Read KIMERU BIBLE PROTESTANT EDITION Agam 21 Bible Online

Agam 21 - KIMERU BIBLE PROTESTANT EDITION bible

Agam 21

¹Rîrîa Aisraeli boothûranîte ntûûreene ya Mizipa nî baciîtîîrie MWATHANI barauga atîrî, “Gûtî muntû noo ûmwe weetû ûkeendia mwarî waawe mwîrîgeene jwa Benjamini.”

²Îndî ndwaa îkûthira, antû ba Israeli bareeta Betheli baratînda bakari mbere ya Mûrungu mwanka ûgoro baithikîîrîte bakîrîraga bakiugaga atîrî,

³“Itû MWATHANI Mûrungu wa Israeli! Nîmbi yatûma gûkara ûjû, atî naarua mwîrîga jûmwe jwa antû ba Israeli jûrî akuî kûthira?”

⁴Rûûneene, antû ba Israeli barookîîra rûkîîrî kainda, baraaka kîritîro kîa igongwana, na bararita kîgongwana kîa gwakîîria na kîa thîîrî.

⁵Nabo baroorania atîrî, “Nî muntû noo ûrîkû wa mîîrîga ya Israeli ûtîreeja kîûthûranoone kîa MWATHANI?” Nabo nî baarî bagûciîtia bauga no mwanka muntû ûrîa ûkaarega gwîta kîûthûranoone kîu ntûûreene ya Mizipa ooragwe.

⁶Ningî nî baaigîrîîrue mwîrîga jwa Benjamini kîaao barauga, atîrî, “Naarua Israeli îgûta mwîrîga jûmwe!

⁷Nîkwîthîrwa nî tûraciîtîtie kîrî MWATHANI twauga atî tûtîkorobaa aarî beetû rî, nandî nîatîa tûkûthithia nîkenda twonera barîa batigeere aka?”

⁸Nabo barooria atîrî, “Nî antû ba mwîrîga jûrîkû jwa Israeli baaregere kwîja kîûthûranoone kîa MWATHANI aja Mizipa?” Nabo baramenya atî gûtî muntû weeja kîûthûranoone kuuma Jabeshi-gileadi.

⁹Rîrîa asikarî baatarîrwe gûtoonekana muntû kinya ûmwe wa kuuma Jabeshi-gileadi.

¹⁰Tontû bûû, kîûthûrano kîu kîratûma asikarî ngiri îkûmi na ijîîrî (12,000) barabeera, “Îteeni bûûrage antû ba Jabeshi-gileadi bonthe; arûme na aka na twaana.

¹¹Bûûrage arûme bonthe na aka bonthe barîa baagûrwa.”

¹²Nabo bareethîra aarî karaiti magana jana kûu Jabeshi-gileadi bareeta nabo kambîîne kûu Shilo, nthîgûrû ya Kanaani.

¹³Nabo antû bonthe bau boothûranîte nî baatûmanîre kîrî antû ba mwîrîga jwa Benjamini barîa baarî iigeene rîa Rimoni batuma thîîrî nabo.

¹⁴Antû bau ba mwîrîga jwa Benjamini barauma iigeene rîa Rimoni. Antû bau bangî ba Israeli barabanenkera aarî bau ba kuuma Jabeshi-gileadi, îndî bataabang'anîre.

¹⁵Nabo antû ba mîîrîga îîu îngî ya Israeli nî baaigîrîirue antû ba mwîrîga jwa Benjamini kîaao, nîûntû MWATHANI nî atûmîte ngwatanîro îthûûka gatîgatî ka mîîrîga ya Israeli.

¹⁶Nabo akûrû ba mîîrîga îîu îngî ya Israeli barooria atîrî, “Nîkû tûkaaritîra bau batigeere aka nîûntû aka ba mwîrîga jwa Benjamini nî baraathirîrue?”

¹⁷Nabo nî baugaga no mwanka mwîrîga jwa Benjamini jûmenyerwe jûtîkathire. No mwanka jûcwîrwe ûrîa jûtîthira.

¹⁸“Îndî tuî tûtîûmba kûbaa aarî beetû baa aka baao, nîûntû nî twaciîtîîrie MWATHANI tûrauga, ‘Muntû ûrîa ûkaeejana mwarî waawe agûrwa nî antû ba mwîrîga jwa Benjamini arî na kîrumi.’”

¹⁹Mambura ja mwaka jarîa jathithagîrua Shilo nîûntû bwa MWATHANI jarî akuî! (Shilo nayo yaarî bwa ûrîo bwa ntûûra ya Betheli, na bwa ûmotho bwa ntûûra ya Lebona, na gaiti ka njîra îmbariî ya kuuma Betheli gwîta Shekemu.)

²⁰Bareera antû ba mwîrîga jwa Benjamini atîrî, “Îteeni bwiciithe miuundeene ya mîzabibû.

²¹Bûkare bûtegeete, bwoona aarî ba Shilo baumagarîte beejîte kwina îgiita rîa mambura, buumîre miuundeene ya mîzabibû, na o muntû aigwatîre mûka kuuma kîrî aarî ba ntûûra ya Shilo na aciaanîre nawe nthîgûrû ya Benjamini.

²²Beethe kana ataana ba ng'ina, bakëeja kûbûûria bûbeere, ‘Itû rekeeni tûkare nabo nîûntû tîka twabataîre kuuma kîrî buî îgiita rîa ndwaa. Tontû tîka bwaatweere bo, gûtî wîrane bûthûûkîtie.’”

²³Nabo antû ba Benjamini barathithia o ûu. O muntû araijûkîria mûka kuuma kîrî aini. Bareeta nabo mwanka nthî yaao baraaka ntûûra îrîa ciaamomorangi baratûûra ku.

²⁴Antû bangî ba Israeli kinya bo baraana o muntû mwîrîgeene jwaao na nja yaawe, na o muntû aracoka rûgaiine rwaawe.

²⁵ Narîo îgiita rîu gûtaarî na mûnene Israeli. O muntû aathithagia ûrîa akwenda.