Read KIMERU BIBLE PROTESTANT EDITION Kûg 16 Bible Online

Kûg 16 - KIMERU BIBLE PROTESTANT EDITION bible

Kûg 16

¹Rîu ndîraigua kajû gakanene kuuma kîûrûûne gakîîraga araîka bau mûgwanja ûjû, “Îteeni na bwîtûûre mûthûûro jwa Mûrungu jûrîa jûrî mpakûriine iu mûgwanja nthîgûrûûne.”

² Tontû bûû mûraîka wa mbere areeta na aretûûra mûthûûro jûrîa jwaarî mpakûriine yaawe nthîgûrûûne. Nabo antû barîa baarî na rwano rwa nyomoo o na barîa bathaathagia mûng'uanano jwaayo barauma ironda bibithûûku birîa biaarî na rwakaî rûrûnene mono.

³Mûraîka wa baîrî aretûûra mûthûûro jûrîa jwaarî mpakûriine yaawe îrieene. Îria rîrakara ta tharike ya muntû ûkuîte na gîntû kîonthe kîrîa kîaarî mwoyo kîrîa gîtûûraga îrieene kîrakua.

⁴ Mûraîka wa bathatû aretûûra mûthûûro jûrîa jwaarî mpakûriine yaawe mîuroone na ithimeene bia rûûjî. Ndûûjî cionthe iraa tharike.

⁵Rîu ndîraigua mûraîka ûrîa mûnene mantûûne ja ndûûjî auga, “Îgwe ûrîa Mûtheru, gwe ûrîa ûtwîre na watwîre! Ûu wagiita îgamba nî îota na nî kwagîrîte.

⁶Bo nî beetûrîre tharike ya atheru na ya iroria, naagwe ûkûbaa tharike bamînyua. Ûkûbaa îtui rîaao!”

⁷Ningî ndîraigua kajû kuuma kîritîro kîa igongwana gakiugaga, “Îî Mwathani Mûrungu Mweneinya! Ûu wagiita îgamba nî îota na nî kwagîrîte!”

⁸Rîu mûraîka wa bana aretûûra mûthûûro jûrîa jwaarî mpakûriine yaawe riûeene. Riûa rîreetîkîîrua kûîthia antû na mwanki.

⁹Antû baraîîthua nî riûa mono, nabo bararuma riîtwa rîa Mûrungu ûu waarî na inya ya kwatha ikanûkia biu. Ningî batairirîre meeyia jaao kana bakumia Mûrungu.

¹⁰ Mûraîka wa batano aretûûra mûthûûro jûrîa jwaarî mpakûriine yaawe rûrigeene rwa ûnene rwa nyomoo. Ûnene bwaayo bûrakunîkwa nî muundu. Antû bararûmanga ndûûme ciaao tontû bwa rwakaî rûrîa baigagua.

¹¹Nabo bararuma Mûrungu wa îgûrû nîûntû bwa ûrîa baarî na ironda na rwakaî rûrwingî na batairirîre maatia jaao.

¹² Mûraîka wa batantatû aretûûra mûthûûro jûrîa jwaarî mpakûriine yaawe mûuroone jwa Eufurate. Rûûjî rwa mûuro jûu rûraawa na kûrooma nîkenda anene ba kuuma bwa gaiti boona agwîtîîra.

¹³Rîu ndîroona roho inthûûku ithatû ikari ta biûra: îmwe îrauma kanyueene ga nkûnga na îngî kanyueene ka nyomoo na îngî îraûma kanyueene ka kîroria kîa ûrongo.

¹⁴Tontû roho inthûûku iu nî irîa iringaga biama na nîcio iriûngagîra anene bonthe ba nthîgûrû na ikîbothûranagia nîkenda bageeta ndweene Ntukû îîu înene ya Mweneinya Mûrungu.

¹⁵ “Thikîîreni, ni nkeeja ta mwamba! Kîtharimo nî kîrî muntû ûrîa ûtîaua nî toro na ethîrwe ekîrîte nguû ciaawe atîkeeje kuuma arî kîthûnû athawa!”

¹⁶ Rîu roho iu iroothûrania anene bau gûntû gweetagwa na Kîhibirania Amagedoni.

¹⁷Rîu mûraîka wa mûgwanja aretûûra mûthûûro jûrîa jwaarî mpakûriine yaawe ruuoone. Kajû kuuma rûrigeene rûrîa rwaarî ndeene ya kîûrû karauga, “Bûkûûjûra!”

¹⁸ Kûragîa ndweeni na tûjû na ngorogoro na nthîgûrû îrainaina mono ûrîa gûtooneka kaîrî kuuma rîrîa muntû oombîrwe! Kûu kwaarî kwinaina kwa nthîgûrû gûkûnene mono!

¹⁹ Ntûûra iu îraathûkana ichunchî bithatû. Nacio ntûûra cionthe irîa nene cia nthîgûrû ireenyanga. Mûrungu araririkana Babiloni îrîa yaijîkeene mono na aramînyuithia gîkombe kîa marûrû jaawe ja mûthûûro.

²⁰ Icîgîîrio birarima na irîma bitoonekana kaîrî.

²¹ Ngai înene ya nchûgû irîa ciaarî na ûrito bwa kilo mîrongo îtaano îraura. Nchûgû iu kuuma îgûrû iragwîra antû nabo bararuma Mûrungu tontû bwa ikanûkia rîu rîa ngai ya nchûgû. Îkanûkia rîu rîaarî rîa kûmakania mono.