Read KIMERU BIBLE PROTESTANT EDITION Agam 6 Bible Online

Agam 6 - KIMERU BIBLE PROTESTANT EDITION bible

Agam 6

¹Aisraeli nî beeîîrie MWATHANI o kaîrî. Tontû bûû, MWATHANI nî aabarekeererie baraathwa nî Amidiani mîaka mûgwanja (7).

²Nabo Amidiani barabainyîîria mono, mwanka Aisraeli baratua gwiciithaga ikurunguune na marinyeene kûu irîmeene.

³O rîrîa Aisraeli baandaga, Amidiani, na Amaleki, na antû ba rwanda nî baabaithûkagîra.

⁴Nabo baambaga kambî ku, irio biauma bakabiînyangia bionthe mwanka Gaza. Ningî bakiuma ku, baajûkagia ng'ondu na ng'ombe na ntigiri, na gûtî gantû baatigagîra Aisraeli ga kûrîa.

⁵Nîkwîthîrwa beejaga barî babaingî o ta ngigî, barî na ndîîthia ciaao na maema jaao. Nabo amwe na nkamîîra ciaao baarî babaingî ûntû batîngî tarîka. Baaithûkagîra nthîgûrû bakamîthûûkia.

⁶Nabo Aisraeli bataarî na inya ya kwirikîria kîrî Amidiani, tontû bûu barakaîra MWATHANI.

⁷Rîrîa antû ba Israeli baakaîîre MWATHANI nîûntû bwa Amidiani,

⁸MWATHANI nî aatûmîre kîroria kîrî Aisraeli, kîrabeera atîrî, “MWATHANI, Mûrungu wa Israeli arîbwîra atîrî, ‘Ni nî ni ndaabûritîre Misri nthîgûrû ya ûkombo.

⁹Ningî nî ndaabûtunyûkîrie kuuma njareene cia Amisri, ndaabûtunyûkia kuuma kîrî bonthe barîa baabwinyagîîria. Naani nî ndaabwîngîîre bo na ndîrabwaa nthîgûrû yaao.

¹⁰Nî ndaabwîrîre atî nî ni MWATHANI, Mûrungu weenu, na ndîrabwîra bûkororomba mîrungu ya Aamori ba nthîgûrû îîjî bûrî; îndî buî bûtambigua.’”

¹¹Mûraîka wa MWATHANI nî eetîre ntûûreene ya Ofura na arakara nthî rungu rwa muuru jwa Joashi ûrîa Mûabiezeri. Mûtaana waawe weetagwa Gideoni nî aaûûragîra nkano antû arîa nzabibû ciaiinyagîrwa nîkenda atîkoonwe nî Amidiani.

¹²Mûraîka wa MWATHANI aramuumîîra aramwîra atîrî, “Gwe nchamba! MWATHANI arî amwe naagwe!”

¹³Gideoni areera mûraîka atîrî, “Mwathi waakwa, këethîra MWATHANI arî amwe naatuî rî, nîmbi îtûmîte mantû jaja jonthe jatwîjîîra? Birîkû biama biaawe bionthe birîa ba baaba baatwîragîra rîrîa baugaga, ‘Nî MWATHANI waatûritîre Misri?’ Nandî MWATHANI nî atwîrûkîrîte na aatûnenkanîra njareene cia Amidiani.”

¹⁴MWATHANI aramûraithîîria aramwîra atîrî, “Ûrî na inya înene, îta na ûkoonokia Aisraeli kuuma kîrî Amidiani. Ni nî ni ngûgûtûma”

¹⁵Îndî Gideoni aramûcokeria aramwîra atîrî, “Mwathi waakwa, nkoonokia Israeli nambi? Atîrî mûciî jweetû nîju mûnini mono mwîrîgeene jwa Manase, naani nî ni mûnini buru nja ya baaba.”

¹⁶MWATHANI aramwîra atîrî, “Nkeethîrwa ndî amwe naagwe. Tontû bûû, ûkarwaa na Amidiani, ûboombe ta muntû ûmwe ûkûrwaa nawe.”

¹⁷Gideoni aramwîra atîrî, “Ûkëethîrwa ûkûgwîrua nî ni mbonia rwano menye nîgwe MWATHANI ûkwaria naani.

¹⁸Itû menya uumauma aja mwanka ngîîre kîewa gîaakwa kîa irio nkûreetere.” Aramûcokeria aramwîra, “Ngeeteera mwanka ûcoke.”

¹⁹Gideoni nî aakûrûkîre nyomba na araruga kabûri na mîgaate îtiimbithîtue ya mûtu jwa kilo îkûmi (10kg). Areekîra nyama gîkabûûne, na mûthûri jwaacio koongûûne, areeta nabio au rungu rwa muuru aramûnenkera.

²⁰Mûraîka wa Mûrungu aramwîra atîrî, “Jûkia nyama na mîgaate ûrîkîîre iigeene rîrî, ûcoke wîîtûûrîrie mûthûri o.” Gideoni nawe arathithia u.

²¹Mûraîka wa MWATHANI aratambûrûkia njara araringithia nyama na mîgaate na mûthia jwa rûturo rûrîa aagwete. Mwanki jûrauma iigeene jûraîîthia nyama na mîgaate. Mûraîka wa MWATHANI ararima.

