Read KIMERU BIBLE PROTESTANT EDITION 1Joh 1 Bible Online

1Joh 1 - KIMERU BIBLE PROTESTANT EDITION bible

1Joh 1

¹ Tuî tûrîbwaandîkîra mantû jeegiî Rûteto rwa ûtûûro, ûrîa waarî o kuuma o kîambîrîriene. Tuî nî tûthirîtie kûmwigua na twamwona na meetho jeetû. Nî mma nî tûmwoneete na twamûringithika na njara cieetû.

² Rîrîa we ûrîa waarî ûtûûro oonanîrue, nî twamwonere na nîwe tûgûkûûjîîra mantû jaawe. Nî tûkûbwîra mantû ja ûtûûro bwa kenya na kenya ûrîa watwîîre na Baaba na araamenyithanua kîrî tuî.

³Mantû jarîa twoneete na twajaigua nîjo tûkûbwîra nîkenda kinya buî bûgwatanîra naatuî ndeene ya ngwatanîro îrîa tûrî nayo na Baaba na Mûtaana waawe Jesû Kristû.

⁴Tûrîaandîka mantû jaja nîkenda kûgwîrua gweetû kûûjûra.

⁵Ntûmîîri îrîa twigîtue kuuma kîrî mûtaana waawe îrîa tûgûtûmîîria nî îîjî: Mûrungu nî weerû na gûtî muundu kinya jûrîkû ndeene yaawe.

⁶Tontû bûû, tûkëeja kuuga atî tûrî ngwatanîro nawe îndî tûkëethîrwa tûtwîre muunduune, twîthîrwa tûkîaragia ûrongo ndwariene cieetû o na mathithioone jeetû.

⁷Îndî tûkëethîrwa twîtaga tûrî weerûûne o ta ûrîa we akaraga weerûûne, rîu twîthîrwa tûrî na ngwatanîro gatîgatîîne geetû. Nayo tharike ya Jesû Kristû Mûtaana waawe, nî îtûthambagia meeyia jeetû jonthe.

⁸Tûkëeja kuuga atî tûtî na meeyia, nîka twîthîrwa tûgîciaagia na ûûma bûtîîthîrwa bûrî ndeene yeetû.

⁹Îndî tûkëeja kuumbûra meeyia jeetû, Mûrungu nî mwîtîkîkua na nî aathithagia ûrîa kwagîrîte, we agatûrekera meeyia jeetû na atûtherie ûthûûku bweetû bunthe.

¹⁰Twauga atî tuî tûtîîtie, ka tweethagia Mûrungu mûrongo, na rûteto rwaawe rûtî ndeene yeetû.