Read KIMERU BIBLE PROTESTANT EDITION 1Joh 5 Bible Online

1Joh 5 - KIMERU BIBLE PROTESTANT EDITION bible

1Joh 5

¹Muntû ûrîa wîtîkagia atî Jesû nîwe Mesia, nî mwana wa Mûrungu. Ningî muntû ûrîa wendeete mûciari nî eendaga kinya mwana waawe.

²Tûmenyaga nî twendeete aana ba Mûrungu ûjû: rîrîa tweendaga Mûrungu na tûkathîkîra maathana jaawe.

³ Tontû kwenda Mûrungu nî kwathîkîra maathana jaawe, naku kwathîkîra maathana jau gûtîûmi.

⁴Nîkwîthîrwa muntû wonthe ûrîa ûrî mwana wa Mûrungu nî acindaga nthîgûrû. Wîtîkio bweetû nî bûtûmaga tûcinda nthîgûrû.

⁵Nûû ûûmba gûcinda nthîgûrû? Nî muntû ûrîa wîtîkîtie atî Jesû nî Mûtaana wa Mûrungu.

⁶Jesû Kristû nîwe ûrîa wabatithîîrue rûûjîîne na areetûûra tharike yaawe mûtharabeene. Ateejîre na rûûjî akî, îndî eejîre na rûûjî na tharike.

⁷Roho nî agûkûûjîîra nteto iu nîûntû we nî ûûma.

⁸Tontû bûû kûrî na akûûjî bathatû: Roho na rûûjî na tharike, na bo-bathatû baritaga ûkûûjî o bûmwe.

⁹Nî twîtîkagîîria ûkûûjî bûriti nî muntû. Îndî ûkûûjî bwa Mûrungu nîbu bûûrito nkûrûki ya bwa muntû, nawe nî atwîrîte ûkûûjî bwegiî Mûtaana waawe.

¹⁰Muntû ûrîa wîtîkagia mantû jegiî Mûtaana wa Mûrungu arî na ûkûûjî ndeene yaawe. Îndî muntû ûrîa ûtîtîkagia Mûrungu, aeethagia Mûrungu mûrongo tontû muntû ûu nî aregeete gwîtîkia mantû jarîa Mûrungu augîîte jegiî Mûtaana waawe.

¹¹ Ûkûûjî bungwa nîbu bûbû: Mûrungu nî atweete ûtûûro bwa kenya na kenya, na kaumo ka ûtûûro bûu nî Mûtaana waawe.

¹²Muntû ûrîa ûrî na Mûtaana arî na ûtûûro bûu; na muntû ûrîa ûtî na Mûtaana wa Mûrungu atî na ûtûûro.

¹³Ndîbwandîkîra mantû jaja buî barîa bwîtîkîtie Mûtaana wa Mûrungu nîkenda bûmenya atî bûrî na ûtûûro.

¹⁴Nî tûgwîtîkia na mma atî Mûrungu agatwigua twamûromba këethîra tûkamûromba kûringana na wendi bwaawe.

¹⁵Ningî këethîra nî twijî atî nî atwigagua rîrîa twamûromba ûntû kinya bûrîkû; nî tûmenyaga atî o bunthe bûrîa tûmûrombete agatûjûrîria.

¹⁶Ûkëeja kwona mûkristû ûngî akîthithia meeyia jarîa jatîûmba gûtûma akua, nî ûbuîrîte kûmûrombera kîrî Mûrungu, nîkenda Mûrungu amwaa ûtûûro. Ndîaria bwegiî meeyia jarîa jatîûmba gûtûma muntû akua. Tontû kûrî na meeyia jarîa jatûmaga muntû akua na ntî kuuga atî nî bûbuîrîte kûromba Mûrungu nîûntû bwa meeyia ta jau.

¹⁷Ûntû kinya bûrîkû bûrîa bûtîagîrîte nî meeyia, îndî kûrî na meeyia jarîa jatîûmba gûtûma muntû akua.

¹⁸Nî twijî atî gûtî mwana wa Mûrungu wîîtaga na mbere na kwîyia, tontû Mûtaana wa Mûrungu nî amûkarîtie, na ûrîa Mûûî atîûmba kûmûthûûkia.

¹⁹Tuî nî twijî atî tûrî ba Mûrungu kinya këethîra nthîgûrû yonthe îrî waathaniine bwa ûrîa Mûûî.

²⁰Tuî nî twijî atî Mûtaana wa Mûrungu nî athirîtie kwîja na atwaa ûmenyo bûrîa bûtûûmbithîtie kûmenya Mûrungu ûrîa ûrî wa mma. Tuî tûtûûraga tûrî na ngwatanîro na Mûrungu wa mma na tûrî na ngwatanîro na Mûtaana waawe Jesû Kristû. Ûu nîwe Mûrungu wa mma na ûtûûro bwa kenya na kenya.

²¹Aana baakwa, ciathûranageni na mîrungu ya mîng'uanano!