Read KIMERU BIBLE PROTESTANT EDITION 2Pet 2 Bible Online

2Pet 2 - KIMERU BIBLE PROTESTANT EDITION bible

2Pet 2

¹Kûrî îgiita iroria bia ûrongo biaumîrîîre kîrî antû ba Mûrungu o ta ûrîa aritani ba ûrongo bakaumîîra kîrî buî. Bo bakabûritana na witho mooritani ja ûrongo ja kwînyangia na kinya bakaane Mwathani ûrîa wabakûrîre. Tontû bûû bakairetera kwînyanga gwa mpwîî.

²Antû babaingî bakathingata mîîtîre yaao îmîthûûkû ya ûmaramari na nîûntû bwaao wîtîkio bwa gîkristû bûgacambua.

³Ningî nîûntû bwa îtenûka rîa mbeecha, aritani bau ba ûrongo bakabwayia na nteto cia ûrongo bagîcwaa kwiguna bo bongwa. Îndî Mûbagambithia nî aithuranîrîte na ûrîa ûkabeenyangia atîthaa.

⁴Mûrungu ataacaîîrîre araîka barîa beeîrie, îndî nî aabagerere mwankiine jwa kenya na kenya kûrîa beeki batheeki na mînyororo betereete Ntukû ya îgamba.

⁵ Mûrungu ataacaîîrîre nthîgûrû îrîa ya karaaja, îrîa yoojûrîtwe nî antû babathûûku. Nî aaretere ngai ya maburiko îrabakunîkîra. Barîa oonokerie nî Noa, ûrîa waritanaga mantû ja waagîru, amwe na antû bangî mûgwanja.

⁶ Mûrungu nî aakanûkîrie na areenyangia buru ntûûra cia Sodomu na Gomora, aracithiria na mwanki. Ûntû bûû bûraa ngerekano kîrî antû barîa batîenda kwathîkîra Mûrungu nyumeene.

⁷ Ningî Mûrungu nî oonokerie Loti, ûrîa waarî ûmwagîru na ûrîa waakaraga na kîeba nîûntû bwa kwona mîîtîre îmîthûûku ya ûmaramari, kuuma ntûûra iu.

⁸Loti aatûûranagia nabo aithikîrîte mono nîûntû bwa kwoona na kwigua mantû jamathûûku jarîa baathithagia ntukû cionthe.

⁹Tontû bûû, Mwathani nî aijî kwonokia antû barîa beendeete Mûrungu kuuma magerioone na nî aijî gûtûma antû barîa baaî batûûra bakanûkîtue beeteerete Ntukû ya îgamba,

¹⁰mono mono barîa bathagwa nî mairîrîîria jamathûûku ja mwîrî na bamenete Waatho. Aritani bau ba ûrongo nî boomîrîtie mono na nî ntûrîka na batîtîîaga biûmbe bia îgûrû birîa birî ûkumio.

¹¹Îndî kinya këethîra araîka barî inya na ûûmbani bûbûnene mono nkûrûki ya aritani bau ba ûrongo, batîbathitangaga kana babathûûkia mbere ya Mwathani.

¹²Îndî mathithio ja antû baba nî ta ja nyomoo irîa iciari irî cia kûgwatwa na kûûragwa. Bo barûjaga na bakaruma ûntû o bunthe bûrîa batîgûciûkîrwa nîbu. Nabo bakeenyangua o ta nyomoo iu.

¹³Bo bakarîwa na mîthangîko îrîa bathangîkagia nayo antû bangî. Bagwîragua rîrîa bakûthithia mantû jamaaî ja kûgwîria mîîrî yaao mûthenya barigici. Biathoone bieenu nî nthao na gîconoko baretaga rîrîa bareeja ku.

¹⁴Bakaraga baogereete aka barîa amaramari akî nayo guuru ya mairîrîîria jaao ja kwenda mantû ja meeyia îtîthiraga. Baatithagia antû barîa batî na inya na bamenyeretie mantû ja îtenûka akî. Antû bau nî barumi nî Mûrungu!

¹⁵ Bo nî bareganîte na baatia njîra îrîa îrî ya mma. Bathingatîte njîra îrîa Balaamu mûtaana wa Beori aathingatîre ya kwenda gûcionera mbeecha kuumania na mantû jarîa aathithagia jamathûûku.

¹⁶Nawe nî akanûkîrue nîûntû bwa meeyia jaawe. Ntigiri yaawe nî yaarîrie na kajû ta ka muntû na îrakaania kîroria kîu kûthithia mantû ja nthû.

¹⁷Antû bau bakari ta ithima bitî rûûjî, kana ta matu jeetithîtue nî kîbubani. Gîtûûro kîaao kîrîa Mûrungu abathuranîrîte nî gûntû kwa muundu mûtheri.

¹⁸Baaragia nteto cia wiikumia na cia waa, na bagakathîîria mantû ja mairîrîîria ja ûmaramari bakîenda kwangaratania barîa baciathûrîte rua na antû barîa batûûraga meeyiene.

¹⁹Iroria biu bia ûrongo biîraga antû bau atî bikabarita ûkomboone o rîrîa bio biongwa birî nkombo cia mîîtîre yaao îrîa îbiînyangagia. Tontû o ûntû kinya bûrîkû bûrîa bûraatha muntû, muntû ûu aejaga nkombo ya ûntû bûu.

²⁰Tontû rîrîa antû bathirîtie kwonokua bauma mantûûne jamathûûku ja nthî nîûntû bwa kûmenya Mwathani na Mwonokia weetû Jesû Kristû, îndî bagacoka kaîrî gwitonyithia na kwathagwa nî moothûûku o jarîa baathirîrie kûthaûrwa kuuma kîrî jo, mûthia jwa antû ta bau jweejaga jûmûthûûku nkûrûki ya mbere.

²¹Nî kaaba barîngîtûûra batiijî njîra ya waagîru nkûrûki ya rîrîa baathiria kûmîmenya, bacoka gûtigana na rîathana rîrîa baarî bakwewa.

²² Ûrîa antû bau bathithagia nî ta ûrîa ngerekano îîjî ikuuga, “Kurû îcokagîra mataîka jaayo,” na “Ngûrwe yathiria kûthambua, îcokaga kwigaragaria ntakeene kaîrî.”