Read KIMERU BIBLE PROTESTANT EDITION Agam 18 Bible Online

Agam 18 - KIMERU BIBLE PROTESTANT EDITION bible

Agam 18

¹Mbere ya Israeli îîthîrwa îrî na mûnene, antû ba Mwîrîga jwa Dani nî baacwaga gûntû gwa gûtûûra nîûntû nthîgûrû ya Israeli îtaarî îkûgaanua na mîîrîga.

²Tontû bûû, antû ba mwîrîga jwa Dani nî baatûmîre antû bataano kuuma ntûûreene ya Zora na Eshitaoli nîkenda beeta gûcûnkûûna nthîgûrû. Barabeera atîrî, “Îteeni bûgacûûnkûûne nthîgûrû.” Nabo bareeta barakinya nja ya Mika îrîa yaarî nthîgûrûûne ya irîma ya Efuraimu. Nabo bararaara ku.

³Barî akuî na nyomba ya Mika, nî baaigîrue mûgambo jwa mûthaka ûrîa Mûlawi barajûmenya. Bareeta baramûûria atîrî, “Nûû ûkûreetete gûkû? Nîatîa ûkûthithia gûkû?”

⁴Nawe arabacokeria atîrî, “Nî Mika ûmpandîkîte ja mûthînjîri-mûrungu waawe.”

⁵Nabo baramwîra atîrî, “Itû twakwerenca tûûrîrie Mûrungu këethîra rûgendo rweetû rûkeethîrwa rûrî na umithio.”

⁶Mûthînjîri-mûrungu ûu arabeera atîrî, “Îteeni bwega! MWATHANI akabûmenyeera rûgendoone.”

⁷Tontû bûû, antû bau bo-bataano barauma au bareeta barakinya ntûûreene ya Laishi. Nabo baroona atî antû ba gûntû kûu batwîre kiindajî ta antû ba Sidoni; barî na thîîrî na batî na mûruru. Ningî nî baathinyaarîte mono na gûtî gîntû baagaga. Îndî baatûûraga kûraaja na antû ba Sidoni na bataarî na ngwatanîro na antû bangî noo barîkû.

⁸Rîrîa baacokere Zora na ya Eshitaoli, antû baao nî baaboorîrie atîrî, “Nîatîa bûroonere?”

⁹Nabo barabeera, “Ithuranîreni twîte tûkaithûkîre antû ba ntûûra ya Laishi. Nîkwîthîrwa tûkwona nthîgûrû nî înjega na nî înoru mono! Nîmbi îngî bweteereete? Bûgákarakara twîteeni tûmîtae.

¹⁰Bweeta, bûkeethîra antû batiithuranîrîte nîûntû bwa ndwaa. Nayo nthîgûrû nî îmbariî na îrî na into bionthe birîa muntû eendaga. Mûrungu nî abweete yo!”

¹¹Nabo antû magana jatantatû, ba mwîrîga jwa Dani nî baithuranîîre nîûntû bwa ndwaa barauma ntûûreene ya Zora na ya Ashitaoli,

¹²bareeta baraamba kambî akuî na ntûûra ya Kiriathi-jearimu bwa rûgûrû, îrîa îrî nthîgûrûûne ya Juda. Nîkîo gîtûmi antû au no gwîtagwa Mahane-dani[4] kinya naarua tûrî.

¹³Barauma au bareeta barakinya nja ya Mika îrîa yaarî nthîgûruûne ya irîma ya Efuraimu.

¹⁴Antû barîa bataano baatûmi gûcûûnkûûna nthî îrîa yaathiûrûkîrîîte ntûûra ya Laishi bareera bau bangî atîrî, “Nî bwijî atî ndeene ya nyomba îmwe ya iji kûrî na mûrungu jwa mûng'uanano jwa kwaja jûgemetue na fetha? Ningî kûrî na tûmîrungu tûngî na nguû ya mûthînjîri-mûrungu? Nîatîa nandî bûkwenda tûthithia?”

¹⁵Nabo baraaûkîra nyomba ya Mika kûrîa mûthaka ûrîa Mûlawi aakaraga, baramûûria ûrîa atwîre.

¹⁶Antû ba mwîrîga jwa Dani barîa magana jatantatû barîa baithuranîrîte nîûntû ba ndwaa nî baarûngi mpingîroone.

