Read KIMERU BIBLE PROTESTANT EDITION Agam 13 Bible Online

Agam 13 - KIMERU BIBLE PROTESTANT EDITION bible

Agam 13

¹Antû ba Israeli nî beeîîrie MWATHANI o kaîrî, nawe MWATHANI arabanenkanîra kîrî Afilisti mîaka mîrongo îna.

²Naku nî kwaarî na muntû ûmwe, weetagwa Manoa wa ntûûra ya Zora. Nawe aarî wa mwîrîga jwa Dani. Mwekûrû waawe ataarî na twaana.

³Mûraîka wa MWATHANI nî aacionanîrie kîrî mûka ûu aramwîra atîrî, “Gwe ûrî nthaata. Îndî ûkaagîa îu na ûciare kaîjî.

⁴Nandî menyeera, ûtîkeeje kûnyua ndibei kana kîogitia kîngî, kana ûrîa gîntû gîtîtheri.

⁵ Nîkwîthîrwa, ûkaagia îu na ûciare kaîjî. Nawe atîbuîri kwenjwa mûtuundu nîûntû akaathûrîrwa Mûrungu kuuma gûciarwa kwaawe ae Mûnaziri. Nawe akaambîrîria ngûgî ya kwonokia Israeli kuuma kîrî Afilisti.”

⁶Mûka ûu areeta areera mûkûrû waawe atîrî, “Muntû wa Mûrungu agûcionania kîrî ni, na arîonekanaga arî wa kûmakania mono ta mûraîka wa Mûrungu. Ntîramûûria kûrîa akuumîte nawe atîrambîîra riîtwa rîaawe.

⁷Îndî nî aambîrîre atî nkaagîa îu na nciare kaîjî. Ningî ambîîra ntîkanyue ndibei kana kîogitia kîngî, kana ndîa gîntû gîtîtheri. Nîkwîthîrwa mwana ûu akaathûrîrwa Mûrungu ae Mûnaziri kuuma gûciarwa kwaawe mwanka gûkua.”

⁸Manoa nî aarombere MWATHANI arauga atîrî, “Itû MWATHANI, ndakwerenca muntû ûu wa Mûrungu ûrîa ûgûtûtûmîrîte nî eeje kaîrî kîrî tuî atwîîre ûrîa tûkaathithia mantû jegiî mwana ûu ûgaaciarwa.”

⁹Mûrungu aracokia îromba rîa Manoa. Mûraîka wa Mûrungu aracionania kîrî mwekûrû wa Manoa. Mwekûrû ûu akari nthî muundeene, îndî Manoa ataarî antû au.

¹⁰Mwekûrû areetanga areera mûkûrû waawe atîrî, “Njû woone! Muntû ûrîa ûraacionanîtie kîrî ni, agûcionania kaîrî!”

¹¹Manoa areetania na mwekûrû waawe. Baakinya kîrî muntû ûû, Manoa aramwîra atîrî, “Nîgwe ûraarîîrie mwekûrû waakwa?” Nawe muntû ûu aramûcokeria, “Îî nî ni.”

¹²Tontû bûû, Manoa aramûûria atîrî, “Nandî nteto ciaaku ciojûra rî, mwana ûu nîatîa akaathithagia? Ningî mûtûûrîre jwaawe jûkeethîrwa jûkari atîa?”

¹³Mûraîka wa MWATHANI areera Manoa ûjû, “Mwekûrû waaku nî amenyeere mono oojûrie mantû jarîa jonthe ndîramwîrîre.

¹⁴Mwekûrû waaku akárîa gîntû kinya kîrîkû gîtîtheri kana kiumenie na mîzabibû. Akáanyua ndibei kana kîogitia. No mwanka oojûrie jarîa mwîrîte.”

¹⁵Manoa, areera Mûraîka wa MWATHANI, “Itû karakara naatuî tûkûthînjîre kabûri.”

¹⁶Mûraîka wa MWATHANI areera Manoa atîrî, “Kinya ngakarakara, ntîrîa biakûrîa bieenu, îndî ûkeenda no ûritîre MWATHANI kîgongwana gîa gwakîîria.” (Manoa ataamenyaga atî muntû ûu nî mûraîka wa MWATHANI).

¹⁷Manoa areera mûraîka wa MWATHANI atîrî, “Twîre ûrîa wîtagwa nîkenda rîrîa nteto ciaaku ikoojûra tûûmba gûgûcokeria nkaatho.”

¹⁸ Îndî mûraîka wa MWATHANI aramwîra atîrî, “Tiga kwenda kûmenya riîtwa rîaakwa nîûntû rîtîmenyeka.”

¹⁹Tontû bûû, Manoa nî aajûkîrie kabûri na irio arabiritîra iigeene rîrî kîritîro kîa igongwana. Araritîra MWATHANI kîgongwana gîa gwakîîria. MWATHANI arathithia mantû ja kûrigaria Manoa na mwekûrû waawe bategeete.

²⁰Naru rûmûrî rwa mwanki nî rwaakanîre kuuma kîritîroone kîa igongwana rûraitia bwa îgûrû. Nawe mûraîka wa MWATHANI araitania naru. Rîrîa Manoa na mwekûrû waawe boonere ûu, baraturia maru bareenamîîria mwanka nthî.

²¹Mûraîka wa MWATHANI ataacionanîrie kaîrî kîrî Manoa kana mwekûrû waawe. Rîu nîrîo Manoa aamenyere muntû ûu aarî mûraîka wa MWATHANI.

²²Manoa areera mwekûrû waawe atîrî, “Nî mma tûgaakua nîûntû tûkwona Mûrungu!”

²³Îndî mwekûrû waawe aramwîra atîrî, “Këethîra MWATHANI nî akwendaga gûtûûraga rî, atîngî gwîtîkîîra kîgongwana kîa gwakîîria na kîa irio kuuma kîrî tuî. Ningî atîngî twîra mantû jaja jonthe, kana atwonia mantû ta jaja.”

²⁴Mwekûrû ûu wa Manoa nî aaciarîre kaîjî, aramwîta Samusoni. Mwana ûu arakûra MWATHANI akîmûtharimaga.

²⁵Samusoni aambîrîîrie kûûjûrwa nî Roho wa MWATHANI arî kambîîne ya Dani, gatîgatî ga ntûûra ya Zora na Eshitaoli.