Read KIMERU BIBLE PROTESTANT EDITION Agam 9 Bible Online

Agam 9 - KIMERU BIBLE PROTESTANT EDITION bible

Agam 9

¹Abimeleki, mûtaana wa Gideoni, nî eetîre Shekemu kwaarîria antû bonthe ba ndûgû cia ba ng'ina.

²Arabeera atîrî, “Itû arieni na antû ba ntûûra ya Shekemu bonthe bûboorie atîrî, ‘Nî bûrîkû bûkwona bûrî bûbwega; nî kwathwa nî ataana ba Gideoni bonthe mîrongo mûgwanja kana nî kwathwa nî ûmwe waabo?’ Bûririkane atî Abimeleki ndî wa ndûgû cieenu.”

³Antû bau ba ndûgû cia ba ng'ina nî beetîre baramwarîîria kîrî antû ba ntûûra ya Shekemu bonthe o ta ûrîa abeerîte. Nabo bareetîkîîria kûthingata Abimeleki, barauga ûjû, “Uga tî mwana wa ndûgû cieetû!”

⁴Baramwaa fetha mîrongo mûgwanja kuuma kîromberoone kîa Baali-berithi. Abimeleki aracwaa antû ngîti arabarîaa mbeecha bareetania nawe.

⁵Nî eetîre nja yaao Ofura na arooragîra ataana ba îthe bau mîrongo mûgwanja îgûrû rîa iiga rîmwe. Îndî Jothamu mûtaana wa îthe ûrîa mûnini buru, atooragîrwe nîûntû nî aarî agwiciitha.

⁶Antû ba ntûûra ya Shekemu bonthe nî boothûranîre amwe na ba Bethimilo bonthe baraethia Abimeleki mûnene, baarî au muuruune jûrîa jûrî akuî na mûnaara jwa Shekemu.

⁷Rîrîa Jothamu eerîrwe mantû jau nî aitîrie kîrîmeene gîa Gerizimu. Nawe aratûmîîria na kajû gakanene areera antû ba Shekemu atîrî, “Îî buî antû ba Shekemu, nthikîîreeni, nawe Mûrungu akaabûthikîîra.

⁸Îgiita rîmwe mîtî nî yeetîre kwithuurîra mûnene. Nayo îreera mûzeituni atîrî, ‘Aa mûnene weetû’

⁹Mûzeituni jûramîîra atîrî, ‘Ntige maguta jaakwa jarîa jakumithagia mîrungu na jagakumithia antû, mbîje mbathage mîtî?’

¹⁰Nayo mîtî îreera mûkûû, ‘Njû wee mûnene weetû!’

¹¹Naju mûkûû jûramîcokeria atîrî, ‘Ntige matuunda jaakwa, jarî mûrîo na jamathongi, mbîje mbathage mîtî?’

¹²Nayo mîtî îreera mûzabibû, ‘Njû wee mûnene weetû!’

¹³Mûzabibû jûramîîra atîrî, ‘Ntige kûritaga ndibei înjega îrîa îgwîragia mîrungu na îkagwîria antû, mbîje mbathage mîtî?’

¹⁴Mûthieene mîtî yonthe îreera mûtî jûrî na miigua atîrî, ‘Njû wee mûnene weetû!’

¹⁵Naju mûtî jûrî na miigua jûramîîra ûjû, ‘Këethîra nî bûgûmpeethia mûnene weenu bûciendereete rî, njûûni bûringwe nî mpio mûgunyeene jwaakwa. Îndî këethîra tî u, mwanki jûroouma mûtîîne jûrî na miigua jûkaîîthia mîtarakwa ya Lebanoni!’”

¹⁶Ningî Jothamu nî eetîre na mbere kûbaarîria, arabeera atîrî, “Ciûrieni bwingwa këethîra bûrî meene kweethia Abimeleki mûnene na këethîra bûrîa bûthithîrîtie Gideoni na nja yaawe nî bûbwega o ta bûrîa aabûthithagîria.

¹⁷Baaba aabûrwîrîîre atîkûmakîra mwoyo jwaawe mwanka arabwonokia kîrî Amidiani.

¹⁸Îndî buî naarua, bûkwithûkîra nja ya baaba, bworagîra ataana baawe mîrongo mûgwanja îgûrû rîa iiga rîmwe. Ningî nî bwethetie Abimeleki mûtaana wa mûka nthûûmba wa Gideoni, mûnene wa Shekemu nîûntû nî mwana wa mwarî weenu.

