Read KIMERU BIBLE PROTESTANT EDITION Agam 11 Bible Online

Agam 11 - KIMERU BIBLE PROTESTANT EDITION bible

Agam 11

¹Jefitha ûrîa Mûgileadi aarî nchamba ya ndwaa. Îthe eetagwa Gileadi, îndî ng'ina aarî mûmaraya.

²Gileadi na mûka waawe nî bagîîre na ataana bangî. Nabo rîrîa bagîîre ûûme, nî beengîre Jefitha nja bakîmwîraga atîrî, “Gûtî gîntû kîa baaba ûkaagaîrwa gwe nîûntû ûtî wa maama.”

³Jefitha aramatûka kuuma kîrî bo areeta gûtûûra nthî ya Tobu. Nawe aroothûranîa gîkuundî kîa antû ngîti aratua gwîtaga kwithûka nakîo.

⁴Kûrakara atîrî, rîrîa Aamoni baaithûkîîre Israeli,

⁵akûrû ba Gileadi nî beetîre kûgîîra Jefitha kuuma nthî ya Tobu.

⁶Baramwîra atîrî, “Njû ûtûtongeerie tûkarwee na Aamoni.”

⁷Îndî Jefitha areera akûrû bau ba Gileadi atîrî, “Uga bûtaanthûûrîre bûrampînga nja ya baaba? Nandî nîûntû bûrî thîîneene nîrîo bwîjîte kîrî ni?”

⁸Nabo akûrû ba Gileadi bareera Jefitha atîrî, “Kîu nîkîo gîatûma twîja gûgûcwa naarua, nîkenda wîîtania naatuî kûrwaa na Aamoni. Naagwe ûkaa mûtongeeria weetû na wa antû barîa batwîre Gileadi bonthe.”

⁹Jefitha arabeera ûjû, “Bwancokia nja mbîta kûrwaa na Aamoni rî, MWATHANI akëeja gûmpûmbanîîra kîrî bo, nkaa mûtongeeria weenu?”

¹⁰Nabo akûrû ba Gileadi bareera Jefitha ûjû, “Tûgwîtîkîîria u, MWATHANI nîwe mûkûûjî weetû.”

¹¹Tontû bûû Jefitha areetania na akûrû bau ba Gileadi, nabo antû ba Gileadi baramweethia mûtongeeria waao. Jefitha aracokera mantû jarîa aarîîtie mbere ya MWATHANI kûu Mizipa.

¹²Jefitha aracoka aratûmana kîrî mûnene wa Aamoni akîmûûragia atîrî, “Nîatîa ûkwenda naani tontû weeja kûrwîra naani nthîgûrû yaakwa?”

¹³Mûnene wa Amoni areera barîa baatûmi nî Jefitha atîrî, “Rîrîa Aisraeli baaumîre Misri, ni bajûkîrie nthî yaakwa kuuma mûuro jwa Arinoni mwanka jwa Jaboki, na jwa Jorodani. Nandî weenda thîîrî naani rî, ncokeria yo.”

¹⁴Jefitha aratûma antû kaîrî kîrî mûnene wa Amoni

¹⁵aramwîra atîrî, “Ûûni Jefitha ndîkwîra ûjû, Aisraeli bataatuunyana nthî ya Moabu kana ya Amoni.

¹⁶Nîkwîthîrwa rîrîa Aisraeli baaumîre Misri, beetîrîîre rwanda barakinya Îria Îtuune na baraumîîra Kadeshi.

¹⁷ Nabo baratûmana kîrî mûnene wa Edomu bakiugaga atîrî, ‘Twîtîkîîrie itû, tûkûrûkîîre nthîgûrû yaaku.’ Îndî mûnene wa Edomu ararega. Ningî baratûmana kîrî mûnene wa Moabu, na kinya we ararega. Tontû bûû, Aisraeli barakara Kadeshi.

¹⁸ Baracoka baragiitanîîria rwanda, barathiûrûka nthîgûrû ya Edomu na nthîgûrû ya Moabu, mwanka barakinya rûteere rwa gaiti rwa nthîgûrû ya Moabu rwongo rûrîa rûngî rwa mûuro jwa Arinoni. Baraamba maema o, îndî batauna rûûjî rwa Arinoni nîûntû nîrû rwarî mwanka jwa nthî ya Moabu.

¹⁹ Nabo Aisraeli nî baatûmanîre kîrî Sihoni, mûnene wa Aamori ûrîa waathanaga Heshiboni, baramwîra atîrî, ‘Twîtîkîîrie itû, tûkûrûkîîre nthî yaaku twîte nthî yeetû.’

²⁰Mûnene Sihoni araregeera antû ba Israeli, bakûrûkîîra nthî yaawe. Aroothûrania njûûrî yaawe yonthe baraamba kambî Jahazi na araithûkîra Israeli.

