Read KIMERU BIBLE PROTESTANT EDITION 1Joh 2 Bible Online

1Joh 2 - KIMERU BIBLE PROTESTANT EDITION bible

1Joh 2

¹Aana baakwa, ndîbwaandîkîra mantû jaja nîkenda bûtîkeeje kwîyia: îndî muntû akeeyia, tuî tûrî na ûrîa ûtwaraîria kîrî Baaba, nawe nî Jesû Kristû ûrîa mwagîru.

²Kristû wengwa nîwe ûtûmaga meeyia jeetû jarekerwa na tî meeyia jeetû akî îndî nî kinya meeyia ja antû bonthe.

³Tûmenyaga nî tûmwijî rîrîa tûkwathîkîra maathana ja Mûrungu.

⁴Muntû kinya ûrîkû ûrëeja kuuga atî nî amwijî îndî akëethîrwa atîathîkagîra maathana jaawe, ûu nî mûrongo na gûtî ûûma bûrî ndeene yaawe.

⁵Muntû wonthe ûrîa wathîkagîra Rûteto rwa Mûrungu nîwe wendeete Mûrungu mma. Ûu nîu tûmenyaga këethîra nî tûtûûraga tûrî na ngwatanîro na Mûrungu:

⁶ûrîa uugaga atî nî atûûraga arî ngwatanîro na Mûrungu abuîri gwîtaga na mîîtîre o ta îrîa Jesû Kristû eetaga nayo.

⁷ Acoore baakwa babeende, rîathana rîrî nkûbwaandîkîra tî rîrîerû; nî rîathana o rîrîa rîrîkûrû rîrîa bwaarî narîo kuuma kîambîrîria. Rîathana rîu rîrîkûrû nîrîo rûteto rûrîa bwathirîrie kwigua o kuuma kîambîrîriene.

⁸Amwe na jau nî rîathana rîrîerû nkûbwaandîkîra nîkwîthîrwa mma yaarîo îrîoneka ndeene ya Kristû na ndeene yeenu. Tontû muundu ka jûkûthira nabu weerû bwa mma nî bwambîîrîtie kûthaara nandî.

⁹Ûrîa uugaga atî nî atûûraga weerûûne, îndî nî athwîre mûkristû ûngî ûu nî muunduune atwîre mwanka naarua tûrî.

¹⁰Ûrîa wendeete mûkristû ûngî atûûraga weerûûne, na gûtî gîntû kîrî ndeene yaawe gîtûmîkia muntû ûngî agitara.

¹¹Îndî ûrîa ûthwîre mûkristû ûngî, nî muunduune atûûraga; eetagîîra muunduune nawe atiijî kûrîa eetîte, nîûntû muundu nî jûmûeethetie mûtumuumu.

¹²Ndîbwaandîkîra buî aana tontû meeyia jeenu nî jarekeri nîûntû bwa Kristû.

¹³Ndîbwaandîkîra buî aciari nîûntû nî bûmwijî ûrîa ûtwîre o kuuma kîambîrîria. Ningî ndîbwaandîkîra buî antû babeethî nîûntû nî bûcindîte ûrîa Mûûî.

¹⁴Ndîbwaandîkîra buî aana, nîûntû nî bwijî Baaba. Ndîbwaandîkîra buî aciari, nîûntû nî bwijî ûrîa ûtwîre o kuuma kîambîrîria. Ndîbwaandîkîra buî antû babeethi nîûntû bûrî na inya, na rûteto rwa Mûrungu rûrî ndeene yeenu naabuî nî bûcindîte ûrîa Mûûî.

¹⁵Bûkéenda nthîgûrû kana bweenda gîntû kinya kîrîkû kîrîa kîrî kîa nthîgûrû. Bûkëeja kwîthîrwa bwendeete nthîgûrû, bûtîthîrwa bwendeete Baaba.

¹⁶Tontû mantû jonthe jarîa jarî ja nthîgûrû, ta mairîrîîria ja mwîrî, mantû jarîa antû boonaga bakajairîrîîria na jarîa antû baikumagîria, jau jonthe gûtî kinya kîmwe kiaajo kîîthagîrwa kiumîte kîrî Baaba, îndî jethagîrwa jarî ja nthîgûrû îîjî.

¹⁷Nthîgûrû amwe na mantû jonthe jarîa antû bairîragîîria jakathira îndî ûrîa ûthingataga ûrîa Mûrungu eendaga agatûûra kenya na kenya.

¹⁸Aana baakwa, mûthiro jûrî akuî! Nî bwîîri atî mûnthû wa Kristû akeeja na nandî anthû ba Kristû nî bathirîtie kwîja na kîu nîkîo gîgûtûma tûmenya atî mûthiro jûrî akuî.

¹⁹Kuuga na mma antû bau bataarî ba ngwatanîro yeetû na kîu nîkîo gîatûmîre batûtiga. Këethîra baarî ba ngwatanîro yeetû barîngîkara amwe naatuî. Îndî nî baatûtigîre nîkenda kûmenyekana carûrûkû atî gûtî waao waarî wa ngwatanîro yeetû.

²⁰Îndî buî nî bwatûmîîrwe Roho Ûmûtheru nî Kristû naabuî bwinthe nî bwijî ûûma.

²¹Tontû bûû, ntîbwaandîkîra nîûntû bûtiijî ûûma nîmbi; îndî ndîbwaandîkîra nîûntû nî bwijî ûûma nîmbi na nî bwijî atî gûtî ûrongo kinya bûrîkû bûumanagîa na ûûma.

²²Mûrongo nûû? Mûrongo nî muntû wonthe ûrîa ûtîtîkagia atî Jesû nî Mesia. Muntû ta ûu nîwe mûnthû wa Kristû; we nî aregeete Baaba na Mûtaana.

²³Ûrîa ûkaanaga Mûtaana nî akanaga kinya Îthe; na ûrîa umbûraga Mûtaana, Îthe nî atûûraga ndeene yaawe.

²⁴Gwateni mantû jarîa bwaigîrue kuuma o kîambîrîria na bûjekage ndeene yeenu. Këethîra bûkajeka bûkeethîrwa bûrî na ngwatanîro na Mûtaana na Îthe.

²⁵Nawe Kristû nî atwîkîrîte wîrane ûntûûne bûbû bungwa atî agatwaa ûtûûro bwa kenya na kenya.

²⁶Ndîbwaandîkîra mantû jaja nîûntû bwa antû barîa bakûgeria kûbwaîria.

²⁷Îndî Kristû nî abûtûmîrîte Roho Ûmûtheru akarage ndeene yeenu. Tontû bûû, bûtî na bata ya antû kwîja kûbûritanaga nîûntû Roho wawe nîwe ûkabûritanaga mantû jonthe, na nteto irîa aritanaga nî cia mma, na tî cia ûrongo. Tontû bûû, thingateni ûritani bûu bwa Roho na rîu bûkeethîrwa bûrî na ngwatanîro na Kristû.

²⁸Tontû bûû aana baakwa ndîbwîra bûkarage bûrî na ngwatanîro nawe, nîkenda rîrîa akeeja tûkeethîrwa tûjûrîtwe nî ûchamba, tûtîkeeje kwîthîrwa tûrî na gîtûmi gîa gwiciitha tûjûrîtwe nî nthao.

²⁹Buî nî bwijî atî Kristû nî ûmwagîru. Tontû bûû, nî bûbuîri kûmenya atî o muntû ûrîa ûthithagia mantû jarîa jagîrîte ûu nî mwana wa Mûrungu.