¹⁷Nabo antû bau bataano baatûmi beeta gûcûnkûûna nî baakûrûkîre nyomba bararita mûrungu jwa mûng'uanano jwa kwaja na nguû ya mûthînjîri-mûrungu, na mûrungu jwa mûng'uanano jwa yûmba, na tûmîrungu tûngî twa mîng'uanano. Nawe mûthînjîri-mûrungu ûrîa Mûlawi nî aarûngami au mpingîroone akîaragia na antû barîa magana jatantatû.

¹⁸Rîrîa antû bau baakûrûkîre nyomba ya Mika kûrita mîrungu îîu ya mîng'uanano mûthînjîri-Mûrungu ûu Mûlawi arabooria atîrî, “Nîatîa bûkûthithia?”

¹⁹Nabo baramwîra atîrî, “Kira ki! Ûkauga noo atîa. Tûthingate wee mûthînjîri-mûrungu weetû na ûtweejage kîrîra. Tî kaaba kwaa mûthînjîri-Mûrungu wa mwîrîga jwa Israeli junthe antû akwaa mûthînjîri-mûrungu wa nja ya muntû ûmwe?”

²⁰Rîu mûthînjîri-Mûrungu ûu aragwîrua mono. Arajûkia mîrungu îîu ya mîng'uanano arabathingata.

²¹Nabo antû ba mwîrîga jwa Dani baragarûka barambîrîria rûgendo rwa kwaana, barî na aana ba Mika, na ndîîthia na into birîa baarî nabio bireetaga birî mbere.

²²Bagwîta kûraaja kuuma nja ya Mika, antû barîa baatûûraga akuî na nja ya Mika nî boothûranîre beeti nî Mika nîkenda bamûteethia kwonokia into biaawe. Nabo bareeta baragwatagwata antû bau ba mwîrîga jwa Dani.

²³Ningî nî beetîre antû ba mwîrîga jwa Dani na kajû, nabo antû ba mwîrîga jwa Dani baraciugûra barooria Mika atîrî, “Nîatîa kûrî tontû weeja na antû babaingî ûjû?”

²⁴Mika arabooria atîrî, “Nîatîa bûkûmbûûria na bûkîmenyaga nî bûjûkîrie mûthînjîri-mûrungu waakwa na mîrungu îrîa nthithîtie? Bûriuga ntigi na mbi?”

²⁵Nabo antû ba mwîrîga jwa Dani baramwîra atîrî, “Kirîîra au, antû baba batîkeeje gûkwigua bathûûra bakûthiria, ûûgwe na antû ba nja yaaku.”

²⁶Nyuma ya kûmwîra ûu bareeta na mbere na rûgendo rwaao. Mika aroona antû bau baarî na inya na atîboomba. Tontû bûu araana.

²⁷Nyuma ya antû ba mwîrîga jwa Dani kûjûkia into birîa Mika aathithîtie amwe na mûthînjîri-mûrungu waawe, nî beetîre barakinya ntûûreene ya Laishi. Kûu, nî beethîîre antû barî kiindajî na batiithuranîrîte nîûntû bwa ndwaa. Nabo antû ba Dani barooraga antû ba ntûûra îîu na baraîîthia ntûûra.

²⁸Nabo antû ba ntûûra îîu batoonere wa kûbateethia nîûntû ntûûra yaarî kûraaja na ntûûra ya Sidoni. Ningî antû ba ntûûra îîu ya Laishi bataarî na ngwatanîro na antû bangî noo barîkû. Bo baakîte ntûûra yaao mûgwanthîîne jwa Bethirehobu. Nabo antû ba mwîrîga jwa Dani baraaka ntûûra îîu kaîrî baratûûra ku.

²⁹Ningî baragarûra riîtwa rîa ntûûra îratiga gwîtagwa Laishi îratua gwîtagwa Dani, o ta ûrîa kîûjûjû kîaao ta kîo mûtaana wa Jakubu gîeetagwa.

³⁰Nabo antû bau ba mwîrîga jwa Dani nî beekîre mûrungu jwa mûng'uanano jwa kwaja kûu ntûûreene nîkenda bajûthaathayia. Jonathani, mûtaana wa Gerishomu, nawe Gerishoni mûtaana wa Musa, nîwe waatwîre arî mûthînjîri-Mûrungu wa mwîrîga jwa Dani. Nchiarwa ciaawe nî cieetîre na mbere kwaa athînjîri-mûrungu mwîrîgeene jwa Dani mwanka rîrîa Israeli yaaikîrue kîthamîrioone.

³¹Naju mûrungu jwa mûng'uanano jûrîa Mika aathithîtie jwa kwaja nî jwaakarîre ku îgiita rîonthe rîrîa Mûrungu aathaathagîrua Shilo.