Read KIMERU BIBLE PROTESTANT EDITION Kûg 1 Bible Online

Kûg 1 - KIMERU BIBLE PROTESTANT EDITION bible

Kûg 1

¹Mantû jaja jaandîki yukuune rîrî nî kûguûrîrwa kwa Jesû Kristû kûrîa Mûrungu aamûnenkeere. Aamûnenkeere nîkenda akaguûrîra nthûûmba ciaawe mantû jarîa jengeerie kûthithîka, îgiita rîtî kûraaja. Rîu Kristû aratûma mûraîka waawe nîkenda amenyithia Johana nthûûmba yaawe mantû jaja.

²Johana nawe nî eranîte mantû jonthe jarîa oonere jegiî rûteto rwa Mûrungu na ûkûûjî bwa Jesû Kristû.

³Kîtharimo nî kîrî muntû ûrîa ûthomaga yuku rîrî, na nî batharimi barîa bathikagîîra nteto cia ûroria bûbû na bakathîkîra jarîa jaandîki ku. Tontû îgiita rîrî akuî rîrîa mantû jaja jakathithîka.

⁴ Nî ni Johana nkwaandîkîra kanisa mûgwanja irîa irî Asia. Ûtugi na thîîrî birokara naabuî kuuma kîrî Mûrungu ûrîa ûrîo na ûrîa warîo na nîwe ûrîa ûkeeja; na kuuma kîrî roho mûgwanja irîa ikaraga mbere ya rûriga rwaawe rwa ûnene,

⁵ ningî kuuma kîrî Jesû Kristû, mûkûûjî mwîtîkîkua, ûrîa waarî wa mbere kûriûkua kuuma kîrî barîa bakuîte, na nowe mwathi wa anene ba nthîgûrû. We nî atwendeete na nî atûthaûrîte kuuma meeyiene jeetû na njîra ya tharike yaawe,

⁶ na aratweethia ba ûnene na athînjîri-Mûrungu ba gûtumîkîra Mûrungu Îthe. Jesû Kristû arokumagua na arokaraga na inya yonthe kenya na kenya. Amen.

⁷ Raithîrieni! Nî eejîte arî matuune! Antû bonthe bakamwona, kinya barîa baamûmuntangîre bakamwona. Mîgongo yonthe ya nthîgûrû îgakaya rîrîa îkamwona. Amen.

⁸ “Nî ni Alfa na Omega,” ûu nîu Mwathani Mûrungu akuuga, ûrîa ûrîo na ûrîa waarî o na ûrîa ûkeeja; nî ni Mweneinya yonthe.

⁹Nî ni Johana, mûtaana wa abaagu ûrîa ûrî mûthingati wa Jesû. Nî ngwatanîrîte naabuî kûûmîîria mîthangîko îrîa îjagîîra barîa barî ba ûnene bwaawe. Ndathaamîîrue gîcîgîrioone kîa Patimo nîûntû bwa gûtûmîîria rûteto rwa Mûrungu na gûkûûjîîra Kristû.

¹⁰Kûrî ntukû ya Mwathani, nî ndeejîrîrwe nî Roho na ndîraigua kajû gakanene gakûgamba ta tarumbeta bwa nyuma yaakwa. Kajû kau karambîîra,

¹¹“Aandîka jarîa ûkwona yukuune na ûtûmîre kanisa irîa mûgwanja. Nacio nî Efeso na Simurina na Perigamo na Thiatira na Saride na Filadefia na Laodîkia.”

¹²Ndîragarûka nîkenda mbona ûrîa wambaragîria. Ndîkûgarûka ndîroona itugî mûgwanja bia kûrîkîîra taawa birîa biathithîtue na thaabu.

¹³ Gatîgatî ga itugî biu bia kûrîkîîra taawa nî kwaarî na gîntû gîakari ta mûtaana wa muntû, eekîrîte rwambambio rûrîa rwakinyaga makinyeene jaawe, na nî aarî na mûcibi jwa thaabu jwaogeeri kîbareene kîaawe.

¹⁴ Nciûri cia mûtwe jwaawe cierûîte ta bamba kana ta nkamia. Meetho jaawe najo jathaaraga ta rûmûrî rwa mwanki.

¹⁵ Magûrû jaawe najo jeenagia ta îtûrutia rîrîa rîkembi na rîathambua na mwanki. Kajû kaawe nako gakari ta mûruumo jwa ndurumo ya rûûjî.

¹⁶Nî aagwete njota mûgwanja njareene yaawe ya ûrîo. Rûchiû rûrûûgî rûnoori nteere cio-ijîîri nî rwaumîîrîte kanyueene kaawe. Nabu ûthiû bwaawe nî bwathaaraga ta riûa mûthenya barigici.

¹⁷ Rîrîa ndamwonere, nî ndaagwîre nthî magûrûûne jaawe nkari ta muntû ûmûkuû. Îndî we arandîîkîra njara yaawe ya ûrîo arambîîra, “Ûgákîra! Nî ni kîambîrîria na nî ni mûthia.

¹⁸Nî ni ûrîa ûtûûraga. Nî ndaakuîte îndî ntûûraga mwoyo kenya na kenya. Ndî na inya ya kwatha gîkuû o na gûntû kwa antû barîa bakuîte.

¹⁹Tontû bûû, aandîka mantû jarîa ûkwona: jarîa jakûthithîka nandî na jarîa jakathithîka nyumeene.

²⁰Witho bwa mantû ja njota irîa mûgwanja irîa ûkwona njareene yaakwa na itugî mûgwanja bia thaabu bia kûrîkîîra taawa nî bûbû: njota iu mûgwanja nî araîka ba kanisa mûgwanja, nabio itugî bîu mûgwanja bia kûrîkîîra taawa nî kanisa o iu mûgwanja.”