²¹Îndî MWATHANI Mûrungu wa Israeli aranenkanîra mûnene Sihoni amwe na antû baawe bonthe kîrî antû ba Israeli. Aisraeli baraboomba ndweene barataa nthî yonthe îrîa Aamori baatwîre.

²²Barataa nthî yonthe ya Amori kuuma mûuro jwa Arinoni bwa ûmotho gwîta bwa ûrîo mûuroone jwa Jaboki, na kuuma rwanda mwanka mûuro jwa Jorodani bwa rûgûrû.

²³Tontû bûû, nî MWATHANI, Mûrungu wa Israeli weengîre Aamori nîûntû bwa antû baawe Israeli.

²⁴Bûtajûkia kîrîa mûrungu jweenu jûrîa jwîtagwa Kemoshi jûbweete? Naatuî tûtîrekia kîrîa kîonthe MWATHANI Mûrungu weetû atweete.

²⁵ Nîgwe ûkûrûkîte Balaki, mûtaana wa Zipori, mûnene wa Moabu? Ûraigua athangîte Aisraeli kana arwaa nabo?

²⁶Aisraeli nî baatûûrîte mîaka magana jathatû ntûûreene cia Heshiboni na Aroeri, na ntûûreene cionthe irîa irî nteere cia mûuro jwa Arinoni. Nîmbi yagiragia ûjûkia nthî îîu îgiita rîu rîonthe?

²⁷Ni gûtî ûthûûku nkûthithîrîtie, îndî gwe nîgwe ûkûnthanga nîûntû bwa kûmbithûkîra. MWATHANI nîwe ûtuujanagîra magamba. Naarua MWATHANI akaagiita îgamba gatîgatîîne ka antû ba Israeli na antû ba Amoni.”

²⁸Îndî mûnene wa Aamoni ararega kwigua ntûmwa ya Jefitha.

²⁹Jefitha aroojûrwa nî Roho wa MWATHANI. Jefitha aragiitanîîria nthîgûrûûne ya Gileadi na ya Manase, araumîîra ntûûreene ya Mizipa kûu Gileadi. Kuuma Mizipa areeta mwanka nthîgûrû ya Aamoni.

³⁰Jefitha araciîtîria MWATHANI arauga, “Ûkëeja gûtûma mpûûmba Aamoni ndweene,

³¹ngakûritîra kîgongwana gîa gwakîîria kîa muntû wonthe wa nja yaakwa ûrîa ûkaumagara arî mbere eejîte kûnthagaana.”

³²Tontû bûû, Jefitha arauna mûuro areeta kwithûkîra Aamoni. MWATHANI aramwaa ûûmbani.

³³Nawe araûûra antû ba Amoni kuuma ntûûreene ya Aroeri mwanka Minithi. Ntûûra irîa cionthe aithûkîîre ciaarî mîrongo îîrî, mwanka ntûûreene ya Abeli-keramimu. Nabo antû babaingî nî booragîrwe. Ûu nîu Aamoni boombîrwe ndweene nî antû ba Israeli.

³⁴Jefitha nî aanîre nja yaawe ntûûreene ya Mizipa. Mwarî waawe araumagara areeta kûmûthagaana akiinaga na tambûrini. Jefitha ataarî na aana bangî tiga mwarî ûu akî.

³⁵ Rîrîa Jefitha oonere mwarî ûu waawe, nî aatambûrangîre nguû ciaawe kwonania kwithikîîra. Jefitha arauga atîrî, “Wûûi naanû, mwarî waakwa! Ûkûmbîkîra kîeba gîkînene, wanthîînia mono. Nîkwîthîrwa nî nthirîtie gûciîtîria MWATHANI ûntû, na ntîûmba kûregana na mûciîtio jûu.”

³⁶Nawe mwarî ûu aramwîra atîrî, “Baaba, këethîra nî wîkîte mûciîtio na MWATHANI rî, thithia naani ûrîa ûkwona kwagîrîte. Nîkwîthîrwa MWATHANI nî atûmîte ûkoomba anthû baaku tabo Aamoni.”

³⁷Ningî mwarî ûu areera îthe atîrî, “Mbîtîkîîria mbîte irîmeene amwe na acoore baakwa tûkare nao mîeri îîrî, nîkenda twithikîîra nîûntû ngaakua ndî mwarî karaiti.”

³⁸Îthe aramwîra atîrî, Nîu îta. Mwarî ûu areeta amwe na acoore baawe bareeta irîmeene barathiria mîeri îîrî baithikîîrîte nîûntû nî eetîte gûkua atîgûri.

³⁹Nyuma ya mîeri îîrî, mwarî ûu nî aacokere kîrî îthe, nawe arathithia o ûrîa aciîtîrîtie MWATHANI. Mwarî arakua atîgûri.

⁴⁰Kîu nîkîo gîtûmi ndeene ya Israeli aarî beetaga ntûkû inya o kîrî mwaka baarîraga kûririkana mwarî ûu wa Jefitha ûrîa Mûgileadi.