Read KIMERU BIBLE PROTESTANT EDITION Agam 15 Bible Online

Agam 15 - KIMERU BIBLE PROTESTANT EDITION bible

Agam 15

¹Nyuma ya îgiita mma, kûrî îgiita rîa maketha ja nkano, Samusoni nî eetîre kûriûngîra mwekûrû waawe, amwikîrîtie kabûri. Agûkinya areera îthe wa mwekûrû waawe atîrî, “Ga nkûrûke kîrî mwekûrû waakwa kanyomba kaawe. Îndî îthe wa mwekûrû wa Samusoni ararega kûmwîtîkîîria.”

²Aramwîra atîrî, “Ndaathûgaanîrie nîka waamûthûûrîre buru na ndîramûnenkanîra aragûrwa nî mûthaka ûrîa waakûrûngamîrîte mûranû. Îndî nîûntû mwarî wa ng'ina ûrîa mûnini nîwe mûthongi kîrî we rî, no ûmûgûre?”

³Samusoni nawe aramwîra atîrî, “Îgiita rîrî ntîîthîrwa nthûûkîtie nîûntû bwa ntaame îrîa ngaatema Afilisti!”

⁴Areeta aragwata mbîrwa magana jathatû, aratheekania mbîrwa ijîîrî-ijîîrî inyiritha na arabiogeera inyiinga.

⁵Rîu aragwatia inyiinga mwanki, areengîîria mbîrwa iu miuundeene ya nkano ya Afilisti. Nacio iraîîthia birîa bionthe biaakethi na birîa biatigeere miuundeene, na miuunda ya mîzabibû, na miuunda ya mîzeituni.

⁶Nabo Afilisti nî beendere kûmenya nûû wathithîtie mantû jau. Nabo baramenya atî nî Samusoni ûthithîtie ûntû bûû nîûntû mûthoni waawe ûrîa wa kuuma ntûûreene ya Timuna nî aanenkanîîre mwekûrû wa Samusoni aragûrwa nî mûthaka ûrîa waarûngamîrîte Samusoni mûranû. Tontû bûû, Afilisti bareeta baraîîthia mwekûrû ûu na baraîîthia nja ya îthe.

⁷Samusoni arabeera atîrî, “Nîkwîthîrwa ûu nîu bwathithia, naani ndîciîtia kiugaga atî ntîkira ntirîîrîîtie!”

⁸Samusoni arabaithûkîra ang'enti mono, arooraga antû babaingî mono baao. Nawe areeta gûkara gîkurunguune kîa maiga gatûûreene geetagwa Etamu.

⁹Nabo Afilisti nî beetîre baraamba kambî nthîgûrûûne ya Juda, na baraithûkîra ntûûra ya Lehi.

¹⁰Nabo antû ba Juda barabooria atîrî, “Nîkî ûntû bweja gûtwithûkîra?” Nabo Afilisti barabacokeria atîrî, “Twîjîte kûgwata Samusoni nîkenda tûmûthithîria ta ûrîa aathithîîrie antû beetû.”

¹¹Rîu antû ngiri ithatû ba Juda bareeta gikurunguune kîa iiga gatûûreene ka Etamu. Barooria Samusoni atîrî, “Ka-ûtiijî atî Afilisti nîbo batwathaga? Nîatîa îndî ûjû watûthithîria?” Nawe arabacokeria atîrî, “Ndîrabathithîîrie o ta ûrîa baanthithîîrie.”

¹²Nabo baramwîra atîrî, “Ga tweeja gûkûgwata nîkenda tûkûnenkanîra kîrî bo.” Samusoni nawe arabeera atîrî, “Nciîtîrieni atî bûtîmbûraga bwingwa.”

¹³Nabo baramwîra atîrî, “Tûtîkûûraga. Tûrîkûtheeka akî, twîte tûkûnenkanîre kîrî bo.” Nabo baramûtheeka na mîkanda îîrî îmîeru baramuumagaria gikurunguune.

¹⁴Rîrîa Samusoni aakinyîre ntûûreene ya Lehi, Afilisti nî boogiîre beetîte kîrî we bakîmûrîngagîra gîtuma. O rîo Roho wa MWATHANI aramwîjîra aramwîkîra inya, Samusoni aragiitanga mîkanda îrîa aatheeki nayo njara.

¹⁵Samusoni arategatega aroona rûkambaatî rwa ntigiri yaakuîte îgiita rîtî kûraaja. Nawe ararwoja, arooraga antû ngiri îmwe naru.

¹⁶Tontû bûû, Samusoni araina akiugaga atîrî, “Mbûragîte antû ngiri na rûkambaatî rwa ntigiri. Ndaabarûûndanîîra ithûmba na rûthîa rwa ntigiri!”

¹⁷Samusoni akûthiria kwina arata rûkambaatî rûu rwa ntigiri. Au rûkambaatî rwagwîre kûreetwa Ramathilehi.[2]

¹⁸Samusoni nî aaigîrue nyoonta mono. Arakaîra MWATHANI aramwîra atîrî, “Nîgwe ûmpeete ûûmbani ni nthûûmba yaaku. Nandî nkooragwa nî nyoonta na ngwatwe nî Afilisti batîîtîkîtie Mûrungu?”

¹⁹Mûrungu aratûma rûûjî ruuma nthîgûrû, o au Lehi. Samusoni aranyua rûûjî araigua bwega. Nakîo kîthima kîu kîreetwa Enihakore.[3] Nakîo kîthima kîu kîrî ntûûreene ya Lehi mwanka naarua tûrî.

²⁰Samusoni aatongeererie Israeli mîaka mîrongo îîrî îgiita rîu Afilisti baathaga nthîgûrû ya Israeli.