Read KIMERU BIBLE PROTESTANT EDITION Agam 2 Bible Online

Agam 2 - KIMERU BIBLE PROTESTANT EDITION bible

Agam 2

¹Mûraîka wa MWATHANI nî aaumîre Giligali areeta Bokimu. Nawe areera Aisraeli ntûmwa ya Mûrungu yaaugaga atîrî, “Nî ndaabûritîre Misri ndîrabûreeta nthîgûrûûne îrîa ndeerîîrîte biûjûjû bieenu. Naani nî ndaabeerîre ûjû, ‘Ntîkorotiga kûûjûria kîrîkanîro kîrîa twekanîîre naabuî.

² Bûkórwekanîîra kîrîkanîro na atûûri ba nthîgûrû îîjî. No mwanka bûkoborange iritîro bia igongwana biaao.’ Îndî buî nî bûregeete kûmbathîkîra, bwathithia mantû jarîa jongwa ndaabûkaanîtie!

³Tontû bûû, nandî ndîbwîra atîrî, ntîbwîngîra antû baba babwebeera. Bo barîtûûra barî maitha jeenu, nayo mîrungu yaao yeejage kîgiitaria kîrî buî.”

⁴Rîrîa mûraîka wa MWATHANI aabeerîre mantû jau, antû ba Israeli bonthe nî baarîrîre na kajû gakanene.

⁵Antû au baagwîtîre Bokimu[1] Ningî nî baaritîîre MWATHANI kîgongwana antû au.

⁶Rîrîa Joshua aarekererie Aisraeli, nî beetîre rûgaiine rwaao, o muntû araigwatîra kîthaka ku.

⁷Nabo nî baatûûrîre baathîkîrîte MWATHANI ûtûûroone bwaao rîrîa rîonthe Joshua aarî mwoyo, na rîrîa rîonthe akûrû barîa baatigîrwe Joshua agûkua, barîa booneete mantû jamanene jarîa MWATHANI aathithîrîtie Aisraeli.

⁸Nayo nthûûmba ya MWATHANI Joshua mûtaana wa Nuni, nî aakuîre arî na ûkûrû bwa mîaka îgana rîmwe rî îkûmi (110).

⁹ Arathikwa kîthakeene kîaawe ntûûreene ya Timunathi-heresi, îrîa yaarî nthîgûrû ya irîma ya Efuraimu, bwa ûrîo bwa kîrîma kîa Gaashi.

¹⁰Nayo nthukî îîu yonthe nî yaakuîre, kûreethîrwa kûrî na nthukî îngî ta yo, îrîa itaatindanagîra na MWATHANI kana itindanîra na mantû jamanene jarîa aathithîrîtie Israeli.

¹¹Antû ba Israeli nî baathithîrie mantû jamathûûku meethoone ja MWATHANI barambîrîria kûrombaga mûrungu jwa mûng'uanano jwa Baali.

¹²Nabo nî bautatîîre MWATHANI, Mûrungu wa biûjûjû biaao, ûrîa waabaritîre nthîgûrû ya Misri. Rîu barathingata na baratua kûthaathayia mîrungu ya antû barîa baatûûranagia nabo, barathûûria MWATHANI mono.

¹³Nî beerûkîîre MWATHANI baratua kûrombaga mîrungu ya mîng'uanano ya Baali na ya Ashitarothi.

¹⁴MWATHANI nî aathûûrîrue nî Israeli arabatiganîîria kîrî aithûki, barataa into. Ningî arabarekeeria baroombwa nî anthû baao ba kuuma nteere cionthe, nabo batacoka kwirikîria kaîrî kîrî anthû baao.

¹⁵Îgiita rîonthe rîrîa beetaga kwithûka, MWATHANI nî abarekagîîria bakoona thîîna o ta ûrîa abeerîte. Nabo barathîîna barainya buru.

¹⁶Rîu MWATHANI nî aaere Israeli agambi nabo baraboonokia kuuma kîrî maitha jaao.

¹⁷Îndî Aisraeli bataathîkîîre agambi bau. Bo nî bautatîîre MWATHANI barathingata, na bararomba mîrungu îngî. Nabo bararega kwathîkîra MWATHANI ta biûjûjû biaao birîa biaathîkagîra maathana ja MWATHANI.

¹⁸Narîo rîrîa rîonthe MWATHANI aabaeejaga mûgambi nî aamûteethagia ûtûûroone bwaawe bunthe kwonokia Aisraeli kuuma kîrî anthû baao. MWATHANI nî aabaigagîîrua kîaao, aigua gûkaya kwaao nîûntû bwa kûthangîkua na kwinyîîrua nî anthû baao.

¹⁹Îndî rî, o mûgambi aakua, Aisraeli nî batigagwa bakeeyia nkûrûki ya barîa baarî o mbere yaao. Ningî nî baathingataga na kûromba mîrungu îngî, na bakarega gûtigana na mîîtîre yaao îmîthûûku.

²⁰MWATHANI nî aathûûrîre nîbo mono arabeera atîrî, “Mûgongo jûjû nî jûregeete gwîka kîrîkanîro kîrîa ndeekanîîre na biûjûjû biaao. Nî jûregeete kûmbathîkîra.

²¹Tontû bûû, kuuma nandî ntîkorobeengîra mûgongo noo jûmwe jwa îrîa yaatigarîre mbere ya Joshua gûkûa.

²²Anthû bau nîbo ngaatumagîra kûgeria Aisraeli nîkenda mbona këethîra bakaambathîkagîra ta ûrîa biûjûjû biaao biaathithagia.”

²³MWATHANI nî aatiganîre na mîgongo îîu, ataamîîngîre o rîo yuuma nthîgûrûûne yaao, nîûntû ataamînenkanîîre kîrî Joshua.