Read KIMERU BIBLE PROTESTANT EDITION Kûg 2 Bible Online

Kûg 2 - KIMERU BIBLE PROTESTANT EDITION bible

Kûg 2

¹“Aandîkîra mûraîka wa kanisa îrîa îrî Efeso ûjû: ‘Îîjî nîyo ntûmwa kuuma kîrî ûrîa ûgwete njota mûgwanja na njara yaawe ya ûrîo, ûrîa ûriûngariûngaga gatîgatî ka itugî mûgwanja bia kûrîkîîra taawa bithithîtue na thaabu.

²“‘Nî mbijî mantû jarîa ûthithagia; nî mbijî mînoga yaaku ngûgîîne irîa ûritaga na kûûmîîria gwaaku ûtîkûnoga. Nî mbijî ûrîa ûtî bata na antû babaî, na ningî nî ûthimîte mantû ja antû barîa baciîtaga atûmwa na tîbo na wamenya atî nî arongo.

³Nî mbijî ûrîa ûmîîrîtie ûkirîrîtîe na ûrîa ûthangîkîtue nîûntû bwa riîtwa rîaakwa na gûtî rîo waanoga.

⁴Îndî ndî na ûntû bûmwe bûrîa nkwona bûtîbuui kîrî gwe: nî ûtigîte gûmpenda ûrîa wampendeete mbere.

⁵Rîu ririkana ûrîa wakari mbere, wirire na ûcoke kûthithagia ûrîa wathithagia mbere. Warega kûthithia ûu, nkeeja kîrî gwe na njûkie gîtugî gîaaku gîa kûrîkîîra taawa kiume antû arîa gîkaraga, nonga wirire.

⁶Îndî ûntû bûmwe bwaaku bûbwega nî atî, nî ûthwîre ûrîa antû barîa betagwa Anikolai bathithagia, na kinya ni nou njathwîre.

⁷ Ûrîa ûrî na matû nî aigue ûrîa Roho akwîra kanisa! Ûrîa ûkombana nîwe ngetîkîîria arîe matuunda ja mûtî jwa ûtûûro jûrîa jûrî muundeene jwa Mûrungu.’”

⁸ “Aandîkîra mûraîka wa kanisa îrîa îrî Simurina ûjû: Îîjî nîyo ntûmwa kuuma kîrî ûrîa ûrî kiambîrîria na mûthia, ûrîa wakuîre na nandî atûûraga mwoyo.

⁹“Nî nkûmenya mîthangîko yaaku na nî mbijî ûrî nkîa îndî kuuga mma gwe ûrî gîtonga. Nî mbijî mantû jamathûûku jarîa jaaragua nî barîa baciîtaga Ayahudi bakîrwaa naagwe. Bau tî Ayahudi îndî nî gîkundi gîa Nkoma.

¹⁰Ûgákîra mîthangîko îrîa ûrî akuî kwona. Nkoma arî akuî gûtûma bamwe beenu bagerwa ncheera nîkenda bagerua. Naabuî bûkathagîîkua ntukû îkûmi. Kareni bûrî eetîkîkua mwanka gûkua naani nkabwaa thirû ya ûtûûro.

¹¹ Ûrîa ûrî na matû nî aigue ûrîa Roho akwîra kanisa. Ûrîa ûkoombana atîthûûkua nî gîkuû kîa biîrî.”

¹²“Aandîkîra mûraîka wa kanisa îrîa îrî Perigamo ûjû: Îîjî nî ntûmwa kuuma kîrî ûrîa ûrî na rûchiû rûnoori nteere cio-ijîîrî.

¹³“Nî mbijî arîa ûtûûraga: Au nîo Nkoma eekîte rûriga rwaawe rwa ûnene. Gwe nî ûgwete riîtwa rîaakwa warîrikia. Ûtaakanîre wîtîkio bwaaku kinya ntukû cia Antipa, mûkûûjî waakwa mwîtîkîkua, ûrîa woragîîrwe gatîgatîîne keenu gûntû kûu Nkoma athanaga.

