Read KIMERU BIBLE PROTESTANT EDITION Agam 20 Bible Online

Agam 20 - KIMERU BIBLE PROTESTANT EDITION bible

Agam 20

¹Antû ba Israeli bonthe kuuma Dani bwa ûrîo mwanka Beerisheba bwa ûmotho, na gûkinya mwanka nthîgûrû ya Gileadi bwa gaiti baroothûrana bonthe ntûûreene ya Mizipa. Nakio kîûthûrano kîonthe kîaarî gîkundi kîmwe mbere ya MWATHANI.

²Nabo atongeeria bonthe ba mîîrîga ya Israeli nî baarî au antû ba Mûrungu boothûreene. Nabo baarî asikarî ba magûrû ngiri magana jana (400,000).

³Nabo antû ba mwîrîga jwa Benjamini nî baigîrue atî Aisraeli bangî nî baatirimeene ntûûreene ya Mizipa. Nabo Aisraeli bau boothûreene baroria Mûlawi ûu atîrî, “Twîre ûrîa ûthûûku bûbû bwathithîkîre.”

⁴Mûlawi ûrîa mwene mûka wa gwîka ûrîa wooragîrwe, arabeera atîrî, “Ûûni na mûka wa gwîka waakwa nî twaararîrîîre ntûûreene ya Gibea ya mwîrîga jwa Benjamini.

⁵Îndî antû ba Gibea bareeja kûmbithûkîra ûtukû. Baracîgîîria nyomba îrîa twaarî bakîendaga kûmbûraga. Ningî barajûkîa mûka waakwa wa gwîka baramûthengeera mwanka arakua.

⁶Nîkwîthîrwa antû bau nî baathithîrie ûntû bûbûthûûku na bwa nthoni nthîgûrûûne ya Israeli, ndîrajûkia mwîrî jwa mûka waakwa wa gwîka ndîrajûgiitanga ichunchî îkûmi na biîrî, ndîrabinenkanîra mîîrîgeene yonthe îkûmi na îîrî ya Israeli.

⁷Nandî rî, buî bwinthe barîa bûrî aja bûrî Aisraeli; ugeeni ûrîa tûkaathithia.”

⁸Nabo antû bonthe barauga bagwatanîrîte atîrî, “Gûtî kinya ûmwe weetû ûkaana kwaawe ëethîrwa atûûraga îemeene kana nyomba.

⁹Ûjû nîu tûkûthithia, tûrîringa kuura tûthuure barîa bageeta kwithûkîra ntûûra ya Gibea.

¹⁰O mwîrîga jwa Israeli jûkarita gîchunchî kîmwe kuuma kîrî îkûmi kîa antû baaju nîkenda bamathagîra antû bangî barîa bageeta kwithûkîra ntûûra ya Gibea, nîûntû bwa ûthûûku bûrîa bathithîtie ndeene ya Israeli.”

¹¹Tontû bûû, antû bonthe ba Israeli baroothûrana ntûûreene bagwatanîrîte nîkenda bakaithûkîra ntûûra ya Gibea.

¹²Nayo mîîrîga ya Israeli nî yatûmîre antû kunthe mwîrîgeene jwa Benjamini bakiuragia atîrî, “Nî ûthûûku bûng'ana atîa bûbû bûthithîtie?

¹³Nandî tûnenkereeni imaramari biu bia Gibea, tûbiûrage tweberie Israeli ûthûûku bûbû.” Îndî antû ba Benjamini bararega kûthikîîra Aisraeli bangî.

¹⁴Nabo antû ba mwîrîga jwa Benjamini barauma ntûûreene cionthe bareeta ntûûreene ya Gibea nîkenda barwaa na mîîrîga îngî ya Israeli.

¹⁵Kuuma ntûûreene iu ingî cia mwîrîga jwa Benjamini kûrauma njûûrî ya antû ngiri mîrongo îîrî na îthanthatû (26,000) baroongeera asikarî magana mûgwanja (700) ba ntûûra ya Gibea, barîa baathuuri ba kûrwaa.

¹⁶Ndene ya njûûrî yonthe nî kwaarî na antû magana mûgwanja (700) barîa baatumagîra njara ya kîmotho. Nabo barîîngî kûgera iiga na gîkûtha batîîngî gwaatia kinya rûchiûri rwa kîongo.