¹⁹Atîrî, këethîra bûrî meene ûrîa bûthithîrîtie Gideoni na nja yaawe naarua rî, gwîrueni nîûntû bwa Abimeleki, nawe agwîrue nîûntû bweenu!

²⁰Îndî këethîra bûtî meene, mwanki jûroouma kîrî Abimeleki jûkaîîthia antû ba Shekemu na ba Bethimilo. Ningî mwanki jûroouma kîrî antû ba Shekemu na ba Bethimilo jûkaîîthia Abimeleki.”

²¹Jothamu nî aamatûkîre areeta gwiciitha kîthimeene kîa Beeri, nîûntû nî aakîraga mûtaana wa ng'ina Abimeleki.

²²Abimeleki aathanîre Israeli mîaka îthatû.

²³Rîu Mûrungu nî aatûmîre Abimeleki bamenana na antû ba Shekemu. Nabo antû ba Shekemu baramwirebera.

²⁴Gwakarîre ûu nîûntû bwa ûrîa Abimeleki ooragîre ataana ba Gideoni mîrongo mûgwanja, na nîûntû bwa ûrîa antû ba Shekemu baamûgwatîre mbaru akîûraga ataana ba ng'ina.

²⁵Antû ba Shekemu nî beekîre antû irîmeene nîkenda bakabîra Abimeleki. Nabo antû bau beeki irîmeene nî baatuunyaga antû barîa bakûrûkaga na njîra îîu into biaao. Abimeleki nî eerîrwe mantû jau.

²⁶Gaali, mûtaana wa Ebedi na ataana ba ng'ina nî beetîre Shekemu, nabo antû ba Shekemu baramûgwata mbaru.

²⁷Baraumagara bareeta miuundeene, baratua nzabibû barathithia ndibei nacio. Nyuma barathithia kîatho. Barakûrûka kîromberoone kîa mûrungu jwaao, bararîa na baranyua, bakîrumaga Abimeleki.

²⁸Gaali arooria atîrî, “Abimeleki ka arî ûû? A-tuî antû ba Shekemu gatûkari atîa ûntû tûtumîkagîra Abimeleki? Anga we tî mûtaana wa Gideoni? Anga Zebuli tî we mûnini waawe? Tuî tûtumîkagîreeni nchiarwa cia Hamori ûrîa îthe wa Shekemu. Tuî tûtîûmba gûtumîkîra Abimeleki.

²⁹Wûi këethîra antû baba barî waathoone bwaakwa. Ndîngî kûmwîra oongaongeere njûûrî yaawe aumagare nayo. Naani ndîngî kûmûûragîra o!”

³⁰Zebuli, mûtongeeria wa ntûûra, akwigua ûrîa Gaali aarîrie nî aagwatîrwe ni marûrû.

³¹Aratûmana na witho ntûûreene ya Aruma kîrî Abimeleki aramwîra atîrî, “Gaali mûtaana wa Ebedi na ataana ba ng'ina nî bareejîre Shekemu, na rîu nîka bakuujîîra antû ba ntûûra nîkenda baregana na Waatho bwaaku.

³²Tontû bûû, naarua gwatuka uumagare na antû baaku barîa ûrî nabo, bwîîte bwiciithe kîthakeene.

³³Rûkîîrî, riûa rîauma, bwithûkîre ntûûra. Gaali na antû baawe baumagara kûrwaa naabuî, rîu ûbathithîrie o ûrîa ûkoona kwagîrîte.”

³⁴Abimeleki na antû bonthe barîa aarî nabo nî baumagarîre ûtukû bareeta barakaba ntûûreene ya Shekemu baigaanîtie ikundi bina.

³⁵Gaali mûtaana wa Ebedi nî aaumagarîre ararûngama mpingîroone ya ntûûra. Abimeleki na antû barîa baarî amwe nawe baraumîra kûrîa baakabîte.

³⁶Gaali oona antû bau areera Zebuli atîrî, “Tega, kûrî antû beenamîte baumîte irîmeene!” Îndî Zebuli aramûcokeria atîrî, “Nî irundu birî irîmeene ûkwona bikari ta antû.”

³⁷Gaali arauga o kaîrî atîrî, “Tega! Tîbaarîa antû beenamîte baumîte irîmeene na bangî baumîte bwa muuru jwa Aringia!”

³⁸Zebuli aramûûria atîrî, “Nandî karîkû kanyua karîa ûraugaga nako atî, ‘Abimeleki nîka arî ûû nîkenda tûmûtumîkagîra?’ Anga antû baba tî bo ûramenagîîria? Umagara nandî ûkarwee nabo!”

