Read KIMERU BIBLE PROTESTANT EDITION Agam 1 Bible Online

Agam 1 - KIMERU BIBLE PROTESTANT EDITION bible

Agam 1

¹Nyuma ya gîkûu kîa Joshua, antû ba Israeli nî boorîrie MWATHANI atîrî, “Nî mwîrîga jûrîkû kîrî tuî jûbuîri kwambîrîria kûrwaa na Akanaani?”

²MWATHANI arabeera atîrî, “Nî mwîrîga jwa Juda nîûntû nî njûnenkerete nthîgûrû îîu yee yaao.”

³Nabo antû ba mwîrîga jwa Juda nî beerîre ndûgû ciaao cia mwîrîga jwa Simioni atîrî, “Twîtanieni bûtûgwatie kûrwîra nthîgûrû îrîa tweei kuuma kîrî Akanaani, naatuî tûcoke tûbûgwatie kûrwîra yeenu îrîa bweei.” Nabo antû ba mwîrîga jwa Simioni bareetania nabo.

⁴Rîu antû ba mîîrîga îîu yo îîrî bareeta kûrwaa na Akanaani na Aperizi. MWATHANI aratûma boomba Akanaani na Aperizi barabooragîra ntûûreene ya Bezeki, antû ngiri îkûmi (10,000).

⁵Nabo nî beethîîre mûnene Adoni-bezeki kûu ntûûreene ya Bezeki, bararwa nawe nabo baroomba Akanaani na Aperizi.

⁶Nawe mûtongeeria ûu nî aamatûkîre. Îndî nî beenganîre nawe baramûgwata, baramûgiita biara bibinene bia njara na bia magûrû.

⁷Mûtongeeria ûu wa Bezeki arabeera atîrî, “Anene barîa mîrongo mûgwanja ndaagiitithîrie biara bia njara na bia magûrû batwîre bakîrîîjaga tûng'enyua twa irio tûrîa tûgûûjaga rungu rwa meetha yaakwa. Nandî Mûrungu akûnthithîria o ûrîa ndaabathithîîrie.” Nabo baramwikia Jerusalemu, kûrîa aakuîrîîre.

⁸Nabo asikarî ba Juda nî baaithûkîîre ntûûra ya Jerusalemu baramîtaa. Barooraga antû baayo na baramîîthia na mwanki.

⁹Nyuma ya bûu bareeta kûrwaa na Akanaani barîa baatûûraga nthîgûrû ya irîma, na mûgwanthîîne na rwanda.

¹⁰Baracoka baraithûkîra Akanaani barîa baatûûraga Heburoni (mbereene ntûûra îîu yeetagwa Kiriathiaraba). Nabo nî boombîre mîîrîga ya Sheshai, na Ahimani, na Talimai.

¹¹Ningî antû bau ba Juda nî baaithûkîîre ntûûra ya Debiri (nayo îgiita rîu yeetagwa Kiriathi-seferi.)

¹²Ûmwe waao weetagwa Kalebu arauga atîrî, “Muntû ûrîa ûkoomba kwithûkîra ntûûra ya Kiriathi-seferi na amîtae, nkamwaa mwarî waakwa Akisa, ae mwekûrû waawe.”

¹³Othinieli nî aamîtaîre. Akisa, mwarî wa Kalebu, nî aanenkanîîrwe kîrî Othinieli araa mwekûrû waawe. Othinieli aarî mûtaana wa Kenazi, na Kenazi aarî mûtaana wa ng'ina ûrîa mûnini wa Kalebu.

¹⁴Ntukû ya gwika, Othinieli nî eerîre Akisa arombe îthe kîthaka. Akisa arakinya nthî kuuma mûgongo jwa ntigiri. Rîu Kalebu aramûûria atîrî, “Nîatîa ûkwenda nkûthithîria?”

¹⁵Akisa aramûcokeria atîrî, “Mpa kîewa. Tontû nthîgûrû îrîa ûmpeete nî rwanda, mpa kinya ithima bia rûûjî.” Kalebu aramwaa ithima birîa biaarî bwa rûgûrû na bwa gaiti.

¹⁶Nchiarwa cia Mûkeni ûrîa mûthoni wa Musa, nî cieetanîrie na antû ba Juda. Nabo nî baaumîre ntûûreene ya mîkîndû tayo Jeriko bareeta bûûrîîne ya Juda, îrîa îrî rwanda rûrîa rûrî akuî na ntûûra ya Aradi. Nabo baratûûra amwe na antû ba kûu.

¹⁷Nabo antû ba mwîrîga jwa Juda nî beetanîrie na antû ba ndûgû ciaao ba mwîrîga jwa Simioni kûrwaa na Akanaani barîa baatwîre Zefathi. Nayo mîîrîga îîu nî yaathirîrie Akanaani buru barîa baatwîre ntûûreene îîu ya Zefathi. Nayo ntûûra îîu nî baamîîtîre Horima.

