Read KIMERU BIBLE PROTESTANT EDITION Kûg 14 Bible Online

Kûg 14 - KIMERU BIBLE PROTESTANT EDITION bible

Kûg 14

¹ Rîu ndîroona Gatûrûme karûngi kîrîmeene gîa Zaiûni karî na antû ngiri îgana rîmwe rîa mîrongo îna na inya barîa baandîki riîtwa rîaako na rîa Îthe moothiûûne jaao.

²Ndîraigua kajû ta ka mûrurumo jwa ndûûjî inyingî kana ta ngorogoro înene mono kaumîte bwa îgûrû. Kajû kau ndaaigîrue kagambaga ta karîa kaumaga kînandeene rîrîa gîkûringwa nî aini.

³Nabo nî baainaga rwîmbo rûrwerû barî mbere ya rûriga rwa ûnene na mbere ya biûmbe birîa bina birî mwoyo na mbere ya akûrû. Gûtî antû bangî boombaga kûrwina tiga antû bau ngiri îgana rîmwe rîa mîrongo îna na inya barîa bakûûri kuuma nthîgûrûûne.

⁴Antû bau nî barîa batathengeera aka, na tontû bûû nî baarî babatheru. Bau nîbo baathingatanaga na Gatûrûme o kunthe kûrîa geetaga. Ningî nîbo barîa baakûûrîtwe kuuma kîrî kîrîndî kîonthe kîa nthî, bakari ta maciara ja mbere kîrî Mûrungu na kîrî Gatûrûme.

⁵ Gûtîrio baaria ûrongo na batî îgi.

⁶Ningî ndîroona mûraîka ûngî aburûûkîrîte manganyoni. Aarî na Nteto Injega cia kenya na kenya cia gûtûmîîria kîrî barîa batûûraga nthîgûrû: kîrî mîgongo na mîîrîga yonthe na nthiomi cionthe na kîrî kîrîndî kîonthe.

⁷Nawe arauga na kajû gakanene, “Kîreni Mûrungu na bûmûkumagie! Nîkwîthîrwa îgiita rîaawe rîa kûgambithania rîgûkinya. Thaathayieni we ûrîa wombîre îgûrû na nthî na aroomba îria na ithima birî ndûûjî.”

⁸ Mûraîka ûngî wa baîrî arathingatîîria akiugaga, “Îkûgwa, Babiloni îrîa ijîkeene mono îkûgwa. Nîyo îtûmîte antû ba mîgongo yonthe ya nthîgûrû banyua ndibei ya ûthûngîîri bwaayo!”

⁹Mûraîka ûngî wa bathatû areeja nyuma ya bau ba mbere baîrî agîtûmagîîria na kajû gakanene ûjû, “O muntû ûrîa ûkathaathayia nyomoo îîu na mûng'uanano jwaayo na eethîrwe eekîri rwano rwaayo ûthiûûne kana njareene yaawe,

¹⁰ kinya we agakanûkua nî mûthûûro jwa Mûrungu jûrîa jûkari ta gîkombe kîrî na ndibei îtîringîtue. Akathangîkua na mwanki jwa ûbiriti au mbere ya araîka ba Mûrungu barîa batheru na mbere ya Gatûrûme.

¹¹ Toogi kuuma mwanki jûu jwa kûbathangîkia îgaitagia bwa îgûrû kenya na kenya. Nabo barîa bathaathagia nyomoo îîu na mûng'uanano jwaayo na barîa beetîkîîrîtie gwîkîrwa rwano rwa riîtwa rîaayo, batîona kiûrûko mûthenya na ûtukû.”

¹²Tontû bûû antû ba Mûrungu, barîa bathîkagîra maathana jaawe na beetîkîtie Jesû Kristû, babuîri kûûmîrîria.

¹³Rîu ndîraigua kajû kuuma bwa îgûrû gakiugaga, “Aandîka jaja: Kîtharimo nî kîrî antû barîa bagakua bagwatanîrîte na Mwathani kwambîrîria nandî gwîta na mbere.” Rîu Roho arauga, “Nî mma nî baatharimi! Bakagwîrua nî kûnogoka kuuma ngûgîîne ciaao indito. Nîkwîthîrwa mathithio jaao jakabathingata.”

¹⁴ Ningî ndîroona îtu rîrîerû cwee. Au îgûrû rîa îtu nî kwaarî na we ûrîa wakari nthî wakari ta Mûtaana wa Muntû. Nawe aarî na thirû ithithîtue na thaabu mûtwe jwaawe na nî aagwete gachiû gakoogî ga gûketha njareene yaawe.

¹⁵ Mûraîka ûngî arauma kîûrûûne. Aratûmîîria na kajû gakanene areera ûu wakari nthî îgûrû rîa îtu atîrî, “Itû tûmîra gachiû gaaku nîûntû îgiita rîa maketha rîgûkinya. Kîmera nî gîkinyîtie rîa gûkethwa.”

¹⁶Rîu ûu wakari nthî au îgûrû rîa îtu araikia gachiû kaawe îgûrû rîa nthîgûrû, na kîmera kîrîa kîaarî nthîgûrû kîrakethwa.

¹⁷Ningî mûraîka ûngî arauma kîûrûûne kûu Îgûrû kinya we arî na gachiû gakoogî ga gûketha.

¹⁸Rîu mûraîka ûngî araumîîra kîritîroone kîa igongwana. Mûraîka ûu nîwe waarî na inya ya kwatha mwanki. Nawe araaria na kajû gakanene na areera mûraîka ûrîa waarî na gachiû gakoogî atîrî, “Tumîra gachiû gaaku, ûthûranie imanja bia nzabibû cia miuunda îrîa îrî nthîgûrû tontû nzabibû nî iguundi.”

¹⁹Tontû bûû mûraîka ûu araikia gachiû kaawe îgûrû rîa nthîgûrû na araketha nzabibû cionthe. Aragera nzabibû iu îtîîrine rîa gûkinyangîra nzabibû rîa mûthûûro jwa Mûrungu.

²⁰ Nacio nzabibû irakinyangîrwa gîtîîrine gîa gûkinyangîrwa oome ya ntûûra. Tharike îreenama ta mûuro kuuma îtîîrine rîu ûraaja bwa kilomita magana jathatû na kworokera akuî mita ijîîrî.