Read KIMERU BIBLE PROTESTANT EDITION 1Joh 3 Bible Online

1Joh 3 - KIMERU BIBLE PROTESTANT EDITION bible

1Joh 3

¹ Raithîrieni bwoone ûrîa Baaba atwendeete na wendo bûng'ana! Wendo bwaawe nî bûbwingî mono mwanka tuî tûgeetwa aana ba Mûrungu, na nî mma tuî tûrî bo. Gîtûmi kîa nthîgûrû îrega gûtûmenya nî kwîthîrwa îtiijî Mûrungu.

²Eendwa baakwa, baatuî nandî tûrî aana ba Mûrungu, îndî gûtijîkeene bwega ûrîa tûkeethîrwa tûkari. Îndî nî twijî atî rîrîa Kristû akeeja tûkang'uanana nawe tontû tûkamwona ûrîa we wengwa akari.

³O muntû wonthe ûrîa ûrî na wîrîgîîro bûbû ndeene ya Kristû nî akaraga akitheragia o ta ûrîa Kristû wengwa arî ûmûtheru.

⁴Muntû ûrîa ûthithagia meeyia nî aunaga Waatho bwa Mûrungu tontû meeyia nî kuuna Waatho bwa Mûrungu.

⁵ Buî nî bûkûmenya atî Kristû eejîre nîkenda eeberia meeyia jeetû nîkwîthîrwa ndeene yaawe gûtî meeyia.

⁶Tontû bûû, ûrîa ûrî na ngwatanîro na Kristû atîîtaga na mbere kwîyia îndî ûrîa wîîtaga na mbere kwîyia gûtî rîo oona Kristû kana amûmenya.

⁷Itû aana baakwa, bûkéendeni muntû kinya ûrîkû abwaîria. Muntû ûrîa ûthithagia mantû ûrîa kwagîrîte, muntû ûu nî ûmwagîru o ta ûrîa Kristû arî ûmwagîru.

⁸Muntû ûrîa ûthithagia meeyia nî wa Nkoma, tontû Nkoma atwîre kwîyia kuuma kîambîrîria. Mûtaana wa Mûrungu eejîre nîkenda akathiria ngûgî cia Nkoma.

⁹Ûrîa ûrî mwana wa Mûrungu atîtaga na mbere kwîyia, tontû mûkariî jwa Mûrungu jûrî ndeene yaawe, atîtaga na mbere kwîyia tontû Mûrungu nîwe Îthe.

¹⁰Ûjû nîu tûmenyaga aana ba Mûrungu na ba Nkoma: muntû ûrîa ûtîthithagia ûrîa kwagîrîte kana ûrîa ûtîendeete muntû ûngî ûû tî mwana wa Mûrungu.

¹¹ Ntûmîîri îrîa bwaigîrue kuuma kîambîrîria nîyo îîjî: no mwanka twendanage.

¹² Tûgákara ta Kaini we aarî wa ûrîa Mûûî na arooraga mûtaana wa ng'ina. Nîmbi yatûmîre Kaini ooraga mûtaana wa ng'ina? Aamûragîre nîûntû mantû jarîa aathithagia jaarî jamathûûku, îndî jarîa mûtaana wa ng'ina Abeli aathithagia jaarî jameega.

¹³Tontû bûû, ataana na aarî ba baaba bûkarigareni rîrîa antû ba nthîgûrû bakûbûthûûra.

¹⁴ Tuî nî twijî atî nî tuumîte gîkuûne na twakinya ûtûûroone tontû nî twendeete ataana na aarî ba baaba. Ûrîa ûtîendanaga atûûraga gîkuûne.

¹⁵Ûrîa ûthwîre mûkristû ûngî nî mûûragani na nî bwijî atî mûûragani atî na ûtûûro bwa kenya na kenya ndeene yaawe.

¹⁶Naatuî nî twijî ûrîa wendo bûkari nîûntû Kristû nî acieejanîre na arakua nîûntû bweetû. 0 ûu nou kinya tuî tûbuîri gûcieejanaga tûgakua nîûntû bwa ataana na aarî ba baaba.

¹⁷Muntû akëethîrwa arî na into na akoona mûkristû ungî arî na thîîna îndî akárega kûmûteethia, nîatîa omba kuuga atî nî endete Mûrungu?

¹⁸Aana baakwa, wendo bweetû bûtîbuîri kwîthîrwa bûrî kwaria akî na nteto inyingî îndî nî bwîthîrwe bûrî wendo bwa mma, na bûgûcionithania na mathithio.

¹⁹Ûntû bûu nîbu bûgatûma tûmenya atî tûrî antû ba mma na bûtûme tûkarage tûtî na ûguaa tûrî mbere ya Mûrungu.

²⁰Nkoro cieetû ikëeja gûtûgambithia, nî tûmenye atî Mûrungu nî ûmûnene nkûrûki ya nkoro cieetû na nî aijî mantû jonthe.

²¹Tontû bûû, acoore baakwa babeende nî tûmenye atî rîrîa nkoro cieetû itîgûtûgambithia, twîthagîrwa tûtî na ûguaa mbere ya Mûrungu.

²²Ningî gûtîkîo tûtîûmba kwona kuuma kîrî we bunka twamûromba, tontû nî twathîkagîra mawaatho jaawe na tûkathithia jarîa jamûgwîragia.

²³ Bûrîa atwathîte tûthithie nî atî twîtîkie Mûtaana waawe Jesû Kristû na twendanage o ta ûrîa Kristû aatwathîre.

²⁴Muntû ûrîa wathîkagîra mawaatho ja Mûrungu ûu atûûraga arî na ngwatanîro na Mûrungu, na Mûrungu akeethîrwa arî na ngwatanîro nawe. Roho ûrîa Mûrungu atûtûmîre nîwe ûtûmaga tûmenya atî tûrî na ngwatanîro na Mûrungu.