Read KIMERU BIBLE PROTESTANT EDITION 1Joh 4 Bible Online

1Joh 4 - KIMERU BIBLE PROTESTANT EDITION bible

1Joh 4

¹Acoore baakwa babeende, bûgéetîkieni antû bonthe barîa baugaga atî barî na Roho. Îndî bacûnkûûneni na bûmenye këethîra Roho ûu barî nawe aumîte kîrî Mûrungu. Tontû iroria bibingî bia ûrongo birî gûntû kunthe nthîgûrûûne.

²Ûrîa bûkamenya Roho ûrîa uumîte kîrî Mûrungu nî ûjû: o muntû ûrîa ûgeetîkia atî Jesû Kristû eejîre gûkû nthî arî na mwîrî ta muntû, ûu arî na Roho ûrîa uumîte kîrî Mûrungu.

³Îndî o muntû ûrîa ûregaga gwîtîkia atî ûu nîu gûkari na Jesû Kristû, ûu tî wa Mûrungu. Roho ûrîa ûrî kîrî muntû ûu nî mûnthû wa Kristû. Nî bwigîtue atî roho wa mûnthû wa Kristû akeeja na nandî arî aja nthîgûrûûne.

⁴Îndî buî aana baakwa, bûrî ba Mûrungu na nî bûthirîtie gûcinda iroria bia ûrongo. Tontû Roho ûrîa ûrî ndeene yeenu arî na inya mono nkûrûki ya roho ûrîa ûrî ndeene ya antû ba nthîgûrû.

⁵Nabio iroria bia ûrongo biaragia nteto cia nthîgûrû, nabo antû ba nthîgûrû bakabithikîîra tontû iroria biu nî bia nthîgûrû.

⁶Îndî tuî tûrî ba Mûrungu. O muntû wonthe ûrîa wiijî Mûrungu nî atûthikagîîra. Ûrîa ûtî wa Mûrungu atîtûthikagîîra. Ûu nîu tûmenyaga Roho wa mma na roho wa ûrongo.

⁷Acoore baakwa, eendanageni tontû wendo buumaga kîrî Mûrungu. Muntû ûrîa wendanaga nî mwana wa Mûrungu na nî aijî Mûrungu.

⁸Ûrîa ûtîendanaga atiijî Mûrungu nîûntû Mûrungu nî wendo.

⁹Mûrungu oonanîrie wendo bwaawe kîrî tuî rîrîa aatûmîre Mûtaana waawe wa mûmwe nthîgûrûûne nîkenda tûkagîa na ûtûûro bwa kenya na kenya kuumania nawe.

¹⁰Wendo bungwa nîbu bûbû: tî atî nî tuî tweendere Mûrungu, îndî nîwe watweendere na aratûtûmîra Mûtaana waawe nîkenda akaa wa gûtûma tûrekerwa meeyia jeetû.

¹¹Acoore baakwa, këethîra ûu nîu Mûrungu atwendere, kinya tuî nî tûbuîri kwendana.

¹² Gûtî muntû woona Mûrungu, îndî tûkëethîrwa nî twendanîte, Mûrungu atûûraga ndeene yeetû nabu wendo bwaawe nî bwonanagua ûrîa bûkari uungwa ndeene yeetû.

¹³Tûrî na mma atî tuî tûtûûraga tûrî na ngwatanîro na Mûrungu, nawe arî ndeene yeetû nîûntû we nî atûnenkerete Roho waawe.

¹⁴Naatuî nî twoonete na tûkeera bangî atî Baaba nî aatûmîre Mûtaana waawe arî Mwonokia wa nthîgûrû.

¹⁵O muntû ûrîa uumbûraga atî Jesû nî Mûtaana wa Mûrungu eethagîrwa arî na ngwatanîro na Mûrungu, nawe Mûrungu arî na ngwatanîro nawe.

¹⁶Tuî nî twijî na twetîkia wendo bûrîa Mûrungu arî nabu kîrî tuî. Mûrungu nî wendo, nawe muntû ûrîa ûtûûraga akîendanaga, nî atûûraga arî na ngwatanîro na Mûrungu, nawe Mûrungu arî na ngwatanîro nawe.

¹⁷Wendo nî buujûrîtue ndeene yeetû nîkenda tûtîkeeje gûkîra Ntukû ya îgamba nîkwîthîrwa ûtûûro bweetû nthîgûrûûne îîjî bûkari ûmwe na bwa Kristû.

¹⁸Wendo bûtî ûguaa; Wendo bwa mma nî bûthiragia ûguaa buru. Tontû bûû, wendo bûtîthagîrwa bûûjûrîtue buru ndeene ya muntû ûrîa ûrî na ûguaa nîûntû ûguaa nî bwa gûkanûkua.

¹⁹Tuî twendanaga nîûntû Mûrungu nîwe watwendere mbere.

²⁰Muntû akauga atî nî endete Mûrungu îndî akëethîrwa athwîre mûkristû ûngî, muntû ûu nî mûrongo nîûntû atîûmba kwenda Mûrungu ûrîa atoona, këethîra we nî akûthûûra muntû ûrîa akwona.

²¹Rîathana rîrîa Kristû aatwathîre nî rîrî: muntû ûrîa wendeete Mûrungu, nî abuîrîte kwenda mûkristû ûngî.