Read KIMERU BIBLE PROTESTANT EDITION Agam 14 Bible Online

Agam 14 - KIMERU BIBLE PROTESTANT EDITION bible

Agam 14

¹Ntukû îmwe Samusoni nî eetîre ntûûreene ya Timuna aroona mwarî ûmwe Mûfilisti.

²Samusoni araana areera îthe na ng'ina atîrî, “Ndîkwona mwarî Mûfilisti ntûûreene ya Timuna. Nandî ngûrîreeni we ae mwekûrû waakwa.”

³Nabo îthe na ng'ina baramûûria atîrî, “Nîka waagîte mwarî kuuma kîrî ndûgû cieetû kana kuuma kîrî antû beetû bonthe rîu nîkenda wîîta kûgûranîrwa kwa Afilisti batîîtîkîtie Mûrungu?” Îndî Samusoni areera îthe atîrî, “Ûu nîwe nkwenda ûngûrîra nîûntû nîwe nkwenda.”

⁴Îthe na ng'ina nabo bataamenyaga atî nî MWATHANI waatûmaga Samusoni eenda kûthithia ûntû bûû nîkenda kwoneka gîtûmi gîa kûrwaa na Afilisti. Afilisti nîbo baathaga Israeli îgiita rîu.

⁵Samusoni amwe na aciari baawe nî beetîre ntûûreene ya Timuna. Bagûkinya muundeene jwa mîzabibû jûrîa jwaarî akuî na ntûûra ya Timuna, kîanaana kîa ngatûnyi kîraumbuthûkîra Samusoni gîkîruumaga.

⁶Roho wa MWATHANI aroojûra Samusoni. Samusoni aragwata kîanaana kîu kîa ngatûnyi aragîtambûranga na njara ta kabûri agûtambûranga. Nawe ateerîre îthe kana ng'ina ûrîa aathithia.

⁷Samusoni nî eetîre araaria na mwarî ûrîa, na aramwenda.

⁸Nyuma ya ntukû inkai nî aacokere kwa ba mwarî ûu nîkenda amûgûra. Arî njîreene nî aaûkîîre nîkenda oona kiimba kîa ngatûnyi îrîa ooragîte. Nawe rî, nî aarigarîre oona njûkî na nainchû birî ndeene ya kiimba kîu.

⁹Nawe arakumbata areeta akîrîîjaga na njîra. Rîrîa aakinyîre kîrî îthe na ng'ina arabarûmia. Nabo bararîa, îndî Samusoni ataabeerîre këethîra aaritîte nainchû îîu kiimbeene kîa ngatûnyi.

¹⁰Îthe wa Samusoni nî eetîre kwa ba mwarî ûu. Samusoni arathithîria mambura ja mûranû nao, o ta ûrîa kwaarî wîîthîre.

¹¹Rîrîa antû ba ba-mwarî tabo Afilisti baamwonere nî baatûmîre nthaka mîrongo îthatû ciîta kûmûkaria.

¹²Samusoni arabeera atîrî, “Gwateni ntaî. Bwambîîra ûrîa ntaî iu ikuuga mbere ya ntukû mûgwanja cia mûranû itîrathira, nkabwaa itambaa na mabaa ja nguû mîrongo îthatû.

¹³Naabuî bwaremwa kûmbîîra ûrîa ntaî iu ikuuga, bûnenkere itambaa na mabaa ja nguû mîrongo îthatû.” Nabo baramwîra atîrî, “Twagwata ntaî. Twîre cio.”

¹⁴Samusoni arabeera atîrî, “Kuuma kîrî ndîîjani, kwaumîre gîakûrîa; kuuma kîrî îrî inya, kûrauma kîrî mûrîo!” Nabo barathiria ntukû ithatû batîkûmenya ûrîa ntaî iu ciaaugaga.

¹⁵Ntukû ya inya bareera mûka wa Samusoni, atîrî, “Aîria mûkûrû waaku nîkenda atwîra ûrîa ntaî îîu ikuuga. Warega tûkaîthia nyomba ya abaagu na mwanki na tûkwîîthie. Tuuge bûratwîtîte nîkenda bûtwiîra into?”

¹⁶Mwekûrû wa Samusoni areeta kîrî we akîrîraga aramwîra atîrî, “Ûûgwe ûtîmpendeete. Ûnthwîre mono. Nîkî ûntû ûkûgwatithia antû beetû ntaî na ûtîmbîrîte ûrîa îkuuga?” Samusoni aramwîra atîrî, “Ntîîrîte kinya aciari baakwa; nîgwe nkeera?”

¹⁷Tontû bûû, mwekûrû ûu arakara akîrîraga ntukû cionthe mûgwanja cia mambura ja mûranû. Îndî nîûntû bwa ûrîa aakarîte akîmwerencaga nîkenda amwîra ûrîa ikuuga, ntukû ya mûgwanja, Samusoni aramûtaûrîra ntaî. Mûka ûu areera Afilisti.

¹⁸Ntukû îîu ya mûgwanja mbere ya riûa rîthûa, antû ba ntûûra îîu nî beetîre kîrî Samusoni baramwîra atîrî, “Nîmbi îrî mûrîo nkûrûki ya nainchû? Nîmbi îrî inya nkûrûki ya ngatûnyi?” Samusoni arabeera atîrî, “Bûkëethîrwa bûtîrarîmîre na mwari yaakwa, bûtîngîmenya gûtaûra ntaî iu!”

¹⁹Roho wa MWATHANI nî eejîriîre Samusoni aramwîkîra inya. Samusoni areeta ntûûreene ya Ashikeloni, arooraga antû mîrongo îthatû arabarita nguû ciaao inthongi araikîria barîa baataûrîre ntaî. Aracoka araana athûûri mono nî ûrîa gwakarîkîte.

²⁰Mwekûrû waawe aranenkanîrwa kîrî muntû ûrîa warûngamîrîte Samusoni mûranû.