¹⁷Mîîrîga îîu îngî ya Israeli yaarî na njûûrî ya antû ngiri magana jana (400,000).

¹⁸Antû ba Israeli nî beetîre Betheli kûthaathayia Mûrungu. Nabo bararomba barooria atîrî, “Nî mwîrîga jûrîkû jûgatongeeria nîkenda twîta kwithûkîra antû ba mwîrîga jwa Benjamini?” MWATHANI arabacokeria atîrî, “Mwîrîga jwa Juda nîju jûgeeta jûrî mbere.”

¹⁹Tontû bûû, antû ba Israeli bararooka gûûkîîra bareeta baracîgîîria ntûûra Gibea.

²⁰Bareeta baraibangania ûrîa bakaithûkîra antû ba mwîrîga jwa Benjamini kûu Gibea.

²¹Nabo antû ba mwîrîga jwa Benjamini barauma ntûûreene ya Gibea barooraga antû ba mîîrîga îngî ya Israeli, antû ngiri mîrongo îîrî na ijîîrî (22,000).

²²Îndî njûûrî ya mîîrîga ya Israeli îreekanîra ûchamba kaîrî îreeta kwibanga ndweene o arîa yaaibangîte ntukû ya mbere.

²³Mbere ya bathithia ûu, antû ba mîîrîga îîu îngî ya Israeli nî baarî bakûromba MWATHANI mwanka ûgoro baramûûria atîrî, “Twîte o kaîrî tûkarwee na antû ba mwîrîga jwa Benjamini kinya këethîra nî antû ba ndûgû cieetû?” MWATHANI arabeetîkîîria.

²⁴Tontû bûû, antû ba mîîrîga îîu îngî ya Israeli barakuîrîîria ntûûra ya antû ba mwîrîga jwa Benjamini ntukû ya ijîîrî.

²⁵Nabo antû ba mwîrîga jwa Benjamini barauma ntûûreene ya Gibea ntukû ya ijîîrî, barooraga antû ba mîîrîga îîu îngî ya Israeli antû ngiri îkûmi na inyaanya (18,000).

²⁶Antû ba Israeli bonthe, nî beetîre ntûûreene ya Betheli baraciata kûrîa bararitîra MWATHANI igongwana bia gwakîîria na bia thîîrî baithikîîrîte kuuma rûkîîrî mwanka ûgoro.

²⁷Nabo antû ba Israeli nî boorîrie mantû kîrî MWATHANI. (Îgiiteene rîu Îthandûkû rîa kîrîkanîro kîa Mûrungu rîatûûraga Betheli.)

²⁸Fineasi mûtaana wa Eleazari na Eleazari mûtaana wa Aaroni, nîwe waamenyagîîra Îthandûkû rîa kîrîkanîro kîa Mûrungu. Nabo antû bau ba Israeli barooria MWATHANI atîrî, “Twîte kaîrî tûkarwee na antû ba ndûgû cieetû ba mwîrîga jwa Benjamini, kana tûtigane nabo?” MWATHANI arabeera, “Îteeni bûkabaithûkîre nîûntû rûûjû nkaabanenkanîra kîrî buî bûboombe ndweene.”

²⁹Tontû bûû, antû ba mîîrîga îîu îngî ya Israeli bareeka antû bamwe ba njûûrî yaao baiciithîte nteere cionthe cia ntûûra ya Gibea.

³⁰Ntukû ya ithatû baraithûkîra njûûrî ya Benjamini o ta ûrîa baathithîtie ntukû cia mbere ijîîrî.

³¹Nabo antû ba mwîrîga jwa Benjamini nî baaumîre ntûûreene bareeta kûrwaa na antû ba mîîrîga îîu îngî ya Israeli. Îndî barakujîîrua baraumauma akuî na ntûûra bakîûragaga Aisraeli bau bangî. Nabo booragîîre antû mîrongo îthatû bieeniine na njîreene îrîa yeetaga ntûûreene ya Betheli na ya Gibea.

³²Antû ba mwîrîga jwa Benjamini baaugaga atîrî, “Tûkûboomba o ta mbere!” Îndî antû ba mîîrîga îîu îngî ya Israeli nîka baaugîîte atîrî, “Tûrîbakujîîria tûbaritarite ntûûreene tûbaikie njîreene.”

