Read KIMERU BIBLE PROTESTANT EDITION Kûg 18 Bible Online

Kûg 18 - KIMERU BIBLE PROTESTANT EDITION bible

Kûg 18

¹Nyuma ya ûu ndîroona mûraîka ûngî eenamîte aumîte bwa îgûrû. Kûthaara kwaawe nî kwamurîkaga nthîgûrû yonthe. Nawe nî aarî na inya înene ya kwaathana.

² Mûraîka ûu aratûmîîria na kajû gakanene akiugaga, “Îkwînyangua! Ntûûra ya Babiloni îrîa ijîkeene mono îkwînyangua! Îkwaa gîtûûro kîa Nkoma imbîî na roho inthûûku, nî îeete gîtûûro kîa nyoni irîa nthûûku, na irîa ireetaga moothûûku kîrî antû.

³ Tontû antû ba mîgongo yonthe nî banyuîte ndibei ya mairîrîîria jaawe ja ûthûngîîri, na anene ba nthîgûrû yonthe nî bathûngîîrîte nawe, nabo abiashara bonthe ba nthîgûrû nî batongetue nî ûmaramari bwaawe.”

⁴ Rîu ndîraigua kajû kangî kaumîte bwa îgûrû gakiugaga, “Umeeni kîrî we antû baakwa! Bûtîkeeje kûgwatanîra na meeyia jaawe, na bûtîkeeje gûkanûkua agîkanûkua!

⁵ Tontû meeyia jaawe nî jarûndanîrîtue jaa kîthûmba gîkînene gîaitia mwanka îgûrû, na Mûrungu nî aririkanîte ûmaramari bwaawe.

⁶ Mûthithîrieeni o ta ûrîa abûthithîrîe mûrîeeni mainda jaîrî ja mathithio jarîa athithanîrîtie. Munganîrieeni ndibei ta îrîa aeete antû, bûmunganîrie mainda jaîrî ta ûrîa aabaunganagîria.

⁷ Mûthimîre kîthimi kîa mîthangîko na kîrîro, biringeene na rwikumio rwaawe rwa ûmaramari. Tontû we aciîraga ûjû: ‘Ûûni ndiikarîrîte nthî ta mûka wa mûnene, ntî ntigwa na gûtî îgiita rîgakinya ndîra!’

⁸Tontû bûû ikanûkia bikamwîjîîra ntukû îmwe, Ejîîrwe nî mûrimo na kîrîro o na mpara, arungûrue nî mwanki, tontû Mwathani Mûrungu ûrîa ûkamûgambîthia arî na inya înene.”

⁹ Anene ba nthîgûrû, barîa baathûngagîîra nawe, na barîa baagwatanîre nawe mantûûne ja mairîrîîria ja mwîrî bakarîra na bakaye nîûntû bwaawe rîrîa bakoona toogi agîakîîrua.

¹⁰Bakarûngama gataaria nîûntû bwa gûkîra mîthangîko îrîa arî nayo na bauge ûjû: “Wûûi! Wûûî gwe Babiloni ntûûra îrîa îrî inya na ijîkeene mono! Îkanûkia rîaaku rîgûgûkinyîra îgiita rîa îthaa rîmwe.”

¹¹ Abiashara ba nthîgûrû bakarîra na baithikîîre nîûntû bwa ntûûra îîu. Tontû gûtî muntû kinya ûmwe ûgacoka kûgûra into kuuma kîrî bo kaîrî.

¹² Gûtî we ûkagûûra into bia thaabu na fetha na tuiiga twa goro na tuinto tûtûthongi twa kwigemia. Ningî gûtî we ûkagûra itambaa bia bamba bia rangi ya mûkû na hariri na itambaa bibitune. Batîgûra mbaaû cia mîthemba îrîa îeeraga bwega na into birîa bithithîtue na mîgwongo na mbaaû cia goro mono na îturutia na chuuma na maiga ja nkoronyangwe ja rangi mwanya mwanya.

¹³Batîgûra ndalasini na matî kana mîri îrîa yeeraga bwega ya gûîkîra irio mûchemo kana ubaani kana manemane kana ndibei kana maguta kana mûtu jûmwinyu bwega kana nkano. Batîgûra ng'ombe na ng'ondu na mbarathi na ngaarî cia ndwaa na nkombo na kinya antû.

¹⁴Abiashara bau bakamwîra, “Into birîa bieega ûtwîre wirîragîîria bigûkûmatûka, ûthongi bwaaku o na ûtonga bwaaku bûgûkûîrûkîra, naagwe ûtîkorocoka kûbiona kaîrî!”

¹⁵ Nabo abiashara barîa beendagia into ntûûreene îîu barîa baratwîre gwitongia na into biaayo, bakarûngama gataaria nîûntû bwa gûkîîra kûthangîkua kwaawe. Bakarîra na bakaye na kajû gakanene bakiugaga,

¹⁶“Wûûi, wûûi Kîrî ntûûra îrîa ijîkeene mono îrîa ta mûka, îrekagîra nguû inthongi mono cia rangi ya mûkû na intuune, ûrîa ûraigemetie na into bithithîtue na thaabu na tuiiga twa goro na thîgîra.

¹⁷ Ûtonga bûu bunthe bûkwînyangua îgîîta rîa îthaa rîmwe.” Nabo eetithia ba meri bonthe amwe na barîa baritaga ngûgî meeriine na barîa bakamati nî meri na barîa cionagîra into kuumania na biashara ya îria bararûngama gataaria, na

¹⁸ barakaya boona toogi ya gwakîîrua kwaayo bakiugaga, “Gûtî ntûûra îngî îraijîkeene ta îîjî”

¹⁹ Nabo baraigerera tîîri mîtwe yaao bakîrîraga na baithikîrîte bakiugaga, “Wûûi, wûûi ntûûra îrîa îraijîkeene mono! Nî ntûûra îratongetie bonthe barîa baraarî na meri irîa iraritaga ngûgî îrieene. Îkwînyangua îgiita rîa îthaa rîmwe rîonka!”

²⁰ Gwe îgûrû gwîrua nîûntû bwa kwînyangua kwaayo. Naabuî atheru na atûmwa o na iroria gwîrueni nîûntû Mûrungu aakûmîkanûkia nîûntû bweenu.

²¹ Rîu mûraîka ûrîa waarî na inya mono arajûkia iiga rîkari ta iiga rîrînene rîa kîthii na ararîgera îrieene akiugaga, “Ûu nîu ntûûra ya Babiloni îrîa ijîkeene mono îgakanyanua nthî na inya, nayo îtîcoka kwonwa kaîrî.

²² Nako kajû ka aringi ba ngita na aini ba ndwîmbo na aringi ba mîtûrirû na tarumbeta gatîcoka kwigîîgua ndeene yaaku kaîrî!

²³Weerû bwa taawa bûtîcoka kûthaara ndeene yaaku kaîrî Kajû ka mûjûkania na mûiki gatîcoka kwigîîgua ndeene yaaku kaîrî. Abiashara baaku batwîre barî antû barî îgweta nthîgûrûûne yonthe nakîo kîrîndî kîa nthîgûrû gîtwîre kwaua nî ûgaa bwaaku!

²⁴ Babiloni yaakanûkîrue nîûntû bwa kûûraga iroria na atheru amwe na antû bonthe barîa booragîtwe nthîgûrûûne.”