Read KIMERU BIBLE PROTESTANT EDITION Agam 8 Bible Online

Agam 8 - KIMERU BIBLE PROTESTANT EDITION bible

Agam 8

¹Antû ba Efuraimu nî baateterie Gideoni mono bakîmwîraga atîrî, “Nîatîa ûjû ûthithîtie? Nîkî ûntû ûtîratwîtîre ûgîîta kûrwaa na Amidiani?”

²Nawe arabacokeria atîrî, “Gûtî u nthithîtie bûbûnene nkûrûki ya ûrîa bûthithîtie. Kinya mantû jamanini jarîa mwîrîga jweenu jwa Efuraimu jûthithîtie, nîjo jarî na gîtûmi nkûrûki ya jarîa jonthe mwîrîga jweetû jwa Abiezeri jûthithîtie.

³ Mûrungu nî atûmîte bûûraga athani ba Midiani, tabo Orebu, na Zeebu. Nîka kûrî bu nthithîtie bûbûnene nkûrûki ya bûu?” Rîrîa aabeerîre ûu mûthûûro jwaao jûraborera.

⁴Gideoni na antû baawe barîa magana jathatû rîrîa baakinyîre mûuroone jwa Jorodani nî baunîre rûûjî. Nî baarî bakûnoga, îndî no beengeene na anthû.

⁵Rîrîa baakinyîre ntûûreene ya Sukothi, Gideoni nî eerîre antû ba Sukothi atîrî, “Itû ndûmîrieni antû baba baakwa biakûrîa nîûntû nî banogi, na nîka mpîngeene na anene ba Midiani tabo Zeba na Zalumuna.”

⁶Îndî atongeeria ba Sukothi barabooria atîrî, “Ûrîenda tûrûmia njûûrî yaaku biakûrîa nîkî? Nîka bûgweete anene bau Zeba na Zalumuna?”

⁷Gideoni arabeera ûjû, “Nîu ni! Rîrîa MWATHANI agaatûma ngwate anene bau tabo Zeba na Zalumuna, rîu nkaabûûra na miigua na nkoonko ya rwanda.”

⁸Kuuma au areeta mwanka ntûûra ya Penueli, areera antû ba Penueli o ta ûrîa eerîte antû ba ntûûra ya Sukothi. Nabo antû ba Penueli baracokia o ta ûrîa antû ba Sukothi baamûcokeretie.

⁹Ningî Gideoni areera antû ba Penueli ûjû, “Ndacoka ndî thîîria, nkaamomoranga mûnaara jûjû jweenu buru.”

¹⁰Nabo Zeba na Zalumuna amwe na njûûrî ciaao baarî Korikori. Kîrî antû ba mîîrîga yonthe ya rwanda, nî asikarî ngiri îkûmi na ithaano (15,000) bonka baatigeere. Nîkwîthîrwa asikarî ngiri îgana rîa mîrongo îîrî (120,000) nî baarî bakûûragwa.

¹¹Gideoni nî eetîre na njîra ya rwanda îrîa yeetagîîrwa nî antû barîa batûûraga bwa gaiti ga ntûûra ya Nobaha na Jogibeha araithûkîra njûûrî ya anthû baao tabo Zeba na Zalumuna îtiithuranîrîte.

¹²Anene barîa baîrî ba Midiani, tabo Zeba na Zalumuna nî baamatûkîre. Gideoni areengana nabo mwanka arabagwata. Nayo njûûrî ya anene bau îragwatwa nî ûguaa îraaragana.

¹³Gideoni, mûtaana wa Joashi, akiuma ndweene nî eetîrîre mûcîcîbîroone jwa Heresi.

¹⁴Gideoni nî aagwatîre mûthaka ûmwe wa Sukothi aramûûria biûria. Nawe mûthaka nî aamwandîkîîre mariîtwa ja atongeeria ba Sukothi. Aandîkîre mîrongo mûgwanja na mûgwanja (77).

¹⁵Rîrîa Gideoni aakinyîre kîrî antû ba ntûûra ya Sukothi nî aabeerîre atîrî, “Nandî tîbo baba Zeba na Zalumuna barîa baatûmîre bwata njûûrî yaakwa biakûrîa. Nîbo baatûmîre bûnkuruunga bûkiugaga atîrî, ‘Nîka ûgweete Zeba na Zalumuna rîu nîkenda tûrûmia njûûrî yaaku înogu biakûrîa?’”

¹⁶Gideoni nî aagwatîre atongeeria bau ba ntûûra, arabakanûkia arabaûûra na miigua na nkoonko ya rwanda.