³³Nabo antû babaingî ba Israeli baracoka nyuma baraibangania barî ntûûreene ya Baali-tamari. Nabo antû bangî ba njûûrî ya mîîrîga îîu îngî ya Israeli, barîa baiciithîte nteere cia ntûûra ya Gibea baraumîra baraithûkîra ntûûra ya Gibea kuuma kûrîa baiciithîte maigeene jarîa jaathiûrûkîrîte ntûûra.

³⁴Nabo asikarî ngiri îkûmi (10,000) barîa bathuuri kuuma mîîrîgeene îîu îngî ya Israeli nî baaithûkîîre ntûûra ya Gibea. Nayo ndwaa îrang'eenta. Nabo antû ba mwîrîga jwa Benjamini bataamenyaga atî barî akuî kûthirua.

³⁵MWATHANI aranenkanîra njûûrî ya mwîrîga jwa Benjamini kîrî njûûrî ya mîîrîga îîu îngî ya Israeli. Barooragwa antû ngiri mîrongo îîrî na ithaano na îgana rîmwe (25,100) ntukû îîu.

³⁶Nîrîo antû ba mwîrîga jwa Benjamini baamenyere baakûûmbwa.

³⁷Njûûrî ya mîîrîga îîu îngî ya Israeli nî yoogîîre îraatonya ntûûreene ya Gibea îrooraga antû bonthe barîa baarî ku.

³⁸Njûûrî îrîa nene ya mîîrîga îîu îngî ya Israeli nî yaarîîkanîrîte na asikarî bau atî boona toogi îgiitia kuuma ntûûreene,

³⁹njûûrî îîu yaarî kîeniine îgarûke. Îgiita rîu asikarî ba mwîrîga jwa Benjamini nî baarî bakûûraga asikarî mîrongo îthatû (30) ba mîîrîga îîu îngî ya Israeli. Ningî baaciîraga atîrî, “Tûkaboomba ndweene o ta mbere!”

⁴⁰Rîrîa toogi yaambîrîîrie kuuma ntûûreene îrî rwano, njûûrî ya mwîrîga jwa Benjamini nî yaaciûgûrîre baragwatwa nî kîmako mono boona ntûûra yonthe îkîya.

⁴¹Nabo asikarî ba mîîrîga îîu îngî ya Israeli barabagarûkîra. Nabo asikarî ba mwîrîga jwa Benjamini baramaka mono boona atî nîka beetîte kûthirua.

⁴²Nabo antû ba mwîrîga jwa Benjamini baramatûka beerekerete bûûrîîne, îndî njûûrî ya Israeli îrîa nene na asikarî barîa baatigi baiciithîrîte ntûûra barabakirimanîria gatîgatî barabathiria buru.

⁴³Baacîgîrîîrie antû ba mwîrîga jwa Benjamini, bareengana nabo mwanka bwa gaiti ga ntûûra ya Gibea bakîbooraaga.

⁴⁴Asikarî ngiri îkûmi na inyaanya (18,000) ba mwîrîga jwa Benjamini barooragwa.

⁴⁵Bau bangî nabo baragarûka baramatûka bwa bûûrî mwanka Iigeene rîa Rimoni. Nabo asikarî ngiri ithaano ba mwîrîga jwa Benjamini barooragîrwa njîreene. Aisraeli ba mîîrîga îîu îngî bareengana na bau baatigeere mwanka Gidomu barooraga antû ngiri ijîîrî (2,000).

⁴⁶Asikarî barîa booragîrwe ba mwîrîga jwa Benjamini baarî ngiri mîrongo îîrî na ithaano (25,000).

⁴⁷Îndî asikarî magana jatantatû (600) nî boombîre kûmatûka bûûrîîne mwanka Iigeene rîa Rimoni. Barakara ku mîeri îna.

⁴⁸Nabo asikarî ba mîîrîga îîu îngî ya Aisraeli baragarûkîra antû bau bangî ba mwîrîga jwa Benjamini barabooraga bonthe; arûme, aka, na twaana, na kinya ndîîthia ciaao. Ningî baraîîthia ntûûra ciaao cionthe.