Read KIMERU BIBLE PROTESTANT EDITION 3Joh 1 Bible Online

3Joh 1 - KIMERU BIBLE PROTESTANT EDITION bible

3Joh 1

¹ Nî ni mûkûrû wa Kanisa ngûkwaandîkîra gwe Gayo, mûcoore waakwa ûrîa mpendeete mma.

²Mwendwa waakwa, nî nkûromba atî ûtharimwe ndeene ya mantû jonthe na ûkarage ûrî na thîîria ya mwîrî o ta ûrîa nkûmenya nî ûkari bwega ndeene ya roho waaku.

³Nî ndagwîrîrue mono rîrîa akristû bamwe baakinyîre aja barambîîra ûrîa ûrûûmîîrîte ûûma mûtûûrîreene jwaaku na nî mma gwe ûtûûraga ûrûmîîrîte ûûma.

⁴Gûtî ûntû bûngwîragia nkûrûki ya rîrîa nkwigua atî aana baakwa batûûraga ûûmeene.

⁵Mwendwa waakwa, nî ûthithagia bwega mono rîrîa ûgwataga akristû ûgeni, kinya barîa ûtiijî.

⁶Bo nî baarîtie mantû jegiî wendo bwaaku kaniseene aja. Itû bateethie beete na mbere rûgendoone rwaao na njîra îrîa îkagwîria Mûrungu.

⁷Tontû baambîrîîtie rûgendo rwaao rwa gûtumîkîra Kristû baregete ûtethio kinya bûrîkû kuuma kîrî antû barîa batîtîkîtie Mûrungu.

⁸Tontû bûû, tuî nî tûbuîri gûteethia antû baba nîkenda kinya tuî tûgwatanîra nabo ngûgîîne îîu bakûrita nîûntû bwa ûûma.

⁹Nî ndaandîkîîre kanisa îîu barûga înkuî îndî Diotrefe, ûrîa ûcieethagia mûtongeeria waao, atenda kûnthikîîra.

¹⁰Tontû bûû, rîrîa nkeeja, nkaumbûra mantû jonthe jarîa athithagia; mpumbûre mantû jeetû jarîa aaragia agîtûthûûkagia. Atîng'anagîrwa nî bûu bunka akî îndî we wengwa atîgwataga akristû ûgeni na ka arigagîîria barîa beendaga kûgwatana ûgeni na akabeenga kaniseene.

¹¹Mwendwa waakwa, ûkáthingata mîîtîre îmîthûûku, îndî thingataga mîîtîre îmîega. O muntû ûrîa ûthithagia mantû jameega, nî wa Mûrungu îndî ûrîa ûthithagia mantû jamathûûku gûtî rîo aamenya Mûrungu.

¹²Antû bonthe nî baaragia bwega mantû ja Demetiriasi; na kinya ûûma bungwa nî bûkûûjagîîra. Naatuî twingwa nî tûgûkûûjîîra mantû jaawe, naagwe nî wiijî atî ûkûûjî bweetû nî bwa mma.

¹³Ndî na mantû jamaingî nkwenda gûkwîra îndî ntîkwenda gûkwaandîkîra jo.

¹⁴Nî nkwîrîgîîra gûkwona rua, na tûkaaranîria tûrî amwe.

¹⁵Thîîrî îrokaraga amwe naagwe. Ûgûkeethua nî acoore barîa barî naaja. Nkeetheria acoore beetû bonthe.