Read KIMERU BIBLE PROTESTANT EDITION Kûg 20 Bible Online

Kûg 20 - KIMERU BIBLE PROTESTANT EDITION bible

Kûg 20

¹Rîu ndîroona mûraîka eenamîte aumîte bwa îgûrû. Nawe nî aagwete mbungûro cia îrinya rîrîa rîorokeru mono na nyororo înene mono.

² Nawe aragwata nkûnga, tayo njoka îrîa ya karaaja îrîa nîyo Nkoma o na Shaitani na aramîtheeka îkara îtheeki îgiita rîa mîaka ngiri îmwe.

³Mûraîka aramîgera îrinyeene rîu na araiinga na aramîthingîra kûu buru nîkenda îtîgacoke kwayia antû ba mîgongo kaîrî, mwanka rîrîa mîaka ngiri îmwe îkathira. Nyuma ya îgiita rîu, îkathaûrwa kagiita gagakai.

⁴ Ningî ndîroona ndûriga cia ûnene na barîa baaeei waatho bwa kûgambithania bakarîrîte cio. Ndîroona mîoyo ya barîa booragîtwe nîûntû bwa gûkûûjîîra ûûma bûrîa Jesû aaguûrîre na gûtûmîîria rûteto rwa Mûrungu. Bo batathaathayia nyomoo îrîa kana mûng'uanano jwaayo. Ningî bateekîri rwaano rwa nyomoo îîu moothiûûne kana njareene ciaao. Antû bau baracoka kûgîta mwoyo kaîrî na baraathana barî amwe na Kristû îgiita rîa mîaka ngiri îmwe.

⁵Gûtî wa akuû bau bangî wariûkua mwanka mîaka ngiri îmwe îrathira. Kûu nîku kûriûka kwa mbere.

⁶Kûgwîrua na kîtharimo nî kîrî barîa bagatarwa barî bamwe ba barîa bakariûka îriûka rîa mbere. Bo batîkua gîkuû kîa biîrî nîûntû bakeethîrwa barî athînjîri-Mûrungu na Kristû na bakaathana barî amwe nawe mîaka ngiri îmwe.

⁷Mîaka ngiri îmwe yathira, Nkoma akathaûrwa aume ncheera.

⁸ Nawe akaumagara eete nthîgûrûûne kunthe akîaîîragia antû ba mîgongo, îrîa îtagwa Gogi na Magogi. Nkoma akoothûrania antû ba mîgongo îîu yonthe amwe barîa bakeethîrwa baingîi ta mûthanga jûrîa jûrî rûteere rwa îrîa, nîkenda abatongeeria ndweene.

⁹Nabo bareeta nthîgûrûûne yonthe na baracîgîîria kambî ya atheru ba Mûrungu îrîa eendeete mono. Îndî mwanki jûrauma bwa îgûrû na jûrabathiria.

¹⁰Nawe Nkoma ûrîa wabaîîrîtie aragerwa îrieene rîgwakana mwanki ja ûbiriti kûrîa nyomoo îrîa o na kîroria kîa ûrongo baagererwe. Nabo bakathangîkua mûthenya na ûtukû kenya na kenya.

¹¹ Rîu ndîroona rûriga rûrûnene na rûrwerû cwee na ûrîa warûkarîrîte. Nthîgûrû na îgûrû rîriirû biramatûka biamwona, nabio bitacoka kwoneewa kaîrî.

¹²Ningî ndîroona akuû, babanene na babanini barûngi mbere ya rûriga, na mauku jarakunûrwa. Yuku rîngî, taarîo yuuku rîa ûtûûro, rîrakunûrwa. Akuû bau baragambithua kûringana na mathithio jaao jarîa jaandîki maukuune jau.

¹³Îria rîrarekeeria akuû barîa baarî ku. Ningî gîkuû na kwa barîa bakuîte birarekeeria akuû barîa baarî ku. Bonthe baragambithua kûringana na jarîa baathithîtie.

¹⁴Rîu gîkuû na kwa barîa bakuîte biragerwa îrieene rîa mwanki. Îria rîu rîa mwanki nîrîo gîkuû kîa biîrî.

¹⁵Muntû kinya ûrîkû ûrîa riîtwa rîaawe rîtaandîki yukuune rîa ûtûûro, aragerwa îrieene rîa mwanki.