Read KIMERU BIBLE PROTESTANT EDITION 2 Joh 1 Bible Online

2 Joh 1 - KIMERU BIBLE PROTESTANT EDITION bible

2 Joh 1

¹Nî ni mûkûrû wa kanisa ngûkwaandîkîra gwe nkatha ya mwekûrû amwe na aana baaku[1] barîa mpendeete mma. Tî ni ninka mbwendeete îndî nî kinya bonthe barîa baijî ûûma,

²tontû bwa ûrîa ûûma bûtûûraga ndeene yeetû na bûgatûûra naatuî kenya na kenya.

³Ûtugi na kîaao na thîîrî, birîa biumaga kîrî Mûrungu Baaba na kîrî Jesû Kristû Mûtaana waawe, birokaraga amwe naatuî mantûûne ja ûûma na ja wendo.

⁴Nî ndaagwîrîrue mono kwona ûrîa aana bamwe baaku bathingatîte ûûma, o ta ûrîa twathîtwe nî Baaba.

⁵ Nandî îgwe mwekûrû ûmwende, ndîkwaandîkîra ngîkûûragia twendanage. Rîu narîo tî rîathana rîrîerû ngûkwaandîkîra, îndî no rîrîa tûtwîre narîo kuuma kîambîrîria atî twendanage.

⁶Wendo bûu nabu nî atî tûtue kwathîkagîra maathana. Rîathana o rîrîa twaeerwe kuuma kîambîrîria atî tûtûûrage tûkîendanaga.

⁷Aritani babaingî ba ûrongo nî bathirîtie kûnyagania nthîgûrûûne kunthe. Bo batîîtîkagia atî Jesû Kristû nî eejîre nthîgûrûûne arî na mwîrî ta muntû. Muntû ûrîa uugaga ûu nî mwaîîrania na nî mûnthû wa Kristû.

⁸Tontû bûû, imenyagîîreni bûtîkeeje kwaga kîrîa bûtwîre kûthangîkîra nîkenda bweewa îtuui rîrîûjûru buru.

⁹O muntû ûrîa ûtîthingataga ûritani bwa Kristû na akauma oome yaabu, atî na Mûrungu. Îndî ûrîa ûrûmagîrîra mooritani jau, arî na ngwatanîro na Baaba na Mûtaana waawe.

¹⁰Tontû bûû, muntû akëeja kwîja kîrî buî ûtîkûritana ûritani bûbû, bûkámûgwateeni ûgeni nyomba cieenu na kinya kûmûkeethia bûkamûkeethia.

¹¹Tontû ûrîa ûkamûkeethia nî agwatanîrîte nawe ngûgîîne îîu yaawe înthûûku.

¹²Ndî na mantû jamaingî nkwenda kûbwîra îndî ntîkwenda kûjaandîka îndî antû a nthithia ûu, nî nkwîrîgîîra nkabûriûngîra na twaranîrie tûrî amwe, nîkenda kûgwîrua kweenu gûkoojûra.

¹³Aana ba mwarî wa nyakwe ûrîa mwende bakûbûkeethia.