Read KIMERU BIBLE PROTESTANT EDITION Kûg 17 Bible Online

Kûg 17 - KIMERU BIBLE PROTESTANT EDITION bible

Kûg 17

¹ Rîu ûmwe wa araîka barîa mûgwanja barîa baarî na mpakûri mûgwanja arambîîra, “Njû ngakwonie mûmaraya ûrîa wijîkeene mono, nayo nî ntûûra înene îrîa yaakîtwe akuî na mîuro îmiingî, agîkanûkua.

² Anene barîa bathanaga nthîgûrû nî bathûngîîrîte nawe na antû barîa batûûraga nthîgûrû nî bogitîtue nî ûthûngîîri bwaawe.”

³ Roho aranjûkia, nawe mûraîka arankamata arambikia rwanda. Kûu ndîroona mûka wakarîrîte nyomoo întuune ta tharike. Mwîrî jwaayo jwaandîki irumi bia kûruma Mûrungu bibingî mono. Ningî yaarî na biongo mûgwanja na ngoji îkûmi.

⁴ Mûka ûû nî eekîrîte nguû cia mûkû na intuune. Aigemetie na into bia thaabu na twiga twa goro na thîgîra. Ningî nî aagwete gîkombe kîa thaabu kîrîa kîojûri mantû jamaaî na rûko rwa ûmaramari bwaawe.

⁵Ûthiû bwaawe bwaandîki riîtwa rîa witho. Riîtwa rîu nî, “Babiloni îrîa ijîkeene mono na ng'ina wa maraya jonthe o na mantû ja nthîgûrû jarîa mathûûku.”

⁶Ningî ndîroona mûka ûu oogitîtue nî tharike ya atheru o na ya antû barîa booragîtwe nîûntû bwa wîtîkio bwaao ndeene ya Jesû. Rîrîa ndoonere mûka ûu ndîrarigara mono.

⁷Îndî mûraîka arambûûria, “Nîkî tontû ûrigarîte? Ngakwîra witho bwegiî mûka ûûjû na bwa nyomoo îrîa îmûkamatîte îrîa îrî na biongo mûgwanja na ngoji îkûmi.

⁸ Nyomoo îîu wonere kûrîrîo yaatwîre mwoyo îndî nandî îtîtûûraga mwoyo. Yengeerie gwitia yuume îrinyeene rîrîa rîorokeru mono îîte îkathirue. Antû barîa batwîre nthîgûrû, barîa mariîtwa jaao jatîaandîki yukuune rîa ûtûûro kuuma rîrîa nthîgûrû yoombîrwe, bakarigara boona nyomoo îîu nîûntû kûrî îgiita yaarî mwoyo îndî nandî îtîtûûraga mwoyo na îkaumîra kaîrî.

⁹“Ûntû bûbû bûrîenda muntû eethîrwa arî ûmûciûku na arî ûmûûme. Biongo biu mûgwanja nî irîma mûgwanja birîa mûka ûu akari nthî îgûrû rîaabio.

¹⁰Ningî nî anene mûgwanja; batano kîrî bo nî bathirîtie gûcindwa na ûmwe nîwe ûtigeere akîathanaga na ûngî atîrakinyia rîa kwîja. Rîrîa akeeja atîathana îgiita rîrîraaja.

¹¹Nayo nyomoo îîu yaatwîre mwoyo îgiita rîmwe na nandî îtîtwîre mwoyo, nîyo îkeethîrwa îrî mûnene wa banana. Îndî kinya we akeethîrwa arî ûmwe wa anene bau mûgwanja nawe akeethîrwa eerekerete kwînyangua.

¹² “Ngoji irîa îkûmi wonere nî anene îkûmi barîa bengeerie kwîja kwaathana. Nabo bagetîkîîrua kwaathana îthaa rîmwe barî amwe na nyomoo îîu.

¹³Yerekeeria rîa anene bau îkûmi nî rîmwe: nî kûnenkera nyomoo îîu inya na waatho bwaao bwa kwaathana.

¹⁴Bonthe bakarwaa na Gatûrûme. Îndî Gatûrûme, barî amwe na athingati baawe eetîkua, barîa eetîte baa baawe, bakaboomba, nîûntû we nîwe Mwathani wa athani na mûnene wa anene bangî bonthe.”

¹⁵Ningî mûraîka ûu aracoka arambîîra, “Mûmaraya ûrîa wijîkeene mono, tayo ntûûra îrîa yaakîtwe akuî na mîuro ya ndûûjî nî kîrîndî na mîîrîga na nthiomi cia nthîgûrû.

¹⁶Ngoji irîa îkûmi wonere o na nyomoo îîu bakamena mûka ûu mûmaraya na bamûtuunye into bionthe birîa arî nabio na bamûrite nguû atigwe arî kîthûnû. Ningî bakarîa nyama cia mwîrî jwaawe na bamwakîîrie na mwanki.

¹⁷Nîkwîthîrwa Mûrungu nî ekîrîte ûntû bûu nkoroone ciaao nîkenda bagwatanîra na bathithia ûntû bûrîa wengwa akwenda; atî bo banenkere nyomoo inya yaao ya kwaathana mwanka rîrîa rûteto rwa Mûrungu rûkoojûra.

¹⁸Nawe mûka ûu wonere nîwe ntûûra înene îrîa yathaga anene ba nthîgûrû.”