Read KIMERU BIBLE PROTESTANT EDITION Agam 4 Bible Online

Agam 4 - KIMERU BIBLE PROTESTANT EDITION bible

Agam 4

¹Nabo Aisraeli o kaîrî, nî baathithîrie mantû jamathûûku meethoone ja MWATHANI. Nyuma ya Ehudi agûkua.

²Tontû bûû, MWATHANI nî aabanenkanîîre kîrî Jabini, mûnene wa Kanaani ûrîa waathanaga arî ntûûreene ya Hazori. Mûtongeeria wa njûûrî yaawe eetagwa Sisera, nawe aatûûraga gûntû gweetagwa Haroshethi ya mîgongo.

³Jabini nî aarî na ngaarî cia ndwaa cia chuuma magana kenda (900), na nî aainyîrîîrie antû ba Aisraeli atî na kîaao nabo mîaka mîrongo îîrî (20). Rîu Aisraeli nî baakaîîre MWATHANI arabateethia.

⁴Mûka-kîroria weetagwa Debora, mwekûrû wa Lapidothi, nîwe waarî mûgambi wa Israeli îgiiteene rîu.

⁵Nawe aakaraga nthî rungu rwa Mûkîndû, jweetagwa Mûkîndû jwa Debora, naju jwaarî gatîgatî ga ntûûra ya Rama na ya Betheli kûu nthîgûrû ya irîma ya Efuraimu. Nabo Aisraeli nî beetaga kîrî we nîkenda abagambîra.

⁶Debora nî aatûmanîîre Baraki, wa kuuma Kedeshi kûu nthîgûrû ya Nafutali. Baraki aarî mûtaana wa Abinoamu. Baraki akwîja, Debora aramwîra atîrî, “MWATHANI, Mûrungu wa Israeli arîkwîra ûjû, ‘Ûthûrania asikarî ngiri îkûmi (10,000) kuuma mwîrîgeene jwa Nafutali na jwa Zebuloni, bwitie nabo kîrîmeene gîa Tabori.

⁷Naani ngeeta Sisera mûtongeeria wa njûûrî ya Jabini arî na njûûrî yaawe na ngaarî cia ndwaa eeje bûrwîre au rûûjîîne rwa Kishoni. Naani ngakwaa ûûmbani!’”

⁸Baraki aracokeria Debora atîrî, “Ngeeta bunka weetania naani, îndî wëethîrwa ûtîîtania naani, ntîîta.”

⁹Debora aramwîra, “Nîu nî mma ngeetania naagwe; îndî ûmenye nkuma îrîa ûkwîjîte kûgîa nayo mantûûne jaja, îgeeta kîrî mûka nîûntû MWATHANI akaanenkanîra Sisera Kîrî Mûka.” Tontû bûû, Debora araithuranîra gwîtania na Baraki kûu Kedeshi.

¹⁰Baraki nî oothûranîrie asikarî ngiri îkûmi (10,000) kuuma mwîrîgeene jwa Zebuloni na jwa Nafutali. Nabo asikarî bau nî beetanîrie nawe abatongeeretie mwanka Kedeshi. Kinya Debora nî eetanîrie nawe.

¹¹Mûkeni ûmwe weetagwa Heberi, nî eetîre araamba kambî rungu rwa muuru antû eetagwa Zaananimu akuî na ntûûra ya Kedeshi. Nawe ka aarî agûciathûrana na Akeni bangî barîa nchiarwa cia Hobabu mûtaana wa ng'ina wa mwekûrû wa Musa.

¹²Sisera nî eerîrwe atî Baraki mûtaana wa Abinoamu, nî aarî agwitia kîrîmeene kîa Tabori.

¹³Aroothûrania ngaarî cia ndwaa magana kenda (900) cia chuuma amwe na asikarî baawe bonthe barîa aarî nabo Haroshethi ya mîgongo arabatûma rûûjîîne rwa Kishoni.

¹⁴Debora areera Baraki atîrî, “Ûkîîra wîîte nîûntû naarua MWATHANI agaagûtongeeria na akwee ûûmbani îgûrû rîa Sisera.” Tontû bûû, Baraki areenama kuuma kîrîmeene gîa Tabori arî na asikarî baawe ngiri îkûmi (10,000).

¹⁵Baraki na njûûrî yaawe nî baithûkîre, nawe MWATHANI aratûma Sisera oombwa arî na ngaarî ciaawe cia ndwaa na njûûrî yaawe yonthe. Rîu Sisera arathûngûtha kuuma ngaarîîne yaawe ya ndwaa aramatûka na magûrû.

¹⁶Baraki nî eenganîre na ngaarî cia ndwaa na njûûrî ya Sisera mwanka Haroshethi ya mîgongo. Nawe arabathiria buru ûntû gûtî muntû waatigarîre.

¹⁷Sisera aramatûka aratonya îemeene rîa Jaeli, mûka wa Heberi, nîûntû Jabini mûnene wa Hazori nî baarî na thîîrî na nja ya Heberi ûrîa Mûkeni.

¹⁸Jaeli nî aumagarîre kûgwata Sisera ûgeni aramwîra atîrî, “Tonya îemeene rîaakwa itû Mwathi waakwa; ûgáakîra!” Nawe aratonya. Jaeli aramûguîkîra na gîtambaa.

¹⁹Rîu Sisera aramwîra atîrî, “Itû nkundia tûûjî, nyue nîûntû ndî na nyoonta mono.” Jaeli arakunûra nchengerio ya îria, aramûkundia. Nyuma aracoka aramûguîkîra kaîrî.

²⁰Sisera aramwîra atîrî, “Rûngama mwariine jwa îema, na ûreeja agakûûria këethîra kûrî muntû ûrî gûkû, ûmwîre gûtî we.”

²¹Sisera nî aamamîre toro înene nîûntû nî aanogi mono. Rîu nîrîo Jaeli aajûkîrie kîango kîa îema na nyondo, areeta aceemeete, arakîangîîra mbûrûgûtû kîraumîîra rûteere rûû rûngî kîramunta nthî. Sisera arakua.

²²Baraki rîrîa eejîre gûcwaa Sisera, Jaeli nî aamûthagaanîre aramwîra atîrî, “Njû nkwonie muntû ûrîa ûgûcwaa.” Rîrîa aamwikîrie, Baraki areethîra Sisera amami nthî arî ûmûkuû na kîango kîa îema gîtûrîkanîrîtie mbûrûgûtû îrîa îngî.

²³Ntukû îîu nîyo MWATHANI aatûmîre Aisraeli boomba Jabini, mûnene wa Kanaani.

²⁴Nabo Aisraeli bareeta na mbere kwinyîîria Jabini mûnene wa Kanaani mwanka baramûthiria buru.