Read KIMERU BIBLE PROTESTANT EDITION Kûg 11 Bible Online

Kûg 11 - KIMERU BIBLE PROTESTANT EDITION bible

Kûg 11

¹ Rîu ndîranenkerwa mûchuuma jûrîa jûtumagîrwa kûthima jûkari ta rûturo. Ndîreerwa, “Îta ûthime kîûrû kîa Mûrungu na kîritîro kîa igongwana na ûtare antû barîa bakûthaathayia Mûrungu ku.

² Îndî ûkáthima kîarago kîrîa gîcîgîîrîîtie kîûrû nîûntû kîeei antû barîa batî Ayahudi na bagakinyanga ntûûra întheru îgiita rîa mîeri mîrongo îna na îîrî.

³Naani ngatûma akûûjî baakwa baîrî beekîrîte ithango. Nabo bakaroria ntukû ngiri îmwe na magana jaîrî na mîrongo îtantatû.”

⁴ Akûûjî bau nîbo mîzeituni îrîa îîrî na itugî bîa kûrîkîîra taawa birîa biîrî birîa birûngamaga mbere ya Mwathani wa nthîgûrû.

⁵Muntû ûrëeja kûgeria kûbathithîria bûbûûî, mwanki jûkauma tûnyueene twa akûûjî bau jûthirie anthû baao. Ûu nîu muntû ûrîa ûkageria kûbathithîria ûthûûku akooragwa.

⁶ Bau bobaîrî barî na inya ya kwiinga îgûrû gûtiure îgiiteene rîrîa bakeethîrwa bakîroragia. Ningî bakeethîrwa barî na inya ya kûgarûra rûûjî rwaa tharike na inya ya kûthangîkia nthîgûrû na ikanûkia bia mîthemba yonthe magiita jonthe jarîa bareenda.

⁷ Rîu bathiria kûroria, nyomoo îrîa îkeethîrwa yumîte îrinyeene rîrîa rîorokeru mono, îkarwaa nabo na îboombe na îboorage.

⁸ Biimba biaao bigakara njîreene ya ntûûra iu Mwathani waao aambîrwe. Riîtwa rîa ntûûra îîu rîrîgerekanua na Sodomu kana Misri.

⁹Antû kuuma mîîrîga na nthiomi cionthe na mîgongo yonthe bakeeja kwoona biimba biaao ntukû ithatû na nusu.

¹⁰Kîrîndî kîa nthîgûrû gîkagwîrua nîûntû bwa gûkua kwa antû bau bobaîrî. Nabo bagakûngûîra bagwîrîtue na bakîeejanaga biewa nîûntû iroria biu bio-biîrî biratûûraga kûthangîkia kîrîndî kîonthe kîrîa gîtûûraga nthîgûrû.

¹¹ Îndî nyuma ya ntukû iu ithatû na nusu, mîrukî ya ûtûûro kuuma kîrî Mûrungu nî yaatonyere ndeene ya iroria biu nabio birariûka na bonthe barîa baabonere baragwatwa nî ûguaa bûbûnene mono.

¹² Rîu iroria biu biraigua kajû gakanene kaumîte bwa îgûrû gakîbeera, “Njûûni gûkû îgûrû!” Nabo baraitia îgûrû barî îtuune anthû baao babategeete.

¹³ Îgiita rîu rîongwa nthîgûrû îrainaina mono, na gîchunchî kîmwe kuuma kîrî îkûmi gîa ntûûra kîrenyangua. Antû ngiri mûgwanja barakua rîrîa kwainainîre. Kîrîndî kîrîa gîatigarîre kîragwatwa nî ûguaa na kîrakumia Mûrungu wa Îgûrû.

¹⁴Mîthangîko ya ijîîrî îkûthira, îndî atîrî, mîthangîko ya jathatû yeengerie kwîîja.

¹⁵ Rîu mûraîka wa mûgwanja araringa tarumbeta yaawe. Kûraigîîgua tûjû îgûrû tûkiugaga, “Ûnene bwa nthîgûrû bûkwaa bwa Mwathani weetû na bwa Kristû waawe. Nawe agatûûra kwaathanaga kenya na kenya!”

¹⁶Akûrû barîa mîrongo îîrî na bana barîa bakarîrîte ndûriga ciaao mbere ya Mûrungu baraturia maru na barenamîîria moothiû jaao nthî na barathaathayia Mûrungu,

¹⁷bakiugaga, “Nî tûgûgûcokeria nkaatho gwe Mwathani Mûrungu Mweneinya, ûrîa ûtwîre na no gwe watwîre nîûntû ûkujûkia inya yaaku înene na wambîrîria kwaathana.

¹⁸ Antû ba mîgongo nî baarî na marûrû mono, nîûntû bwa ûrîa îgiita rîa mûthûûro jwaaku rîakinya, îgiita rîa akuû kûgambithua rîgûkinya. Îgiita rîgûkinya rîa kwaa nthûûmba ciaaku na iroria na atheru îtui, na bonthe barîa bagûkîraga; baanene o na baanini. Îgiita rîa kwînyangia barîa beenyangagia nthîgûrû rîgûkinya!”

¹⁹ Rîu kîûrû kîa Mûrungu kûu îgûrû kîrarugûka. Îthandûkû rîa Maathana rîroonwa rîrî kûu kîûrûûne kîaawe. Îgiita rîu kûragîa ndweeni na tûjû na mîrurumo ya ngorogoro na kwinaina kwa nthî na ngai ya nchûgû.