Read KIMERU BIBLE PROTESTANT EDITION Agam 12 Bible Online

Agam 12 - KIMERU BIBLE PROTESTANT EDITION bible

Agam 12

¹Antû ba mwîrîga jwa Efuraimu nî baithuranîîre bareeta ndweene. Nabo barauna mûuro jwa Jorodani bareeta ntûûreene ya Zafoni. Baakinya ku bareera Jefitha atîrî, “Nîkî ûntû weetîre kwithûkîra Aamoni ûtîtûûrîîtie twîtania naagwe? Tontû bûû, tûkaîîthia nyomba yaaku, ûîîre ku.”

²Jefitha nawe arabeera atîrî, “Ûûni na antû baakwa nî twaatetaga na antû ba Amoni mono. Îndî rîrîa ndaabwîtîre bûnteethia kuuma kîrî bo nî bwaaregere.

³Naani rîrîa ndoonere atî bûtînteethia, ndîrairita ndîrauna mûuro ndîreeta kwithûkîra Aamoni. MWATHANI aranteethia ndîraboomba. Nandî rî, nîkî ûntû naarua bweja kûrwaa naani?”

⁴Rîu Jefitha araithuranîra na antû bonthe ba mwîrîga jwa Gileadi bareeta kwithûkîra antû ba mwîrîga jwa Efuraimu, barabathiria buru. (Nîkwîthîrwa antû ba mwîrîga jwa Efuraimu baugaga atîrî, “Buî antû ba mwîrîga jwa Gileadi nîka bwamatûkîre kuuma Efuraimu. Ningî kûrîa bûtwîre nî nthîgûrû ya mwîrîga jwa Efuraimu na Manase.”)

⁵Nabo antû ba Gileadi nî baakabîîre antû ba Efuraimu kûrîa barîngî kuunîra mûuro jwa Jorodani. Muntû wa mwîrîga jwa Efuraimu eenda kuuna mûuro jwa Jorodani antû ba Gileadi nî baamûûragia atîrî, “Ûûgwe ûrî Mûefraimu?” Nawe auga, arî,

⁶bakamwîra agwete kiugo Shibolethi, Îndî auga Sibolethi, bakamûûraga, o au, nîûntû nî baijî antû ba Efuraimu batîngî kûmenya kûgweta kiugo kîu ûrîa kîagîrîte kûgwetwa. Antû bonthe ba Efuraimu barîa booragîîrwe ndweene bakiunaga Jorodani baarî ngiri mîrongo îna na baîrî (42,000).

⁷Jefitha aatongeererie Israeli mîaka îtaantatû. Nawe arakua, na arathikwa ntûûreene yaao kûu Gileadi.

⁸Nyuma ya Jefitha gûkua, Ibizani, wa kuuma ntûûreene ya Bethlehemu, nîwe waaere mûtongeeria wa Israeli.

⁹Ibizani nî aarî na ataana mîrongo îthatû, na aarî mîrongo îthatû. Nî eenderie aarî baawe mîîrîgeene îngî, na aragûranîîra ataana baawe kuuma mîîrîgeene îngî. Ibizani aatongeererie Israeli mîaka mûgwanja.

¹⁰Nawe arakua, na arathikwa ntûûreene ya Bethlehemu.

¹¹Nyuma ya Ibizani gûkua, Eloni, wa kuuma mwîrîgeene jwa Zebuloni, nîwe waaere mûtongeeria wa Israeli. Eloni aatongeererie Israeli mîaka îkûmi.

¹²Nawe arakua na arathikwa ntûûreene ya Aijaloni, kûu Zebuloni.

¹³Nyuma ya Eloni gûkua, Abidoni, mûtaana wa Hileli, wa kuuma ntûûreene ya Pirathoni, nîwe waaere mûtongeeria wa Israeli.

¹⁴Abidoni aarî na ataana mîrongo îna na aana ba ataana baawe mîrongo îthatû. Nabo baakamatagwa nî ntigiri mîrongo mûgwanja. Abidoni aatongeererie Israeli mîaka înaana.

¹⁵Nawe arakua, na arathikwa ntûûreene ya Pirathoni, kûu mwîrîgeene jwa Efuraimu, nthîgûrû ya irîma ya Amaleki.