Read KIMERU BIBLE PROTESTANT EDITION Jud 1 Bible Online

Jud 1 - KIMERU BIBLE PROTESTANT EDITION bible

Jud 1

¹ Nî ni Juda, nthûûmba ya Jesû Kristû na mûtaana wa ng'ina wa Jakubu, nkûbwaandîkîra buî barîa bwîti na bwendi nî Mûrungu Baaba na bûmenyagîîrwa nî Jesû Kristû.

²Kîaao na thîîrî na wendo birokara naabuî kwa wingî.

³Acoore baakwa barîa mpendeete, nî ndîraigîtue ndî na wendi bûbûnene bwa kûbwaandîkîra mantû jegiî wonokio bûrîa twinthe twîthagîrwa tûrî nabu. Nî ndîronere kûrî na ûbatu bwa kûbwandîkîra nkîbûragia bûrwîrîîre wîtîkio bûrîa Mûrungu aanenkeere atheru baawe îgiita rîmwe nîûntû bwa nthukî cionthe.

⁴Nî kwîthîrwaa kûrî antû bamwe barîa batîkîraga Mûrungu baitonyithîtie gatîgatîîne geetû na witho. Antû bau nabo nî bagarûrîte ntûmîîri ya ûtugi bwa Mûrungu weetû na bamîethia kaigwatîrie ga mîîtîre yaao ya ûmaramari na bagakaana Mûnene weetû ûrîa tûrî nawe wenka tawe Mwathani weetû Jesû Kristû. Îndî îkanûkia rîa antû bau nî rîroretue Maandîkoone.

⁵ Rîu ndîenda kûbûririkania mantû jamwe jarîa kinya buî bwiijî bwega. Mwathani nî oonokerie antû ba Israeli aratûma bauma Misri, îndî nyumeene, arathiria barîa baaregere gwîtîkia.

⁶Ririkaneni araîka barîa baaregere kûng'anîrwa nî waathani bûrîa baeei. Mûrungu abeekîte gûntû kwa muundu na batheeki na nyororo cia kenya na kenya mwanka rîrîa Ntukû îrîa nene ya gûtuîrwa îgamba îgakinya.

⁷ Ningî ririkaneni Sodomu na Gomora na ntûûra ingî irîa ciaarî akuî nacio. Antû ba ntûûra iiu baathithagia mantû ja ûthûngîîri na mantû jangî jarîa jatîaganîrîte na ûrîa kwathîri. Bo nî baakanûkîrue na mwanki jwa kenya na kenya na îraa ngerekano ya gûkaania bangî bonthe.

⁸O ûu nou antû bau bakari. Irooto biaao nî bitûmaga beenyangia mîîrî yaao na mantû ja ûmaramari na bakaregana na waathani bwa Mûrungu na ningî bakaruma biûmbe birîa birî ûkumio.

⁹ Kinya mûraîka ûrîa mûnene, Mikaeli, rîrîa aarûjaga na Nkoma nîûntû bwa mwîrî jwa Musa, atoomîrîa kûmûruma. Ka aamwîrîre akî: “Nî Mwathani ûgagûkanûkia.”

¹⁰Îndî ngûgî ya antû baba nî kûruma na kûthûmbia ûntû o bunthe bûrîa batîkûmenya gîtûmi kîaabu. Bathingataga mantû jarîa baijî kuumania na ûûme bwaao bwa mûciarwa ta ûrîa nyomoo ithithagia mwanka bakeenyanga.

¹¹ Wûûi kîrî bo! Tontû bathingatîte njîra ya Kaini. Tontû bwa kwenda mbeecha, batonyete maatieene ta jarîa ja Balaamu. Antû bau nî baregete kwathîka o ta ûrîa Kora aathithîrie na bakaûra o tawe.

¹²Rîrîa antû bau beeja biathoone bieenu, bakari ta ithûmba bia rûko. Baimenyagîîra bonka akî. Bakari ta matu jaurutîtue nî ruuo îndî jatiuraga. Bo bakari ta mîtî îtî maciara kinya îgiita rîaayo rîa gûciara rîakinya; ta mîtî îringi nthî, bo nî bakuîte buru.

¹³Antû bau bakari ta mîgombe îmînene ya îria tontû bwa mathithio jaao ja nthao. Bakari ta njota irîa ciereraga o ûu ûtheri, Mûrungu aciîkîrîte gûntû gwaacio gwa gûtûûra muunduune jûmûnene jwa kenya na kenya.

¹⁴ Enoki, tawe ûrîa waatwîre nthukî ya mûgwanja kuuma îgiita rîa Adamu, nî aarorerie na arauga, “Thikîîreni, Mwathani nî eejîte na araîka baawe babatheru ngiri na ngiri,

¹⁵eejîte kûgambithia antû bonthe, agatuîra bûbûûî bonthe barîa batîkîraga Mûrungu nîûntû bwa ngûgî ciaao cia ûmaramari, na tontû bwa ndwaria ciaao inthûûku irîa baarîtie bakîmûtengûraga!”

¹⁶Antû baba bakaraga bakînung'unaga magiita jonthe na batiigagua bang'anîri; baathagwa nî mairîrîîria jaao jamathûûku. Bo baikumagia mono na bagakathîrîria antû bangî mono bakîenda kûgunîka.

¹⁷Îndî buî, eendwa baakwa, ririkaneni mantû jarîa atûmwa ba Mwathani weetû Jesû Kristû baabwîrîre.

¹⁸ Baabwîrîre ûjû, “Ntukû cia mûthia ciakinya gûkeeja antû ba kûbûcikûûra, barîa baathagwa nî mairîrîîria jaao jamathûûku.”

¹⁹Antû bau nîbo bareetaga mbathûkano na batongagîîrua nî mairîrîîria ja mwîrî na batî Roho wa Mûrungu ndeene yaao.

²⁰Îndî buî acoore baakwa, îteni na mbere gûciaka bwee baboojûru buru ndeene ya wîtîkio bweenu bûbûtheru. Rombageni bûgîteethagua nî Roho Ûmûtheru.

²¹Ningî karageni bwendeete Mûrungu magiita jonthe na bweteerete Mwathani weetû Jesû Kristû, ûrîa nîûntû bwa kîaao kîaawe ûkabûaa ûtûûro bwa kenya na kenya.

²²Igagîîrueni barîa barî na nkaanja wîtîkioone bwaao kîaao.

²³Onokagieni bangî bûkîbatharaga kuuma mwankiine; na kinya bangî bûbaigîîrue kîaao kîrî na ûguaa, îndî bûthûûrage kinya nguû ciaao ciongwa irîa ithirîtie gwîkîrwa mûgiro nî mairîrîîria jaao jamathûûku ja mwîrî.

²⁴Kîrî we ûrîa wenka ûûmba kûbûmenyeera bûtîkeeje kûgwaa na abwikie bûgwîrîtue na bûtî na kagi mbere ya mwago jwaawe,

²⁵kîrî ûu wenka, tawe Mûrungu Mwonokia weetû, ndeene ya Mwathani weetû Jesû Kristû, arokara na ûkumio na ûnene na waathani bwa inya kuuma tene na nandî na kenya na kenya. Amen.