Read KIMERU BIBLE PROTESTANT EDITION Agam 10 Bible Online

Agam 10 - KIMERU BIBLE PROTESTANT EDITION bible

Agam 10

¹Nyuma ya Abimeleki agûkua, nî kwonekere muntû wa kwonokia Israeli, weetagwa Tola mûtaana wa Pua, Pua aarî mûtaana wa Dodo, kuuma mwîrîgeene jwa Isakari. Tola aatwîre ntûûreene ya Shamiri nthîgûrûûne ya irîma ya Efuraimu.

²Aratongeeria Israeli mîaka mîrongo îîrî na îthatû. Nyumeene arakua na arathikwa Shamiri.

³Nyuma ya Tola, Jairi kuuma mwîrîgeene jwa Gileadi, nî aaere mûtongeeria wa Israeli mîaka mîrongo îîrî na îîrî.

⁴Nî aarî na ataana mîrongo îthatû. Nabo nî baarî na ntigiri mîrongo îthatû irîa ciaabakamataga. Ningî nî baarî na ntûûra mîrongo îthatû kûu nthîgûrûûne ya Gileadi. Nacio itwîre igîtagwa Ntûûra cia Havothi-jairi mwanka naarua tûrî.

⁵Jairi nî aakuîre na arathikwa ntûûreene ya Kamoni.

⁶Aisraeli nî beeîîrie MWATHANI o kaîrî baratiga kûmûtumîkagîra. Baratua gûtumîkagîra mûrungu jwa Baali na jwa Ashitarothi, na mîrungu ya nthîgûrû ya Sîria, na ya Sidoni, na ya Moabu, na ya Aamoni, na ya Afilisti.

⁷MWATHANI arathûûra nîbo mono arabanenkanîra kîrî Afilisti na Aamoni.

⁸Nabo baraûûra na barainyîîria antû ba Israeli mîaka îkûmi na înaana, barîa baarî nthîgûrû ya Aamori bwa gaiti ya mûuro jwa Jorodani kûu Gileadi.

⁹Ningî Amoni nî baaunîre mûuro jwa Jorodani bareeta kûrwaa na antû ba mwîrîga jwa Juda na jwa Benjamini na jwa Efuraimu. Antû ba Israeli barathîîna mono.

¹⁰Nîrîo antû ba Israeli bakaîîre MWATHANI bakiugaga atîrî, “Nî tûkwîîrîîtie na twagûtiganîîria gwe Mûrungu weetû, twambîrîria kûthaathayia mîrungu ya mîng'uanano.”

¹¹MWATHANI arabooria atîrî, “Anga ntaabwonokerie kuuma kîrî Amisri na Aamori na Amoni na Afilisti?

¹²Ningî rîrîa bwaiinyagîîrua nî Asidoni na Amaleki na Aamoni, bûgûnkaîra anga ntaabwonokerie kuuma kîrî bo?

¹³Tontû nî bûmbîrûkîrîte bwatua gûtumîkagîra mîrungu îngî, ni ntîbwonokia kaîrî.

¹⁴Îteeni bûgakaîre mîrungu îîu bûthuurîte. Nayo nî îbûteethagie rîrîa bûrî thîîneene.”

¹⁵Îndî antû ba Israeli bareera MWATHANI atîrî, “Nî tûkwîîrîîtie. Thithia na baatuî ûrîa ûkwona kwagîrîte. Îndî itû twakwerenca ûtwonokie naarua.”

¹⁶Antû ba Israeli nabo nî baatiganîre na mîrungu îîu ya mîng'uanano baracoka kûthaathayia MWATHANI waao. MWATHANI arathûûra nî kwona ûrîa antû ba Israeli baathînîte.

¹⁷Rîu njûûrî cia Amoni nî ciothûranîre iramba kambî Gileadi. Nacio njûûrî cia Israeli iroothûrana iramba kambî Mizipa.

¹⁸Nabo atongeeria ba Gileadi baroorania ûjû, “Nûû ûkwenda gwîta gûtwambîrîria ndwaa na Amoni? Ûu nîwe ûgaatongeeria antû ba Gileadi bonthe.”