Read KIMERU BIBLE PROTESTANT EDITION Agam 16 Bible Online

Agam 16 - KIMERU BIBLE PROTESTANT EDITION bible

Agam 16

¹Ntukû îmwe, Samusoni nî eetîre ntûûra ya Gaza, nawe aroona mûmaraya areeta kûraara kwaawe.

²Nabo antû ba Gaza nî baamenyere atî Samusoni arî ntûûreene baracîgîîria antû au, bararaara bakabîte ûtukû bunthe mpingîroone ya ntûûra, bakiri ki. Nabo baaugaga atîrî, “Ga tûkabe mwanka rûkîîrî nîkenda ookîîra tûmûûraga.”

³Îndî Samusoni aamamîre mwanka ûtukû gatîgatî. Arookîîra areeta aragwata mpingîro ya ntûûra aramîkûûra yonthe amwe na itugî biaayo na mîbacho yaayo. Nawe arabikamata arabiikia îgûrû rîa karîma karîa keerekerete ntûûra ya Heburoni.

⁴Nyûmeene, Samusoni eendanîre na mûka weetagwa Delila waatwîre kîguuruune kîa Soreki.

⁵Nabo atongeeria ba Afilisti nî beetîre kîrî mûka ûu baramwîra atîrî, “Ciendithie kîrî we nîkenda ûmenya nikû înya yaawe nyiingî ûu yuumaga. Ningî ûmenye ûrîa tûûmbîkia kûmûgwata, tûkamûtheeka, tûkamûûmba buru. Naatuî o ûmwe weetû agaakûnenkera fetha ngiri îmwe na îgana.”

⁶Delila areera Samusoni atîrî, “Itû Mbîra, nîkû ûritîte inya yaaku înene ûjû? Nîatîa muntû oomba gûkûtheeka mwanka ûkaaga inya?”

⁷Samusoni aramûcokeria atîrî, “Nkëeja kûtheekwa na ndigi mûgwanja ta irîa ikûmaga ûta, îndî itînyaari, ndathira inya ta antû bangî.”

⁸Atongeeria bau ba Afilisti bararetera Delila ndigi mûgwanja ta irîa ikûmaga ûta îtînyaari. Delila aratheeka Samusoni nacio.

⁹Delila nî aithîte arûme kanyomba kangî. Aracoka areeta Samusoni na inya arauga atîrî, “Samusoni! Afilisti nî beejîte!” Îndî Samusoni aragiitanga ndigi îu o ta ûrîa karûrigi ka nguû gatuîkaga kaaringithua nî mwanki. Nabo batoomba kûmenya nîkû inya yaawe yumaga.

¹⁰Delila areera Samusoni atîrî, “Ûûgwe nîka ûgûmpaîria. Ûtîrambîîraga ûûma. Ndakwerenca mbîîra ûrîa muntû oombîkia gûkûtheeka.”

¹¹Samusoni aramûcokeria atîrî, “Nkëeja kûtheekwa na mîkanda îmîeru îtaatumîrwa ndaathira inya o ta antû bangî.”

¹²Delila aracwaa mîkanda îmîerû, aramûtheeka nayo. Aracoka aramwîta na kajû arauga atîrî, “Samusoni! Afilisti nî beejîte!” Îndî Samusoni aragiitanga mîkanda îîu o ta karûrigi ka nguû. Nabo arûme nî baarî kanyomba kangî.

¹³Ningî Delila areera Samusoni atîrî, “Mwanka nandî ûtîratiga gûmpaîria. O ûtîkûmbîîra bwa ûûma. Mbîîra ûrîa muntû oomba gûkûtheeka.” Samusoni aramwîra atîrî, “Këeja kwîînda mûtuundu jwaakwa mîîndo mûgwanja ikaagwatana, na ûkajûkaba na gîkabi kîa mûtuundu, nî ka nthira inya o ta antû bangî.”

¹⁴Tontû bûû, Samusoni amami, Delila nî aaîndanîrie mûtuundu jwa Samusoni mîîndo mûgwanja na aramûkaba na gîkabi kîa mûtuundu. Aracoka areeta Samusoni na inya na arauga “Samusoni, Afilisti nî beejîte!” Nawe arookîîra, ararita gîkabi kîrîa gîaakabîte mûtuundu jwaawe.

¹⁵Delila nî eerîre Samusoni atîrî, “Nîkî ûntû ûmbîîraga atî nî ûmpendeete o rîrîa ûtîmpendeete? Gwe nî ûpaîîrîîtie maita jathatû, na kinya nandî ûtaambîîra kûrîa inya yaaku yuumaga!”