²²Nîrîo Gideoni amenyere atî ûu aarî Mûraîka wa MWATHANI. Aarauga atîrî, “Keke! Atî ndîkwona mûraîka wa MWATHANI ûthiû kwa ûthiû!”

²³MWATHANI aramwîra ûjû, “Kara na thîîrî! Tiga gûkîra ûtîkua.”

²⁴Gideoni nî akîîre MWATHANI kîritîro kîa igongwana au, aragîîta MWATHANI nî Thîîrî. Nakîo kîritîro kîa igongwana kîu kîrî Ofura ntûûreene ya Abiezeri mwanka naarua tûrî.

²⁵MWATHANI nî aarîîrie Gideoni ûtukû bûu aramwîra atîrî, “Jûkia ndeegwa ya abaagu na îngî ya ijîîrî ya mîaka mûgwanja. Naagwe wîîte ûtharie kîritîro kîa igongwana kîrîa abaagu aakîrîte Baali na ûgiitange mûrungu jwa mûng'uanano jwa Ashera jûu jûrî rûteere rwaakîo.

²⁶Ûcoke waakîre MWATHANI Mûrungu waaku kîritîro kîa igongwana bwega aja gîtûmbîîne gîkî. Ningî ûjûkie ndeegwa îîu ya ijîîrî ûmîrite kîgongwana gîa gwakîîria ûgîtumagîra nkû iu ûgiitangîre kuuma kîrî mûrungu jwa mûng'uanano jwa Ashera.”

²⁷Tontû bûû, Gideoni, nî aajûkîrie antû îkûmi kuuma kîrî nthûûmba ciaawe arathithia o ûrîa MWATHANI aamwîrîte. Îndî nîûntû bwa gûkîra antû ba nja yaao na antû ba ntûûra yaao aathithîrie mantû jau ûtukû.

²⁸Nabo antû ba ntûûra, bagîûkîîra rûkîîrî bareethîra kîritîro kîa igongwana kîa Baali kîtharîtue, na gîtugî kîa Ashera kîrîa kîaarî rûteere rwaakîo kîgiitangi. Nayo ndeegwa ya ijîîrî nî yaritîri kîgongwana kîritîroone kîa igongwana kîrîa gîaaki.

²⁹Nabo baroorania atîrî, “Nûû ûthithîtie ûjû?” Nyuma ya kûûrithîria bwega bareerwa, “Nî Gideoni, mûtaana wa Joashi ûthithîtie u.”

³⁰Nîrîo antû ba ntûûra îîu beerîre Joashi atîrî, “Umagaria mûtaana waaku tûmûûrage nîûntû bwa kûtharia kîritîro kîa igongwana bia Baali na aagitanga gîtugî kîa Ashera kîrîa kîraarî rûteere rwaakîo.”

³¹Joashi nawe areera antû bau bonthe baamwîjîîrîte atîrî, “Ka kwaa nî buî bûkarwîrîîra Baali? Kana nî buî bûkamwonokia? Ûrîa ûkamûrwîrîîra ga akooragwa mbere ya gûkîa. Këethîra Baali nî mûrungu rî, rekeeni airwîrîîre wengwa nîûntû kîritîro kîa igongwana gîkûtharua.”

³²Kuuma ntukû îîu, baratuîra Gideoni riîtwa Jerubaali nîûntû Joashi ka augîre, “Reka Baali airwîrîîre wengwa nîûntû nî kîritîro kîaawe kîa igongwana kîtharîtue.”

³³Nabo Amidiani bonthe, na Amaleki bonthe, na antû ba rwanda nî boothûranîre, barauna mûuro jwa Jorodani na baraamba kambî kîguuruune kîa Jezereeli.

³⁴Gideoni aroojûrwa nî Roho wa MWATHANI, araringa tarumbeta, nabo antû ba kuuma Abiezeri baramûthingata.

³⁵Ningî nî aatûmanîre kîrî antû ba mwîrîga jwa Manase, nabo baramûthingata. Aracoka aratûmana kîrî antû ba mwîrîga jwa Asheri na ba mwîrîga jwa Zebuloni na ba mwîrîga jwa Nafutali, nabo bareeta kûmwîtîka.

³⁶Rîu Gideoni areera Mûrungu atîrî, “Ûkëethîrwa ûgaantumîra kwonokia antû ba Israeli ta ûrîa uugîîte rî,

³⁷reka ndîkîîre guee ya ng'ondu îtîîriine; nayo îîu îkagwatia îme yonka, kûu kûngî nthîgûrû kûûmi, nîrîo nkaamenya atî ûgantumîra kwonokia antû ba Israeli, ta ûrîa uugîîte.”

³⁸Naku ûu nîu gwaakarîre, nîûntû rîrîa Gideoni arookere rûûneene kainda, nî aainyîre guee, îrarita rûûjî mpakûri îmwe.

³⁹Gideoni areera Mûrungu atîrî, “Itû ûkathûûra nî ni, reka mbarie rîrî rîonka. Ka ngerie na guee îîjî o kaîrî. Nandî guee yonka nî îtigwe îtî na rûûjî, îndî kûgîe na îme nthîgûrû.”

⁴⁰Mûrungu arathithia o ûu ûtukû bûu. Kûragia îme nthîgûrû, îndî guee îratigwa îtî na rûûjî.