Read KIMERU BIBLE PROTESTANT EDITION Agam 19 Bible Online

Agam 19 - KIMERU BIBLE PROTESTANT EDITION bible

Agam 19

¹Mbere ya Israeli îîthîrwa îrî na mûnene, nî kwaarî na Mûlawi ûmwe waatwîre nthîgûrûûne ya irîma ya Efuraimu. Nî aajûkîrie mûka wa gwîka kuuma ntûûreene ya Bethlehemu ndeene ya Juda.

²Îndî mûka ûu arathûûra mûkûrû waawe na araana kwa îthe ntûûreene ya Bethlehemu kûu Juda. Nawe arakara nao mîeri îna.

³Mûlawi ûu nî eetîre kûmwarîria nîkenda mûka wa gwîka ûu acoka kwaawe. Mûlawi ûu nî eetanîrie na nthûûmba yaawe na baarî na ntigiri ijîîrî. Nabo bakinya kwa ba mwarî, îthe wa mwarî nî aabagwatîre ûgeni agwîrîîtue mono.

⁴Îthe wa mwarî nawe ateendaga Mûlawi ûu eeta. Tontû bûû, barakara ntukû ithatû bakîrîîjaga na kûnyua.

⁵Ntukû ya inya rûkîîrî barookîîra kainda baraithuranîra nîkenda beeta. Îndî mûthoni wa Mûlawi ûu aramwîra atîrî, “Ambeni bûrîe rîu bwîte.”

⁶Nabo antû bau bobaîrî barakara nthî kûrîa na kûnyua. Îthe wa mwarî areera Mûlawi atîrî, “Raara naarua akî, naagwe ûraare ûgwîrîîtue.”

⁷Mûlawi arookîîra nîkenda eeta, îndî îthe wa mwarî aramûkinyîîria araraara.

⁸Ntukû ya ithaano barookîîra kainda nîkenda beeta. Îthe wa mwarî aramwîra atîrî, “Ambeni bûrîe rîu bwîte gwakeejakeeja.” Nabo bobaîrî barakara nthî kûrîa.

⁹Rîrîa Mûlawi ûu, na mûka wa gwîka waawe, na nthûûmba yaawe bookîrîîre nîkenda beeta, îthe wa mwarî aramwîra atîrî, “Kûrî akuî gûtuka, muundu jwîja. Tontû bûû, raareeni bûgwîrîtue. Rûûjû bûrooke gûkîîra kainda bwaane.”

¹⁰Îndî Mûlawi ûu ararega kûraara. Tontû bûû, aratandîka ntigiri arajûkia mûka wa gwîka waawe amwe na nthûûmba yaawe bareeta. Nabo nî beetîre beerekerete ntûûra ya Jebusi (tayo Jerusalemu).

¹¹Rîrîa baakinyîre akuî na Jebusi nî kwaarî akuî gûtuka. Nthûûmba îreera Mûlawi ûu atîrî, “Ga twaûkîre ntûûreene îîjî ya Ajebusi tûraarîîre ku.”

¹²Mûlawi aramîcokeria atîrî, “Tûtîaûkîra ntûûreene îtî ya antû ba Israeli. Tûrîkûrûka twîte mwanka Gibea.”

¹³Areera nthûûmba yaawe atîrî, “Twîtangeni twoone këethîra tûgaakinya noo ntûûreene ya Gibea kana ya Rama, tûraarîîre ku.”

¹⁴Tontû bûû, bareeta na mbere na rûgendo. Narîo riûa rîrathwa bagîkinya ntûûreene ya Gibea nthîgûrûûne ya mwîrîga jwa Benjamini.

¹⁵Nabo baraûkîra barakûrûka ntûûreene ya Gibea nîkenda baraara ku. Nabo barakara nthî kîaragoone gîa ntûûra nîûntû gûtî muntû waabaeere kîraaro nyomba yaawe.