¹⁶Delila arakara akîmûûragia ûntû bûu ntukû cionthe mwanka Samusoni aranoga nî gûkurungwa.

¹⁷Mûthieene Samusoni aramwîra ûûma bungwa atîrî, “Ûûni nteenjwa mûtwe jwaakwa, kuuma gûciarwa nîûntû nî mbathûrîri Mûrungu ta Mûnaziri. Nkëeja kwenjwa mûtuundu nthira inya ngakara o ta antû bangî.”

¹⁸Rîrîa Delila aamenyere atî Samusoni akûmwîra ûûma bungwa, nî aatûmanîîre atongeeria ba Afilisti arauga atîrî, “Njûûni rîngî rîmwe akî, nîûntû nandî akûmbîîra ûûma bungwa.” Nabo bareeta kîrî we bakamatîte mbeecha irîa baamwîrîrîte.

¹⁹Delila aratûma Samusoni amama bieroone biaawe. Aracoka areeta muntû ûmwe, aramwîra amwenje mîîndo îrîa mûgwanja ya mûtuundu jwa Samusoni. Rîu Delila arambîrîria kûthangîkia Samusoni nîûntû inya yaawe nî yaarî îkûthira.

²⁰Delila aracoka areetana na kajû arauga, “Samusoni, Afilisti nî beejîte!” Samusoni arookîîra akîthûgaanagia atî akaithonokia eete o ta ûrîa eetaga. Îndî ataijî atî MWATHANI nî aarî akûmwîrûkîra.

²¹Nabo Afilisti nî baamûgwaatîre baramûkûûra meetho. Baramwiikia ntûûreene Gaza bamûtheekeete na nyororo cia îturutia. Ningî baratua kûmûritithagia ngûgî ya kûthiaa na kîthii kîrîa kîaarî ncheera.

²²Îndî mûtuundu jwaawe jûrambîrîria gûkûra kaîrî.

²³Nabo atongeeria ba Afilisti nî boothûranîre nîkenda bakûngwîra ûûmbani na baritîra mûrungu jwaao taju Dagoni kîgongwana. Nabo bainaga bakiugaga atîrî, “Mûrungu jweetû nîju jûtûmîte tûûmba mûnthû weetû Samusoni!”

²⁴Nakîo kîrîndî kîamwona kîrakaatha mûrungu jwaao gîkiugaga atîrî, “Mûrungu jweetû nîjû jûtûmîte tûûmba mûnthû weetû, ûrîa ûrathangîkagia nthî yeetû na kûûraga antû beetû babaingî.”

²⁵Rîrîa baagwîrîrue mono, nî baaugîre ûjû, “Îteeni Samusoni eeje atûthithîrie matinda.” Samusoni araumagarua ncheera, areeta arathithia matinda. Nabo baramûrûngamia gatîgatî ka itugî bia kîrombero.

²⁶Samusoni areera muntû ûrîa waamûgweete njara atîrî, “Reka ndingithie itugî birîa bitiirîte kîrombero ndiitiiranie nabio.”

²⁷Nakîo kîrombero kîu nî kîojûri antû. Atongeeria ba Afilisti kinya bo nî baarî ku. Îgûrûgûrû rîa kîûrû kîu kwaarî na antû ngiri ithatû, barîa beetîte kwona Samusoni akîthithia matinda.

²⁸Nîrîo Samusoni arombere MWATHANI arauga atîrî, “Itû MWATHANI Mûrungu, ndirikana. Ndakûromba mpa inya rîrî rîonka nîkenda ndiirîîria kîrî Afilisti nîûntû bwa gûnkûûra meetho.”

²⁹Samusoni aragwata itugî bia gatîgatî bio-biîrî birîa biatiirîte kîrombero. Nawe araciigîkania nabio na inya agwete o gîtugî na njara îmwe.

³⁰Samusoni arauga atîrî, “Nî kaaba ngakuujanîria amwe na Afilisti!” Aratiindîka itugî biu na inya yonthe, nakîo kîrombero kîu kîrakoboka kîragwîra atongeeria na antû bonthe barîa baarî kû. Nabo antû barîa Samusoni ooragîre agîkua nîbo baarî babaingî nkûrûki ya barîa ooragîte arî mwoyo.

³¹Nabo ataana ba ng'ina na ndûgû ciaao bareeta barajûkia mwîrî jwaawe bareeta barajûthika gatîgatî ga ntûûra ya Zora na ntûûra ya Eshitaoli mbîrîreene ya îthe Manoa. Samusoni atongeererie Israeli mîaka mîrongo îîrî.