¹⁴ Îndî ndî na mantû jamakai jarîa nkwona jatîbuui kîrî gwe. Kûrî antû bamwe bûtûûraga nabo barîa bathingataga ûritani bwa Balaamu. Balaamu nîwe waritanîre Baraki ûrîa akagitaria antû ba Israeli nîkenda barîa biakûrîa birîa biaritagîrwa mîrungu ya mîng'uanano na batonye mantûûne ja ûthûngîîri.

¹⁵Ningî bûrî na antû barîa bathingataga ûritani bwa Anikolai.

¹⁶Tontû bûû, irire. Warega kwirira nkeeja rua nau ûrî, ndwee na antû bau na rûchiû rûrîa rûrî kanyua gaakwa.

¹⁷ Ûrîa ûrî na matû nî aigue ûrîa Roho akwîra kanisa. Nawe ûrîa ûkoombana nîwe nkanenkera biakûrîa birîa biîtagwa manna birîa bitwîre biithi. Ningî mwee kaiga ka rangi înjerû kaandîki riîtwa rîaawe rîrîerû rîrîa rîtijîwe nî muntû ûngî tiga muntû ûrîa ûnenkeri rîo.”

¹⁸“Nawe mûraîka wa kanisa îrîa îrî Thiatira, mwandîkîre ûjû: Îîjî nîyo ntûmwa kûûma kîrî Mûtaana wa Mûrungu, ûrîa ûrî na meetho jakûthaara ta rûmûrî rwa mwanki, na ûrî na magûrû jakwenaenia ta îturutia rîthambîtue na mwanki.

¹⁹“Nî mbijî mantû jarîa ûthithagia. Nî mbijî ûrîa ûrî wendo na wîtîkio na nî nkûmenya ngûgî irîa ûritaga ûmîîrîtie ûtîkûnoga. Nî mbijî atî mantû jarîa ûthithagia nandî nî jameega nkûrûki ya jarîa wathithagia mbere.

²⁰ Îndî ndî na ûntû bûmwe bûrîa nkwona bûtîbuui kîrî gwe: gwe nî wîtîkagîîria mûka ûrîa wîtagwa Jezebeli, ûrîa ûciîtaga kîroria, aritana na aayia antû baakwa kûthûngîîra na kûrîa biakûrîa birîa biritîri mîrungu ya mîng'uanano birî igongwana.

²¹Nî ndaeere mûka ûu îgiita rîa kwirira îndî nî aregete kwirira meeyia jaawe ja ûthûngîîri.

²²Atîrî, ndîtûma aajue nî mûrimo jûrîa jûtîtûma auma gîtandeene na antû barîa bathûngagîîra nawe bagakara na mîthangîko îmînene, nonga bairire meeyia jarîa bathithagia na mûka ûu.

²³ Nkooraga athingati ba mûka ûu. Kanisa cionthe nacio ikamenya atî ûûni nî ni nthûûjaga mathûgaanio na nkoro cia antû na nkarîaa o muntû kûringana na mathithio jaawe.

²⁴Îndî kûrî bo beenu kaniseene ya Thiatira barîa batîthingataga ûritani bûu na ningî batairitana mantû jau bamwe beenu beetaga ‘mantû ja witho ja Nkoma.’ Buî ndîbwîra atî ntî bwaîkia mûrigo jûngî.

²⁵Îndî bunka bûrikie wîtîkio bweenu mwanka rîrîa nkeeja.

²⁶ Ûrîa ûkoombana na athithagie ûrîa mpendeete mwanka mûthia, nîwe nkaa inya ya kwatha mîgongo.

²⁷Nawe agatua kûmîathaga atî na kîaao na akamîthetheranga ûrîa nyongû cia yûmba ithetherangagwa ikaa ngîo. Waatho bûrîa nkamwaa nî ta bûrîa ûûni mpeei nî Baaba.

²⁸Ningî nkamûnenkera njota ya rûkîîrî.

²⁹Ûrîa ûrî na matû nî aigue ûrîa Roho akwîra kanisa.”