¹⁶Barî o au, mûkûrû ûmwe nî eejîre ûgoro aumîte kûrita ngûgî muundeene. Nawe aarî mûgeni ntûûreene ya Gibea na aaumîte nthîgûrûûne ya irîma ya Efuraimu. Îndî antû ba Gibea baarî ba mwîrîga jwa Benjamini.

¹⁷Araciûkia meetho aroona mûgeni akari nthî kîaragoone gîa ntûûra. Aramûûria atîrî, “Nîkû uumîte na nîkû wîtîte?”

¹⁸Mûlawi aramwîra atîrî, “Ga tûgûkûrûkîte tuumîte ntûûreene ya Bethlehemu nthîgûrûûne ya Juda na twîtîte gûntû gûtîtûûri mono nthîgûrûûne ya irîma ya Efuraimu. Kûu nîku gweetû. Nandî nîka twagîte wa gûtûraaria.

¹⁹Tûrî na îria rîa kûng'ana rîa ntigiri cieetû, Ûûni na mûka wa gwîka waakwa, na nthûûmba yaakwa tûrî na biakûrîa na ndibei ya kûng'ana.”

²⁰Mûkûrû ûu arabeera atîrî, “Nî nkûbûgwata ûgeni nja yaakwa nîkenda bûtîkaraare kîaragoone. Birîa bionthe bûkeenda nkaabûnenkera.”

²¹Tontû bûû, areetania nabo nyomba yaawe na araa ntigiri îria. Nabo barathaamba magûrû na bararîa na baranyua.

²² Nabo bagwîrîtue o ûu, imaramari birauma ntûûreene bireeta birathiûrûka nyomba îîu. Nabio biaaringaringaga mwari bikiugaga, “Umagaria muntû ûu ûrî nyomba yaaku, nîkenda tûmûthengeera.”

²³Nawe mûkûrû ûu mwene nja araumagara kîrî bo arabeera atîrî, “Itû arî antû beetû! Bûkáthithieni ûntû bûbûthûûku ta bûu. Bûkáthithîrieni muntû ûûjû ûrî gwaakwa ûntû bûbûthûûku ta bûu.

²⁴Atîrî, ndî na mwarî karaiti, na mûka wa gwîka wa muntû ûûjû barî o. Rekeeni mbuumagarîrie bo bûbathengeere kana bûthithie nabo ûrîa bûkeenda. Îndî bûkáthithîria muntû ûûjû mantû jamathûûku ta jau.”

²⁵Antû bau nabo bararega kûmûthikîîra. Tontû bûû, muntû ûrîa Mûlawi arabaumagarîria mûka wa gwîka waawe. Nabo baramûthengeera ûtukû bunthe mwanka rûkîîrî. Nabo baramûrekeeria mbere ya gûkîa.

²⁶Gwakea mûka wa gwîka wa muntû ûu areeta aragwa nthî mwariine jwa nyomba îrîa mûkûrû waawe aarî. Mûka ûu arakara o mwanka kûragîa weerû.

²⁷Mûrûme wa mûka ûu nawe nî ookîrîîre rûkîîrî na akîrugûra mwari nîkenda eeta areethîra mûka wa gwîka waawe agwîte mwariine na njara itaambûrûki akîgeria gûkinyîra mûrango.

²⁸Mûlawi aramwîra atîrî, “Ûkîîra twîte.” Mûka nawe ataaragia. Mûlawi arajûkia mwîrî jwa mûka ûu arajûmamia îgûrû rîa ntigiri, aragwata rûgendo araana.

²⁹ Aagûkinya arakûrûka nyomba, arajûkia gachiû, aragiitanga mwîrî jwa mûka wa gwîka waawe ichunchî îkûmi na biîri. Arabinenkanîra kîrî mîîrîga yonthe îkûmi na îîrî ya Israeli; o mwîrîga gîchunchî kîmwe.

³⁰Nabo antû bonthe barîa boonere ûntû bûû barauga atîrî, “Ûntû ta bûbû bûtaakarîka kana bwoonekana kuuma rîrîa antû ba Israeli baaumîre Misri mwanka naarua tûrî. Tontû bûû, twaranîrieeni twoone ûrîa tûkathithia.”