Read KIMERU BIBLE PROTESTANT EDITION Agam 17 Bible Online

Agam 17 - KIMERU BIBLE PROTESTANT EDITION bible

Agam 17

¹Nî kwaarî na muntû ûmwe weetagwa Mika watûûraga nthûgûrû ya irîma ya Efuraimu.

²Areera ng'ina atîrî, “Nî ndaaigîrue ûkîrumana nîûntû bwa fetha ngiri na îgana rîmwe irîa ciaiîrwe. Nandî irî aja. Nî ni ndaiîte cio.” Ng'ina aramwîra atîrî, “MWATHANI arokûtharima mwana waakwa!”

³Nawe aracokeria ng'ina fetha iu ngiri na îgana rîmwe cionthe. Nawe ng'ina arauga atîrî, “Nkaaritîra MWATHANI fetha îîu ciume njareene ciaakwa nîkenda mûtaana waakwa atîgwatwa nî kîrumi.” Arainenkanîra kîrî mûtaana waawe nîkenda athithia nacio mûrungu jwa mûng'uanano jwa kwaja na jwa yûmba.

⁴Tontû bûû, rîrîa Mika aacokerie ng'ina fetha iu, ng'ina nî aanenkeere mûturi fetha iu nîkenda athithia mûrungu jwa mûng'uanano jwa yûmba. Ningî nî aathithîrie mûrungu jwa mûng'uanano jwa kwaja. Mîrungu îîu ya mîng'uanano îreekwa nyomba ya Mika.

⁵Mika nî aarî na kîrombero nja yaawe. Ningî nî aathithîtie mîrungu ya mûng'uanano na nî aaeethetie mûtaana waawe ûmwe mûthînjîri-mûrungu.

⁶ Îgiiteene rîu gûtaarî na mûnene Israeli. O muntû aathithagia ûrîa akwenda.

⁷Îgiita rîu nî kwaarî na mûthaka ûmwe wa mwîrîga jwa Juda, nawe aarî Mûlawi na aatûûraga Bethlehemu.

⁸Arathaama kuuma ntûûreene Bethlehemu areeta gûcwaa gûntû kûngî gwa gûtûûra. Nawe areeta arakinya nja ya Mika nthîgûrûûne ya irîma ya Efuraimu.

⁹Mika aramûûria atîrî, “Nîkû uumîte?” Mûthaka ûu nawe aramûcokeria aramwîra, “Ndî Mûlawi kuuma ntûûreene ya Bethlehemu nthîgûrû ya Juda, na nîka ngûcwaa gûntû gwa gûtûûra.”

¹⁰Mika aramwîra atîrî, “Kara aja gwaakwa ûmpeejage kîrîra na wee mûthînjîri-Mûrungu waakwa. Naani ngaakweejaga fetha îkûmi o mwaka. Ningî ngakweejaga nguû, na biakûrîa.”

¹¹Mûthaka ûu Mûlawi areetîkîîria gûkara nja ya Mika. Mûlawi ûu araa mûtaana wa Mika.

¹²Mika aramweethia mûthînjîri-Mûrungu waawe, nawe Mûlawi ûu aratûûra kwa Mika.

¹³Mika arauga atîrî, “Rîu nî mbijî MWATHANI akaantharima nîûntû ndî na mûthînjîri-Mûrungu waakwa Mûlawi!”