Read KIMERU BIBLE PROTESTANT EDITION Kûg 19 Bible Online

Kûg 19 - KIMERU BIBLE PROTESTANT EDITION bible

Kûg 19

¹Nyuma ya ûu ndîraigua kajû ta ga ntundu înene kûu îgûrû gakiugaga, “Mûrungu arokumua! Wonokio na ûkumio na inya nî bia Mûrungu weetû,

² nîkwîthîrwa matuîro jaawe ja îgamba nî ja mma na ja îota. Nî akanûkîtie mûka mûmaraya ûrîa ûtwîre kûthûkia antû na ûmaramari bwaawe. Mûrungu amûkanûkîtie nîûntû nî ooragîre nthûûmba ciaawe.”

³ Ningî kajû kau karagandûka na inya kaîrî karauga, “Mûrungu arokumua! Toogi ya mwanki jûrîa jûrarûngûrîrie ntûûra îrîa îraijîkeene mono îgatûûra gûtooga kenya na kenya.”

⁴Nabo akûrû barîa mîrongo îîrî na bana na biûmbe bina biria birî mwoyo birenamîîria nthî na birathaathayia Mûrungu ûrîa wakari nthî rûrigeene bakiugaga, “Amen! Mûrungu arokumua!”

⁵ Kuuma au rûrigeene rwa ûnene, kajû karaigîîgua gakiugaga, “Kumieni Mûrungu weetû buî nthûûmba ciaawe buî barîa bûmûkîraga, bûrî babanene na babanini.”

⁶ Rîu ndîraigua tûjû twakari ta twa ntundu înene na mûrurumo ta jwa ndûûjî inyingî na mûrurumo ta jwa ngorogoro înene, tûkiugaga, “Mûrungu arokumua! Nîkwîthîrwa Mweneinya Mwathani Mûrungu weetû nîwe ûkwaathana!

⁷Tûgwîrueni na tûkûngwîre; tûmwee ûkumio nîkwîthîrwa mûranû jwa Gatûrûme jûgûkinya, nawe mûiki waawe nî athirîtie kwithuranîra.

⁸We nî anenkeri nguû cia bamba irîa igûkenga eekîra.” Nguû iu nacio nî mathithio jameega ja atheru.

⁹ Nawe mûraîka arambîîra, “Aandîka mantû jaja: Kîtharimo nî kîrî antû barîa beeti kîathoone kîa mûranû jwa Gatûrûme.” Ningî arambîîra, “Iji nî nteto cia mma cia Mûrungu,”

¹⁰Rîu ndîrairinga nthî magûrûûne jaawe na ndîramûthaathayia. Îndî we arambîîra, “Ûtîbuîrîte kûnthaathayia! Nîkwîthîrwa kinya ûûni ndî nthûûmba taagwe na ta ataana na aarî ba abaagu, nabo nî bonthe barîa barikîtie ûûma bûrîa Jesû aaguûrîîre. Thaathayia Mûrungu! Tontû ûûma bûrîa Jesû aaguûrîre nîbu bwîkagîra iroria inya.”

¹¹ Rîu ndîroona îgûrû rîarugûka na ndîroona mbarathi înjerû! Ûrîa wamîtithîtie eetagwa Gwîtîkîka na Ûûma. Nawe agiitaga îgamba na îota na ageeta ndweene.

¹² Meetho jaawe jaakari ta rûmûrî rwa mwanki na mûtwe jaawe nî ekîrîte thirû inyingî. Ningî nî aandîki riîtwa rîrîa gûtî ûngî ûrîngîûmba kûmenya ûrîa rîkuuga tiga we wenka.

¹³Eekîrîte nguû yaatombeki tharikeene, nawe riîtwa rîaawe eetagwa “Rûteto rwa Mûrungu.”

¹⁴Nacio njûûrî cia îgûrû irîa ciekîrîte nguû cia bamba injerû cwee nî ciamûthingatîte ciîtithîtie mbarathi injerû.

¹⁵ Rûchiû rûrûûgî nî rwaumîrîte kanyueene kaawe. Rûchiû rûu nîru agatumîra kûthiria antû ba mîgongo na akabaatha atî na kîaao. Ningî agakinyangîra nzabibû gîkinyangîroone takîo marûrû ja mûthûûro jwa Mweneinya Mûrungu.

¹⁶Rwambambio na kîero kîaawe nî kwaandîki riîtwa rîrî, “Mûnene wa anene na Mwathani wa athani.”

¹⁷ Rîu ndîroona mûraîka arûngi îgûrû rîa riûa. Mûraîka ûu aragandûka na kajû gakanene na areera nyoni cia manganyoni atîrî, “Njûûni! Ûthûraneni amwe nîûntû bwa kîatho gîkînene kîa Mûrungu.

¹⁸Njûûni bûrîe nyama cia anene ba nthîgûrû na cia atongeeria ba asikarî na cia nchamba cia ndwaa. Ningî njûûni bûrîe nyama cia mbarathi na cia eetithia baacio na cia antû bonthe; barîa barî nkombo na barîa barî na ûciathi, na babanene na babanini!”

¹⁹Rîu ndîrona nyomoo na anene ba nthîgûrû barî na njûûrî ciaao boothûranîte nîkenda barwaa na ûu weetithîtie mbarathi arî amwe na njûûrî yaawe.

²⁰ Nyomoo o amwe na kîroria kîa ûrongo kîrîa kîaringaga biama mbere yaayo baragwatwa na baragerwa mwankiine jwa ûbiriti. Kîroria kîu kîa ûrongo nîkîo kîaringaga biama birîa kîaîîragia nabio barîa bonthe beekîri rwaano rwa nyomoo îîu na barîa bathaathagia mûng'uanano jwaayo.

²¹Njûûrî cia nyomoo îîu irathirua na rûchiû rûrîa rwaumîrîte kanyueene ka ûu weetithîtie mbarathi. Nyoni cionthe irarîa nyama cia mîîrî yaao mwanka iroondwa nîcio.