Read KIMERU BIBLE PROTESTANT EDITION Kûg 12 Bible Online

Kûg 12 - KIMERU BIBLE PROTESTANT EDITION bible

Kûg 12

¹Kûroonekana gîûntû gîa kûrigaria mono îgûrû. Kûrooneka mûka weekîrîte riûa rîrî nguû yaawe, na akinyithîtie magûrû jaawe mweriine na eekîrîte thirû yaathithîtue na njota îkûmi na ijîîrî mûtwe jwaawe.

²Mûka ûu aarî ûmûrito na aarî akuî kûewa kaana, nawe nî aikaagîra nîûntû bwa rwakaî rwa kûewa kaana.

³ Ningî kûroonekana gîûntû kîngî kûu îgûrû. Nayo yaarî nkûnga întuune na înene mono. Nayo nî yaarî na biongo mûgwanja na ngoji îkûmi, na o kîongo nî kîaarî na thirû.

⁴ Kînyiritha kîaayo kîreegera gîchunchî kîmwe kîrî bithatû kîa njota cia îgûrû kîraigwîthia nthîgûrû. Nkûnga îîu îrarûngama mbere ya mûka ûu waarî akuî kûewa kaana, nîkenda îkarîa agaciara.

⁵ Mûka ûu araciara kaîjî nako nîko kabuîri kwatha mîgongo yonthe ya nthîgûrû gatî na kîaao. Îndî kaana ka mûka ûu karatharwa karaikua îgûrû kwa Mûrungu na rûrigeene rwaawe.

⁶Nawe mûka ûu aramatûka areeta rwanda kûrîa Mûrungu aamûthuranîrîte, gwa gwîta kûmenyeerwa akîreragwa bwega ntukû ngiri îmwe na magana jaîrî na mîrongo îtantatû.

⁷ Rîu ndwaa îrooka kûu îgûrû ya Mikaeli na araîka baawe bakîrwaga na nkûnga amwe na araîka baayo.

⁸Nkûnga na araîka baayo baracindwa. Tontû bûû, baraaga gîkaro kûu îgûrû.

⁹ Nayo nkûnga, tayo njoka îrîa ya karaaja îrîa îtagwa Nkoma na noyo Shaitani, na noyo mwaîîrania wa nthîgûrû yonthe, areengwa kuuma îgûrû. Nawe aragerwa nthîgûrû amwe na araîka baawe.

¹⁰ Naani ndîraigua kajû kûu îgûrû gakiugaga, “Wonokio na inya na ûnene bwa Mûrungu weetû na waathi bwa Kristû bûgûkinya. Tontû ûrîa ûrathitangaga ataana na aarî ba baaba ûtukû na mûthenya kîrî Mûrungu akwarûkua nthîgûrû.

¹¹Ataana na aarî ba baaba baamûcindîre nîûntû bwa tharike ya Gatûrûme na ûkûûjî bwaao nîkwîthîrwa nî beetîkîîrîtie kwirita bakua.

¹²Tontû bûû, buî îgûrû na barîa batûûraga ku gwîrueni. Îndî wûûi kîrî nthîgûrû na îria! Tontû Nkoma akwîîja kîrî buî athûûri mono nîûntû nî akûmenya atî îgiita rîaawe rîrîa rîtigeere nî rîrîkai.”

¹³Rîrîa Nkûnga îîu yaaciûkîîrwe atî îkwarûkua kuuma îgûrû yeeja nthîgûrû, nî yeenganîre na mûka ûrîa waciarîte kaîjî.

¹⁴ Mûka ûu araaewa mathagu ta ja ndiiû înene nîkenda aburûûka mwanka rwanda, antû arîa aarî akamenyagîîrwa na kûrererwa mîaka îthatû na nusu, atîkeeje kûûragwa nî nkûnga.

¹⁵Rîu nkûnga îragera rûûjî rûrwingî ta mûuro kuuma kanyua kaayo nîkenda îgakondoria mûka ûu.

¹⁶Îndî nthîgûrû îrateethia mûka. Îraagamia kanyua kaayo îrameria rûûjî rûu rwaumîre kanyua ga nkûnga.

¹⁷Nkûnga îrathûûra mono nî mûka ûu na îreeta kûrwaa na aana bangî baawe. Aana bau nî barîa bonthe bathîkagîra maathana ja Mûrungu na barîa bakûûjagîîra Jesû.

¹⁸Nayo nkûnga îîu îrarûngama rûteere rwa îria.