¹⁸Nabo nî baataîre ntûûra ya Gaza, na ya Ashikeloni, na ya Ekironi amwe na nthîgûrû irîa ciaithiûrûkîte.

¹⁹MWATHANI nî aateetherie antû ba Juda baroomba antû ba nthîgûrû cia irîma. Îndî batoombîre kwînga antû barîa baatûûraga mûgwanthîîne nîûntû nî baarî na ngaarî cia ndwaa cia chuuma.

²⁰ Kalebu nî aaerwe ntûûra ya Heburoni, o ta ûrîa Musa aaugîîte, nawe areenga antû barîa baatwîre ku tabo nchiarwa cia Anaki.

²¹ Îndî antû ba mwîrîga jwa Benjamini nî bateengîre Ajebusi barîa baatwîre Jerusalemu. Tontû bûû, Ajebusi nî batwîre Jerusalemu amwe na antû ba mwîrîga jwa Benjamini mwanka naarua tûrî.

²²Nabo antû ba mwîrîga jwa Efuraimu na jwa Manase nî baithuranîîre kwithûkîra ntûûra ya Betheli, îrîa yeetagwa Luzi mbereene. MWATHANI nî aabateethagia.

²³Ningî nî baatûmîre achûnkûûni ntûûreene iu.

²⁴Nabo achûnkûûni bau nî boonere muntû ûmwe waaumîte ntûûreene îîu. Baramwîra atîrî, “Twonie njîra ya gûtonya ntûûreene îîjî, naatuî tûtîkûringithia.”

²⁵Nawe araboonia. Antû ba mwîrîga jwa Efuraimu na jwa Manase nî beetîre barooraga antû bonthe ba ntûûra îîu tiga muntû ûu akî na antû ba nja yaawe.

²⁶Nawe muntû ûu areeta nthî ya Ahiti, araaka ntûûra, nayo aramîîta Luzi. Rîu nîrîo riîtwa rîa ntûûra îîu mwanka naarua tûrî.

²⁷ Antû ba mwîrîga jwa Manase bateengîre antû barîa baatwîre ntûûreene ya Bethisheani, kana ya Taanaki, kana ya Dori, kana ya Ibileamu, kana ya Megido, amwe na tûtûûra tûrîa twaithiûrûkîrîte. Tontû bûû, Akanaani nî beetîre na mbere gûtûûra ku.

²⁸Nabo Aisraeli bakûgîta inya, nî bambîrîîrie kûritithia Akanaani ngûgî kwa inya, îndî bataabeengîre buru.

²⁹ Nabo antû ba mwîrîga jwa Efuraimu bateengîre Akanaani barîa baatwîre ntûûra ya Gezeri. Tontû bûû, Akanaani bau bareeta na mbere gûtûûra amwe nabo.

³⁰Nabo antû ba mwîrîga jwa Zebuloni bateengîre Akanaani barîa baatwîre ntûûra ya Kitironi na Nahaloli. Tontû bûu Akanaani bareeta na mbere gûtûûra amwe nabo, bakîritagîra Aisraeli ngûgî kwa inya.

³¹Ningî antû ba mwîrîga jwa Asheri bateengîre antû barîa baatwîre ntûûreene ya Ako, na ya Sidoni, na ya Ahalabu, na ya Akizibu, na ya Heliba, na ya Afiki, na ya Rehobu.

³²Tontû bûû, antû ba mwîrîga jwa Asheri nî baatûûrîre amwe na Akanaani nîûntû bataabengîre.

³³Nabo antû ba mwîrîga jwa Nafutali bateengîre antû barîa baatwîre ntûûreene ya Bethishemeshi na ya Bethianathi. Tontû bûû, Aisraeli nî baatûûrîre amwe nabo, bakîritagîra Aisraeli ngûgî kwa inya.

³⁴Nabo antû ba mwîrîga jwa Dani nî beengîrîîrue nthîgûrûûne ya irîma nî Aamori na bataabarekere beenama mûgwanthîîne.

³⁵Aamori nî beetîre na mbere gûtûûra kîrîmeene kîa Heresi na ntûûreene ya Aijaloni na ya Shaalibimu. Îndî antû ba mwîrîga jwa Efuraimu na ba mwîrîga jwa Manase nî baabainyîrîîrie bakîbaritithagia ngûgî kwa inya.

³⁶Mwanka jwa nthîgûrû ya Aamori jwaitîîtie mwanka mûcîcîbîroone jwa Akirabimu, jûgaitia mwanka ntûûreene ya Sela.