³⁹Gaali aratongeeria antû ba Shekemu bareeta kûrwaa na Abimeleki.

⁴⁰Îndî Abimeleki areengana nawe amatûki bwa mpingîro ya ntûûra. Nabo antû babaingî ba Shekemu nî baagwîte kunthe mwanka mpingîroone ya ntûûra, nîûntû nî baaeethetue bionje.

⁴¹Abimeleki nî eetîre gûtûûra ntûûreene ya Aruma, nawe Zebuli areenga Gaali na ataana ba ng'ina kuuma Shekemu.

⁴²Rûûneene antû ba Shekemu nî baumagarîre nîkenda beeta miuundeene. Abimeleki aramenyithua mantû jau.

⁴³Nawe arajûkia antû baawe, arabagaania ikundi bithatû, nabo barakabîra antû ba Shekemu kîthakeene. Rîrîa oonere antû bau ba Shekemu baumagarîte ntûûreene, nî bookîrîîre nau baiciithîte nîkenda babaithûkîra.

⁴⁴Abimeleki na gîkundi kîrîa aarî nakîo nî beetîre barakaba mpingîroone ya ntûûra, nabio ikundi birîa bingî biîrî bireengana na barîa bonthe baarî miuundeene bikîbooraaga.

⁴⁵Abimeleki nî aarwîre na antû ba ntûûra îîu mûthenya junthe. Nawe arataa ntûûra, na arooraga antû bonthe barîa baarî ku. Ningî aramîmomoranga buru na aracoka aramîminyaminyîria chumbî.

⁴⁶Nabo antû barîa baatûûraga mûnaareene jwa Shekemu, rîrîa baigîrue mantû jau nî beetîre baratonya, baraiciitha kîromberoone kîa Baali-berithi kîrîa gîaaki kîaarika.

⁴⁷Abimeleki nî aaigîrue atî antû bonthe ba mûnaara jwa Shekemu nî boothûreene amwe.

⁴⁸Tontû bûu nî aaitîrie kîrîmeene kîa Zalimoni amwe na antû bonthe barîa baarî amwe nawe. Arajûkia ntûûru, arauna kîthûûmba gîa nkû, aragîîkîra gîturo. Ningî areera antû barîa aarî nabo ûjû, “Thithangieni na mpwîî o ta ûu bwona ndathithia.”

⁴⁹O muntû arauna nkû kîthûûmba. Nabo barathingata Abimeleki bararûngîkania nkû ciaao na giitiiro kîu. Baracoka barakîîthia. Nabo antû ba mûnaara jwa Shekemu barakua bonthe, antû akuî ngiri îmwe (1,000), aka na arûme.

⁵⁰Ningî Abimeleki aracoka areeta ntûûreene ya Thebezi aramiithûkîra, na aramîtaa.

⁵¹Îndî ntûûreene îîu nî kwaarî na mûnaara jwaaki jwa inya mono. Nabo antû bonthe ba ntûûra îîu aka na arûme baramatûka barakûrûka ku, baraciingîra ndeene, na baraitia îgûrûgûrû.

⁵²Abimeleki nî aakinyîre au mûnaareene eetîte kûjwithûkîra, arakuîrîîria mpingîro nîkenda aîthia mûnaara.

⁵³ Nawe mûka ûmwe nî aamûgwîthîîrie nthie îramwatûra kîongo.

⁵⁴Abimeleki areetanga nthaka îrîa yamûkamatagîra mathaga ja ndwaa aramwîra atîrî, “Cinûra rûchiû rwaaku ûmbûrage gûtîkeeje kwîragwa, ‘Ooragîrwe nî mûka!’” Nayo nthaka îîu îramûkothora na rûchiû, arakua.

⁵⁵Rîrîa antû ba Aisraeli barîa baarî amwe nawe boonere atî Abimeleki agûkua, baraana o muntû nja yaawe.

⁵⁶Ûu nîu Mûrungu aarîîrie Abimeleki ûthûûku bûrîa aathithîrîtie îthe nîûntû bwa kûûraga ataana ba ng'ina mîrongo mûgwanja.

⁵⁷Ningî Mûrungu nî atûmîre antû ba Shekemu bacokerwa nî ûthûûku bwaao bunthe. Nakîo nî kîrumi kîrîa baarumîrwe nî Jothamu, mûtaana wa Gideoni.