Read KIMERU BIBLE PROTESTANT EDITION 2Pet 3 Bible Online

2Pet 3 - KIMERU BIBLE PROTESTANT EDITION bible

2Pet 3

¹Îîjî nîyo barûga yaakwa ya ijîîrî kûbwandîkîra buî acoore baakwa babeende. Barûgeene iu cio-ijîîrî, ûrîa nthîthîtie nî kûgeria kûruumûkia mathûgaanio jamatheru ndeene yeenu nkîbûrikanagia mantû jaja.

²Ndîenda bûririkane nteto irîa ciarîrue karaaja mma nî iroria bibitheru, na bûririkane rîathana rîa Mwathani na Mwonokia rîrîa bwaatigîîrwe nî atûmwa beenu.

³ Mbere mma, no mwanka bûmenye atî ntukûûne cia mûthia, antû barîa baathagwa nî mairîrîîria jamaaî ja mîîrî yaao bakeeja. Bo bakabûcikûûra

⁴bakîbûûragia, “Jesû ûrîa waabwîkîîre wîrane atî agacoka rî, arîkû we? Biûjûjû bieetû nî biakuîre, îndî mantû jonthe jakari o ta ûrîa jaarî kuuma kîambîrîria o rîrîa nthîgûrû yoombîrwe!”

⁵ Bo bacieethagia batîkûmenya atî o mbere mma Mûrungu oombîre îgûrû na nthî kuumania na rûteto rwaawe akî. Nthî înjûmo yoombîrwe kuumania na rûûjî na kuuma kîrî rûûjî,

⁶ rûûjî o rûu rungwa, taru rûûjî rwa maburiko, nîru rwathirîrie nthîgûrû îrîa nkûrû.

⁷Rûteto o rûu noru Mûrungu atwîîrie naru îgûrû na nthîgûrû, birîa birîo nandî bietereete kwîja kûthirua na mwanki. Biîki o mwanka ntukû îrîa antû bonthe barîa bathûûku bakagambithûa na beenyangue.

⁸ Îndî bûkórîrua nî ûntû bûmwe acoore baakwa babeende! Kîrî Mwathani ntukû îmwe nî ta mîaka ngiri îmwe na mîaka ngiri îmwe nî ta ntukû îmwe.

⁹Bûkáthûgaania atî Mwathani nî athaaga atîroojûria ûntû bûrîa eranîîrîte ta ûrîa antû bamwe bathûgaanagia. Îndî we ka arî mûûmîîria nîûntû atîendaga kwona muntû kinya ûrîkû akîûra, îndî eendeete antû bonthe bairire.

¹⁰ Îndî ntukû ya Mwathani îkeeja o ta mwamba. Ntukû îîu, îgûrû rîkathira rîrî na mûruumo jûmûnene na mainya jonthe ja îgûrû jakathirua na mwanki. Nthîgûrû amwe na into bionthe birîa birî ku bikathirua.

¹¹Rîu, këethîra into biu bionthe bikathirua na njîra îîu rî, buî bûbuîrîte kwîthîrwa bûrî antû ba mûthemba jûrîkû? Mîîtîre yeenu îbuîri kwîthîrwa îrî îmîtheru na bûcieejanîte kîrî Mûrungu,

¹²bwetereete Ntukû ya Mûrungu îkinya na bûciûmîtie gûcwaa ûrîa îîjanga ntûti. Ntukû îîu nîrîo Îgûrû rîkaîîthua na mainya ja îgûrû jathirue na mwanki.

¹³ Îndî tuî tûtûûraga twetereete Mûrungu oojûria wîrane bûrîa atweere; nabu nî Îgûrû rîrîeru na nthîgûrû înjerû kûrîa gûtûûraga waagîru.

¹⁴Tontû bûû, acoore baakwa, nîûntû nî bweteerete Ntukû îîu îkinya, ciûmieni mono nîkenda bûkeethîrwa bûtî na ûthûûku na bûrî babatheru na ningî bwagîrîte na bûrî na thîîrî.

¹⁵Tarageeni kûûmîîria kwa Mwathani weetû ta kaanya karîa bweei nîkenda bwonokua o ta ûrîa mûtaana wa baaba Paûlû abwaandîkîîre kuumania na ûûme bûrîa Mûrungu amweete.

¹⁶Ûntû bûu bungwa nîbu arîrîtie barûgeene ciaawe cionthe irîa aandîkîte. Kûrî mantû jamwe Paûlû aandîkîte barûgeene iu jarîa jarî na inya gûciûrwa nî barîa batîritani na batîriki mîtîreene yaao. Bagarûraga jarîa jaandîki bakajeerekania na njîra ciaao cia waayia o ta ûrîa bathithagia na ichunchî bingî bia Maandîko. Tontû bûû, bakathithia mantû ja gûciînyangia.

¹⁷Îndî buî acoore baakwa tontû bwa ûrîa bûthirîtie kûmenya ûntû bûu, imenyagîîreni mono bûtîkeeje gwaatithua njîra nî ndemi na bûremwa nî gûciaanda bwega.

¹⁸Îndî îteni na mbere bûgîkûraga ndeene ya ûtugi na ûmenyo bwa Mwathani na Mwonokia weetû Jesû Kristû. Ûkumio nî kîrî we nandî na kenya na kenya! Amen.