Read KIMERU BIBLE PROTESTANT EDITION Kûg 10 Bible Online

Kûg 10 - KIMERU BIBLE PROTESTANT EDITION bible

Kûg 10

¹Rîu ndîroona mûraîka ûngî ûrî inya mono eenamîte kuuma bwa îgûrû. Eekîrîte îtu rîrî nguû yaawe na aathiûrûki nî mûkûngambura mûtwe jwaawe. Ûthiû bwaawe bwathaaraga ta riûa na magûrû jaawe jaakari ta itugî bia mwanki.

²Nî aagwete gauku njareene yaawe gakunûri. Nawe arakinyithia kûgûrû kwaawe kwa ûrîo îrieene na kwa ûmotho nthî înjûmo.

³Rîu areetana na kajû gakanene gakari ta ka ngatûnyi îkûruruma. Rîrîa eetanîre, ngorogoro mûgwanja nî cia gondokere.

⁴Rîrîa ngorogoro iu cia gondokere, nî ndaarî akuî kwaandîka mantû jarîa ciaugîre. Îndî ndîraigua kajû kuuma îgûrû gakiugaga, “Mantû jarîa jaarua nî ngorogoro iu mûgwanja nî witho; ûkájaandîka!”

⁵ Nawe mûraîka ûrîa ndoonete arûngamîte îrieene na nthîgûrû înjûmo, arookîîria njara yaawe ya ûrîo bwa îgûrû.

⁶Nawe araciîtia riîtweene rîa Mûrungu ûrîa ûtûûraga mwoyo kenya na kenya, ûrîa woombîre îgûrû na nthîgûrû o na îria na bionthe birîa birî ku. Mûraîka ûu arauga, “Mûrungu atîthaa kaîrî!

⁷Îndî rîrîa mûraîka wa mûgwanja akaringa tarumbeta yaawe, Mûrungu akoojûria mûbango jwaawe jwa witho o ta ûrîa eerîte nthûûmba ciaawe, tacio iroria.”

⁸ Rîu kajû karîa ndaarî ndîkwigua kuuma bwa îgûrû karaaria naani kaîrî karambîîra, “Îta ûjûkie gauku karîa gakunûri karîa karî njareene ya mûraîka ûu ûrûngamîte akinyîte îria na nthî înjûmo.”

⁹Naani ndîreeta kîrî mûraîka ûu na ndîramwîra anenkere gauku kau. Mûraîka ûu arambîîra, “Jûkia na ûkarîe. Gakeethîrwa karî na mûrîo ta nainchû karî kanyueene gaaku îndî gakeethîrwa karî na ng'ana gaakinya kîu gîaaku.”

¹⁰Ndîrajûkia gauku kuuma njareene ya mûraîka na ndîrakarîa. Kareethîrwa karî na mûrîo ta nainchû karî kanyueene gaakwa, îndî ndathiria gûkameria, kîu gîaakwa kîraigua ng'ana.

¹¹Rîu ndîreerwa ûjû, “No mwanka ûrorie mantû jegiî kîrîndî na mîgongo na antû ba nthiomi cionthe na anene.”