Read KIMERU BIBLE PROTESTANT EDITION Agam 3 Bible Online

Agam 3 - KIMERU BIBLE PROTESTANT EDITION bible

Agam 3

¹MWATHANI nî aatîgarîîtie mîgongo ya gûtumîra kûgeria antû ba Israeli, barîa bonthe bataarî bakûrwaa ndwaa noo îrîkû Kanaani.

²MWATHANI aathithîtie ûu nîkenda aritana nthukî cia Israeli kûrwaa, irîa itaarî igwîta ndweene mbereene ciiritana kûrwaa.

³Nabo antû barîa baatigeere baarî athani barîa bataano ba Afilisti, na Akanaani bonthe, na Asidoni, na Ahivi barîa batûûraga kîrîmeene kîa Lebanoni; kuuma kîrîmeene kîa Baali-herimoni mwanka mpingîroone ya Hamathi.

⁴MWATHANI aatigarîrie antû bau nîkenda abaatumagîra kûgeria Aisraeli oona këethîra bakaathîkagîra maathana ja MWATHANI. MWATHANI anenkerete Musa Maathana jau nîûntû bwa antû ba Israeli.

⁵Tontû bûû, Aisraeli nî baatûûrîre amwe na Akanaani, na Ahiti, na Amori, na Aperizi, na Ahivi, na Ajebusi.

⁶Nabo nî baagûragîra nthaka ciaao aarî ba Kanaani, na bakaeejana aarî baao bongwa bakagûrwa nî nthaka cia Kanaani. Ningî Aisraeli nî baathaathayia mîrungu ya Akanaani.

⁷Nabo Aisraeli nî baathithîrie mantû jamathûûku meethoone ja MWATHANI baroorîrua nî MWATHANI barambîrîîria kûthaathayia mîrungu ya Baali na ya Ashera.

⁸Tontû bûû, MWATHANI nî aathûûrîrue mono nî Aisraeli. Nî aabanenkanîîre kîrî Kushani-rishathaimu mûnene wa Mesopotamia, arabaithûkîra na arabaatha mîaka înaana.

⁹Nabo Aisraeli nî baakaîîre MWATHANI, nawe arabathuurîra Othinieli aboonokia. Othinieli aarî mûtaana wa Kenazi. Kenazi aarî mûtaana wa ng'ina ûrîa mûnini wa Kalebu.

¹⁰Rîu nîrîo oojûrîrwe nî Roho wa MWATHANI, nawe araa mûgambi wa Aisraeli. Nî aaithûkîîre Kushani-rishathaimu mûnene wa Mesopotamia, aramûûmba ndweene, nîûntû MWATHANI nî aamûteethagia.

¹¹Nayo nthîgûrû ya Israeli nî yaakarîre kiindajî mîaka mîrongo îna. Rîu Othinieli mûtaana wa Kenazi arakua.

¹²Nabo Aisraeli o kaîrî nî baathithîrie mantû jamathûûku meethoone ja MWATHANI. Tontû bûû, MWATHANI areekîra Egiloni, mûnene wa Moabu, inya ya kwithûkîra Israeli.

¹³Rîu Egiloni aragwatanîra na Aamoni, na Amaleki, baraithûkîra Israeli baramîûmba. Barataa ntûûra ya Mîkîîndû îrîa yeetagwa Jeriko.

¹⁴Nabo Aisraeli nî baathîrwe nî Egiloni mîaka îkûmi na înaana.

¹⁵Nabo Aisraeli nî baakaîîre MWATHANI o kaîrî, nawe MWATHANI arabathuurîra Ehudi aboonokia. Ehudi aarî mûtaana wa Gera wa mwîrîga jwa Benjamini. Ehudi aarî wa njara ya kîmotho. Nabo Aisraeli nî baanenkeere Ehudi biewa aikîria Egiloni mûnene wa Moabu.

¹⁶Ehudi nî aaiturîîre rûchiû rwa centimita mîrongo îtaano (50cm) rwanoori nteere cio-ijîîrî ararwogeera kauneene rûteere rwaawe rwa ûrîo, rungu rwa nguû ciaawe.

¹⁷Rîu araikîria Egiloni biewa biu. Egiloni aarî muntû ûmûnoru mono.

¹⁸Ehudi akûthiria kûnenkanîra biewa biu nî eerîre antû barîa baabikamatîte baane.

¹⁹Îndî rîrîa aakinyîre Giligali antû kwaarî na mîrungu ya mîng'uanano yaaji ya maiga, nî aagarûkîre aracoka kîrî mûnene Egiloni. Aramwîra atîrî, “Itû ndî na ûntû bwa witho mpenda gûkwîra ûrî wenka.” Mûnene areera nthûûmba ciaawe imwee kaanya. Nacio iraumagara cionthe.

²⁰Mûnene rîrîa aarî kanyomba kaawe ka îgûrûgûrû akîringagwa nî mpio, Ehudi nî eetîre kîrî we aramwîra atîrî, “Ndî na ntûmwa yaaku kuuma kîrî Mûrungu.” Egiloni ararûngama.

²¹Rîu Ehudi aracinûra rûchiû na njara yaawe ya kîmotho arakothora mûnene ûu kîu.

²²Rûchiû rûu rûrathirîra ku, amwe na gîtumbî. Ehudi aragîtiga ku kiumîrîte rûteere rûrîa rûngî. Najo maguta jarakunîka rûchiû.

²³Rîu Ehudi araumagara aratiga aiinga mîrango ya kanyomba ka îgûrû.

²⁴Akûthiria gwîta, nîrîo nthûûmba cia mûnene cieejîre. Nacio ikwîthîra mîrango ya kanyomba kau iingi, irathûgaania mûnene arî kîoroone.

²⁵Bareeteera, mwanka barambîrîria kûrigara. Bakwona mûnene agûkarakara atîkûrugûra mîrango barajûkia rûbungûro bararugûra. A bagîtega! Baroona mûnene waao agwîte nthî arî ûmûkuû.

²⁶Rîrîa nthûûmba iu cietereete mûnene arugûra, nîrîo Ehudi aamatûkîre mwanka akûrûka Giligali arîa kwaarî na mîrungu ya mîng'uanano ya maiga. Ningî aramatûka areeta gwiciitha Seira.

²⁷Rîrî aakinyîre, nî aaringîre tarumbeta nthîgûrûûne ya irîma ya Efuraimu. Nabo antû ba Israeli nî baaumagarîre bareetania nawe abatongeeretie.

²⁸Rîu Ehudi arabeera atîrî, “Nthingateni, nîûntû MWATHANI nî abweete ûûmbani kîrî anthû beenu tabo Amoabu.” Nabo baramûthingata bareeta barakabîra Amoabu mariûkoone ja Jorodani. Tontû bûû, gûtî muntû wa Moabu kinya ûmwe baareka auna.

²⁹Nabo barooraga nchamba cia Amoabu cia ndwaa ngiri îkûmi (10,000) ntukû îîu, batîtigarie kinya ûmwe.

³⁰Nabo Aisraeli bakûûmba Amoabu nî baakarîre nthî îîu barî kiindajî mîaka mîrongo înaana (80).

³¹Shamugari, mûtaana wa Anathi, nîwe waaere mûtongeeria wa Israeli nyuma ya Ehudi. Kinya we nî oonokerie Aisraeli na njîra ya kûûraga Afilisti magana jatantatû (600) na rûturo rwaji kamûthia kamwe rwa kwîngaînga ng'ombe naru.