Read KIMERU BIBLE PROTESTANT EDITION Agam 5 Bible Online

Agam 5 - KIMERU BIBLE PROTESTANT EDITION bible

Agam 5

¹Ntukû îîu Debora na Baraki mûtaana wa Abinoamu nî baainîre rwîmbo rûrû:

²MWATHANI arokumua. Tontû bwa atongeeria ba Israeli kwirita gûtongeeria na bwa kîrîndî gûcieejana na gûciendera!

³Thikîîreeni, buî anene! Naabuî atongeeria kiindeeni matû! Bwigue rwîmbo rûrû rwa nkerû, nkwinîra MWATHANI Mûrungu wa Israeli.

⁴Îî MWATHANI, rîrîa Gwe weenamîre kuuma irîmeene bia Seiri, rîrîa waaumîre nthîgûrûûne ya Edomu, nthîgûrû nî yainainîre îgûrû rîratûrîka na ngai îracûnia nthî.

⁵ Irîma nî biainainîre mbere ya MWATHANI, we ûrîa wa Sinai tawe Mûrungu wa Israeli.

⁶Îgiiteene rîa Shamugari mûtaana wa Anathi na rîa Jaeli, antû barîa beetaga rûgendo barî amwe, nî baatigîre gwîtagîîra njîreene, nabo ageendi baratua gwîtagîîra tûjîreene twa magûrû.

⁷Miuunda ya Israeli îtaarî na antû, mwanka rîrîa gwe Debora waaumîîre gwe ng'ina wa Israeli.

⁸Rîrîa Aisraeli baathingataga mîrungu îngî, nthîgûrû yaao nî yaaithûkagîrwa. Kîrî asikarî ngiri mîrongo îna (40,000) gûtî we woonwa na rong'o kana îtumo.

⁹MWATHANI arokumua. Nî mpendeete atongeeria ba Israeli, o amwe na antû barîa bacieejanîte baciendereete bongwa!

¹⁰Tûmîîrieni mantû jaja, buî bûkamatagwa nî ntigiri cia rangi înjerû, bûkarîrîte matandîko na kinya buî barîa bwîtaga na magûrû.

¹¹Igueni barîa barî ithimeene, bakiina bakîgongaga ûûmbani bwa MWATHANI, nabu nî ûûmbani bwa Aisraeli. Nabo antû ba MWATHANI nî beetîre barî njûûrî, beetîrîte mpingîroone cia ntûûra.

¹²Tûtongeerie Debora, tûtongeerie! Tûtongeerie ûkîringaga rwîmbo! Ithuranîre Baraki mûtaana wa Abinoamu ûtongeerie atae baaku.

¹³Nabo antû ba Israeli barîa baatigeere nî beetîre kîrî atongeeria baao. Antû ba MWATHANI nî baaumîre barî njûûrî înene.

¹⁴Antû nî baaumîre nthîgûrû ya Efuraimu bareenama bwa mûgwanthî. Bareeta kwigîka antû ba Benjamini. Atongeeria ba ndwaa barîa anene nî baaumîre nthîgûrû ya Makiri, atongeeria ba ndwaa barîa anini nî baaumîre nthîgûrû ya Zebuloni.

¹⁵Atongeeria ba mwîrîga jwa Isakari nî beetanîrie na Debora, nabo nî baagwete Baraki mbaru, na bareetania nawe kûu kîguuruune. Îndî mwîrîga jwa Rubeni jûtaarî jûkûgiita ûrîa jûkwenda.

¹⁶Nîkî tontû mwîrîga jwa Rubeni jwaatigîrwe nkanateene cia ng'ondu? Jûratigwa jûthikîîrîte marîrî ja arîîthi? Mwîrîga jwa Rubeni nîka jûtaarî jûkûgiita ûrîa jûkwenda.

¹⁷Mwîrîga jwa Gileadi jwaakarîre rûteere rwa bwa gaiti ya Jorodani jûteejîre kwimbîîria. Nîkî ûntû mwîrîga jwa Dani jwaakarîre meriine? Naju mwîrîga jwa Asheri jwaatigîrwe mpwîroone cia îria jûrakara ikaroone biaaju.

¹⁸Îndî antû ba mwîrîga jwa Zebuloni na Nafutali akî, nîbo beetîre ndweene batîgûkîra gûkuîra ku.

¹⁹Au Taanaki, rûteere rwa karûûjî ka Megido, ndwaa nî yaacacîre mono, nî baarwîre na Anene ba Kanaani bûbûûî îndî gûtî gantû ka fetha baataîre.

²⁰Njota nî ciaatûgwatîrie kûrwaa, irarwaa na Sisera irî kûu îgûrû.

²¹Baakondorerue nî rûûjî rwa Kishoni, rûûjî rwa Kishoni rûrabakondoria naatuî tûragîa inya ya kûrwaa.

²²Nîrîo mbarathi cieejîre ikîthûngathûngûthaga ikîruumagia nthî na nchaaû.

²³Mûraîka wa MWATHANI ariuga ûjû, “Rumeni ntûûra ya Merozi, bûrume atûûri baayo, nîûntû bateejîre gûteethereria MWATHANI, bairita ta asikarî barwaa na anthû ba MWATHANI.”

²⁴Jaeli, mûka wa Heberi ûrîa Mûkeni; nî ûmûtharime nkûrûki ya aka bonthe, barîa batûûraga maemeene.

²⁵Akûrombwa rûûjî nî Sisera, aamûkundîrie îria, aramûretera kîrimo kîrî mpakûriine înthongi mono ta ya anene.

²⁶Aagwete nyondo na njara îmwe, kîango na njara îngî; nî aakîangîrîre mbûrûgûtû ya Sisera, kîongo kîraatûka kîratûrîkania mbûrûgûtû îrîa îngî kîramunta nthî.

²⁷Nawe aagwîre arathira akiri ki aratambûrûka arooma, arakua Jaeli amûtegeete.

²⁸Ng'ina wa Sisera arûngi ndiricheene, ategeete bwa oome agîciûragia; “Nîatîa ngaarî yaawe ya ndwaa îcereeri? Kana nî mbarathi itîkûûmba gwîta?”

²⁹Acoore ba ng'ina wa Sisera barîa boome mono baramûcokeria, nawe aracokera ûu baugaga atîrî,

³⁰“Gûtî u, ka bagûcwaa into bia gûtaa bibingî bia kûgaana, o asikarî mwarî ûmwe kana baîrî, Sisera nguû cia goro, mûka-mûnene bamûcwagîra mîkathî na mina.”

³¹Itû MWATHANI anthû baaku barothira bonthe, îndî barîa bakwendeete barokengakengaga ta riûa rîkiuma! Nayo nthîgûrû ya Israeli nî yaakarîre kiindajî mîaka mîrongo îna (40).