¹⁷Ningî nî aamomorangîre mûnaara jwa Penueli na arooraga antû ba ntûûra îîu.

¹⁸Rîu Gideoni nî oorîrie Zeba na Zalumuna atîrî, “Antû barîa bworagîîre kîrîmeene gîa Tabori baakari atîa?” Nabo baramûcokeria, “Baakari o ta ûûgwe. Bonthe baakari ta ataana ba mûnene.”

¹⁹Gideoni arabeera atîrî, “Baarî ataana ba chiaa, ningî twaarî ba ng'ina ûmwe. Naani nî ngûciîtia na riîtwa rîa MWATHANI ûrîa ûrî mwoyo atî, këethîra bûtaabooragîre, kinya ni ntîbûûraga.”

²⁰Aracoka areera Jetheri, mûtaana waawe wa kîranga, atîrî, “Îta ûboorage!” Îndî Jetheri ataakûûrîre rûchiû rwaawe, nîûntû aarî ûmûnini na nî aarî na ûguaa.

²¹Nabo Zeba na Zalumuna bareera Gideoni atîrî, “Njû ûtûûrage gwengwa. Ûntû bûbû bûbuîri nî kûthithua nî ntomûrûme ta ûûgwe.” Gideoni nî eetîre arabooraga na ararita mîkang'i îrîa yaarî nkingo cia nkamîîra ciaao.

²²Aisraeli nabo nî beerîre Gideoni atîrî, “Twathage na twathagwe nî nchiarwa ciaaku, nîûntû nîgwe watwonokia kuuma kîrî Amidiani.”

²³Îndî Gideoni arabeera atîrî, “Ni ntîbwathaga, na nchiarwa ciaakwa itîbwathaga. MWATHANI nîwe ûkabwathaga wengwa.”

²⁴Aracoka arabeera atîrî, “Ka mbûrombe ûntû bûmwe akî. Mpeeni mîkang'i îrîa bwaataîte kuuma kîrî antû.” (Bwaarî wîthîre bwa Amidiani gwîkîra mîkang'i ya thaabu).

²⁵Aisraeli baramûcokeria atîrî, “Nîu, tûgaakûnenkera yo.” Nabo nî baarîre gîtambaa na o muntû aragera mîkang'i yaawe ya thaabu ku, agwîrîîtue.

²⁶Mîkang'i îîu ya thaabu irîa yaaritîrwe yaarî ya ûrito bwa ta kilo mîrongo îîrî gûtîgûtarwa into bia kwigemia na nguû cia rangi ya mûkû irîa cieekîri nî anene ba Midiani kana nyororo irîa ciaarî nkingo cia nkamîîra ciaao.

²⁷Gideoni arathithia mûrungu jwa mûng'uanano na thaabu îîu, arajwîka ntûûreene yaao ya Ofura. Aisraeli bonthe nî baatigîre kûromba Mûrungu wa mma baraambîrîîria kûromba mûrungu jûu jwa mûng'uanano. Naju jûraa kîgiitaria kîrî Gideoni na nja yaawe.

²⁸Ûu nîu antû ba Midiani boombîrwe ndweene nî antû ba Israeli na îtaacoka kûreteera Israeli thîîna kaîrî. Nthîgûrû îrakara na thîîrî mîaka mîrongo îna (40), rîrîa rîonthe Gideoni atûûrîre mwoyo.

²⁹Gideoni tawe Jerubaali, mûtaana wa Joashi nî aanîre areeta gûtûûra nja yaawe.

³⁰Gideoni nî aarî na ataana mîrongo mûgwanja (70) nîûntû nî aarî na aka babaingî.

³¹Mûka wa gwîka waawe ûrîa watûûraga Shekemu nî aamûciarîre kaîjî, na Gideoni arageeta Abimeleki.

³²Gideoni, mûtaana wa Joashi, nî aakuîre arî ntindiri. Nawe nî aathikîrwe mbîrîreene ya îthe, Joashi, o kûu Ofura, ntûûra ya mwîrîga jwa Abiezeri.

³³Nyuma ya gîkuû kîa Gideoni, antû ba Israeli nî baaere ndemi baratua kûrombaga mîrungu ya mîng'uanano. Baraethia Baali-berithi mûrungu jwaao.

³⁴Nabo baroorîrua nî MWATHANI Mûrungu waao ûrîa waboonokeetie kuuma kîrî anthû baao barîa babathiûrûkîrîte.

³⁵Ningî bataarî na kîaao na antû ba nja ya Gideoni kinya këethîra nî aathithîrîtie Israeli mantû jameega.