Bible Online

1Pet 5 - KIMERU BIBLE PROTESTANT EDITION bible

1Pet 5

¹Ni ûrîa ndî mûkûrû wa kanisa na mûkûûjî wa kûthangîkua gwa Kristû na ningî ûmwe wa barîa bakagaîrwa ûkumio bwaawe rîrîa akoonanua, ndîbwerenca buî akûrû ba kanisa,

² bûmenyagîîre ûrîîthi bwa Mûrungu bûrîa bwanenkeerwe. Bûrite ngûgî îîu na kwenda kweenu îndî tî bûgîkinyagîîrua. Ritageni ngûgî îîu nîûntû nî bûkwenda gûtumîka îndî tîûntû bwa kwenda mbeecha.

³Bûkainyîîrieni barîa bweei bûmenyagîîra, îndî bwee ngerekano înjega kîrî ûrîîthi bûu,

⁴na rîrîa Mûrîîthi ûrîa Mûnene akeeja, buî bûkaewa thirû ya ûkumio îrîa îtûûraga îkîthaaraga îtîgûtuka kinya rî.

⁵ O ûu, buî barîa bûrî babeethî, athîkagîreeni antû barîa akûrû. Karageni na kwinyiiyia bwinthe. O muntû nî ainyiiagie kîrî ûngî tontû Maandîko jaugîîte, “Mûrungu nî areganaga na antû barîa aikumia, 2 îndî barîa bainyiiagia nî abaeejaga ûtugi bwaawe.”

⁶ Tontû bûû, inyiiagieni kîrî Mûrungu ûrîa ûbûkaragia nîkenda akabûûkîîria îgiita rîrîa rîagîrîte rîakinya.

⁷Nenkagîreni Mûrungu mîrigo yeenu yonthe îrîa îbûthangîkagia, nîûntû nî abûmenyagîîra.

⁸Imenyereeni na bûkare bûciûki. Mûnthû weenu Nkoma, akaraga abûthiûrûkîte akîruumaga ta ngatûnyi na agîcwaga muntû ûrîa akeenyangia.

⁹Rûûjageni nawe, bûciaandîte bwega wîtîkioone bweenu bûkîmenyaga atî ataana na aarî ba baaba bangî nthîgûrûûne yonthe nou kinya bo bakûthangîka na mîthangîko ta yeenu.

¹⁰Bwathiria kûthangîkanga kagiita gagakai, Mûrungu wa ûtugi bunthe, ûrîa ûbwîtîte nîkenda bûkagîta ûkumio bwaawe bwa kenya na kenya ndeene ya Kristû Jesû, akabwagîrithia na abûrikithie na ningî abwee inya.

¹¹Inya yonthe nî yaawe kenya na kenya. Amen.

¹² Ndabwandîkîra barûga îîjî ngîteethagîîrua nî Silivano, mûtaana wa baaba mwîtîkîkua. Ndabwandîkîra barûga îîjî înkuîî nkîbwonagîîria na kûbûmenyithia atî bûu nîbu ûtugi bwa Mûrungu bwa mma. Ciaandeni ndeene yaabu.

¹³ Antû ba kanisa îrîa îrî Babiloni, barîa kinya bo bathuurîtwe nî Mûrungu bakûbûkeethia. Kinya Maariko, mûtaana waakwa, akûbûkeethia.

¹⁴Kethanieni na nkeethi cia gûcûncana cia wendo. Thîîrî îrokaraga naabuî bwinthe barîa bûtûûraga ndeene ya Kristû.