Read KIMERU BIBLE PROTESTANT EDITION 2Pet 1 Bible Online

2Pet 1 - KIMERU BIBLE PROTESTANT EDITION bible

2Pet 1

¹Nî ni Simioni Peterû, nthûûmba na mûtûmwa wa Jesû Kristû, Nkûbwaandîkîra buî barîa bweei wîtîkio bwa bata o ta bweetû nîûntû bwa waagîru bwa Mûrungu, na Mwonokia weetû Jesû Kristû.

²Bûroingîîrwa nî ûtugi na thîîrî mantûûne ja kûmenya Mûrungu na Jesû Mwathani weetû.

³Inya yaawe nî îtweete mantû jonthe jarîa jakwendeka nîkenda tûtûûra mûtûûrîre jwa kûthingata Mûrungu na njîra ya kûmûmenya, we ûrîa waatwîtîre ngwatanîroone ya ûkumio na wega bwaawe.

⁴Nî na njîra îîu atweete mawîrane ja gîtûmi na ja bata mono nîkenda bûûmba kwebera buru mairîrîîria jamathûûku ja nthîgûrû, na bûmbe kûng'uanana na Mûrungu mîkariîne yeenu.

⁵Tontû bûû, gerieni mono kwongeera kîrî wîtîkio bweenu wega na kîrî wega bwongeere ûmenyo;

⁶kîrî ûmenyo bwongeere kwigwata; kîrî kwigwata bwongeere kûmîîria na kîrî kûmîîria bwongeere kwenda Mûrungu;

⁷kîrî kwenda Mûrungu bwongeere kwendaga ataana na aarî ba baaba na kîrî kwendaga ataana na aarî ba baaba bwongeere wendo.

⁸Bwëethîrwa bûrî na mantû jaja na wingî ndeene yeenu, jakabûteethia bwee antû barî na wîru na barî na maciara ndeene ya kûmenya Mwathani weetû Jesû Kristû.

⁹Muntû ûrîa ûtî na mantû jau jonthe nî mûtumuumu na atîonaga kûraaja. We nî orîrîtue atî nî aathererue kuuma kîrî meeyia jaawe ja karaaja.

¹⁰Tontû bûû, ataana na aarî ba baaba, karageni na wîru nkûrûki nîkenda bûrikithia gwîtwa na kûthuurwa kweenu. Tontû bwathithia ûu gûtî rîo bûkarouma wîtîkioone.

¹¹Rîu bûgeetîkîîrua bûkûrûke Ûneneene bwa kenya na kenya bwa Mwathani na Mwonokia weetû Jesû Kristû.

¹²Tontû bûû, ngeetaga na mbere kûbûririkanagia mantû jaja magiita jonthe kinya këethîra nî bûjaijî na nî bûriki ûûmeene bûrîa bwaritanîrwe.

¹³Naani ndîthûgaania atî rîrîa ndî mwoyo nî kwagîrîte mbûririkanagie mantû jaja îgiita rîonthe nîkenda mbwîkagîre inya.

¹⁴Tontû nî mbijî atî ngakua rua; ûntû bûû nî Mwathani Jesû Kristû ûmenyithîtie.

¹⁵Rîu nkageria kûthithia ûntû bûû na njîra îrîa kinya nyuma ya gûkua gwaakwa, bûkomba kûririkanaga mantû jau îgiita rîonthe.

¹⁶Rîrîa twaabûtûmagîîria mantû jegiî kwîja kwa Jesû Kristû Mwathani weetû na mantû ja inya yaawe înene, tûtatûmîîre ngono cia waayia îndî tuî nî twonere ûkumio bwaawe na meetho jeetû.

¹⁷ Nî twaarî o rîrîa aeerwe gîtîîo na ûkumio nî Mûrungu Baaba, îgiita rîrîa kajû kaigîgîrue gakîaria kuuma Mwagoone jûrîa mûnene buru gakiugaga, “Ûûjû nîwe Mûtaana waakwa ûrîa mpendeete mono, na nî ngwîragua nîwe.”

¹⁸Tuî nî twaigîrue kajû kau gakîaria kuuma îgûrû rîrîa twaarî amwe nawe kîrîmeene îgûrû kîrîa kîtheru.

¹⁹Tontû bûû, tûrî na gîtûmi gîa gwîtîkia ûkûûjî bûrîa iroria biaarîrie. Buî bûkathithia bwega mono këethîra bûkathingata ûkûûjî bûu bûkari ta taawa îkûthaara muunduune mwanka rîrîa gûgakea na njota ya rûkîîrî îthaare nkoroone cieenu.

²⁰Ririkaneni atî, gûtî muntû kinya ûrîkû ûûmba gûciûra ûroria bûrîa bûrî Maandîkoone na bwaawe wengwa.

²¹Tontû gûtî ûroria bwejîîra antû bumanîtie na kwenda kwa muntû îndî baaragia nteto cia Mûrungu batongeeretue nî Roho Ûmûtheru.