Read KIMERU BIBLE PROTESTANT EDITION Kûg 21 Bible Online

Kûg 21 - KIMERU BIBLE PROTESTANT EDITION bible

Kûg 21

¹ Rîu ndîroona îgûrû rîrîerû na nthîgûrû înjerû. Îgûrû rîrîa rîkûrû na nthîgûrû îrîa nkûrû nî biaarî bikûrima. Narîo îrîa nî rîaarî rîkûrima.

² Ndîroona ntûûra îrîa ntheru, tayo Jerusalemu îrîa njerû, îînamîte yumîte îgûrû kîrî Mûrungu. Nayo yaatungi na yathuranîrwa ta mûiki weteerete gûcemania na mûkûrû waawe.

³ Ningî ndîraigua kajû gakanene gakîaragia kuuma rûrigeene gakiugaga, “atîrî, nandî gîtûûro kîa Mûrungu kîrî amwe na antû. Mûrungu agaatûûrania amwe nabo baae antû baawe, nawe akaa Mûrungu waao.

⁴ Nawe akabaangûra methori jonthe. Gûtîthîrwa kûrî na gîkuû kana kîrîro kana kwithikîîra kaîrî. Ningî gûtîthîrwa kûrî na ûrûrû kaîrî tontû mantû jarîa makûrû jakeethîrwa jakûthira buru.”

⁵Ûu wakarîrîte rûriga rwa ûnene arauga, “Atîrî, ndîkweethia mantû jonthe jameerû.” Ningî arambîîra atîrî, “Aandîka mantû jaja, nîûntû nteto iji nî cia mma na nî cia gwîtîkîka.”

⁶ Aracoka arambîîra, “Bûkûûjûra! Nî ni Alfa na Omega, nî ni kîambîrîria na nî ni mûthia. Ûrîa ûrî na nyoonta nkamûkundia rûûjî kuuma kîthimeene kîa rûûjî rwa ûtûûro na ntîmûrîyia.

⁷ O ûrîa ûkoombana akaewa rûgai rûu. Ûûni nkeethîrwa ndî Mûrungu waawe, nawe eethîrwe arî mwana waakwa.

⁸Îndî antû barîa iguaa na aregi gwîtîkia na barîa baikinyangîte na mantû jamathûûku na ooragani na atheria na arogi na arombi mîrungu ya mîng'uanano na arongo bonthe, bakagerwa îrieene rîrîa rîakanaga mwanki jwa ûbiriti; na kîu nîkîo gîkuû kîa biîrî.”

⁹Rîu mûraîka ûmwe wa barîa mûgwanja barîa baarî na mpakûri irîa mûgwanja ciojûrîte ikanûkia mûgwanja bia mûthia arambîîra, “Njû nkwonie mûiki, tawe mwekûrû wa Gatûrûme.”

¹⁰ Nawe arankamata ndeene ya Roho mwanka kîrîmeene gîkîraaja mono. Rîu arambonia Jerusalemu, ntûûra îrîa ntheru, îînamîte yumîte îgûrû kwa Mûrungu.

¹¹Ntûûra îîu nî yaarî na ûkumio bwa Mûrungu. Yakengakengaga ta kaiga gakathongi ka goro karîa getagwa jasipa karîa gakembûki ta kîoo.

¹² Nthingo cia ntûûra îîu ciaarî inene na indaaja. Yaarî na mpingîro îkûmi na ijîîrî na o mpingîro nî yaakarîtue nî mûraîka ûmwe. Ningî o mpingîro nî yaandîki riîtwa rîa mwîrîga jûmwe jwa îrîa îkûmi na îîrî ya Israeli.

¹³O rûteere rûmwe rwa ntûûra îîu rwaarî na mpingîro ithatû: rûteere rwa bwa gaiti rwaarî na ithatû na rûteere rwa bwa ûrîo rwaarî na ithatû na rûteere rwa bwa ûmotho rwaarî na îthatû na rûteere rwa bwa rûgûrû rwaarî na ithatû.

¹⁴Rûthingo rwa ntûûra îîu rwaaki mûsingiine jwa maiga îkûmi na jaîrî na o iiga nî rîaandîki riîtwa rîa mûtûmwa o ûmwe wa barîa îkûmi na baîrî ba Gatûrûme.

¹⁵ Mûraîka ûu waaragia naani nî aarî na rûturo rwa thaabu rwa kûthima ntûûra îîu na mpingîro na nthingo ciaayo.

¹⁶Nteere cio inya cia ntûûra îîu ciang'aneene o ûmwe. Mûraîka ûu arathima ntûûra îîu na rûturo rwaawe: yaarî na ûraaja bwa kilomita ngiri ijîîrî na magana jana (2,400km), na waariî na gwitia bwa îgûrû bwa ntûûra îîu bwang'anene na ûraaja bwaayo.

¹⁷Mûraîka aracoka arathima ûmatu bwa rûthingo rwaayo, bwaarî bwa mita mîrongo mûgwanja na mûgwanja (77m) kûringana na kîthimi kîa wîthîre bwa antû kîrîa mûraîka ûu aathimaga nakîo.

¹⁸ Rûthingo rûu rwaakîtwe na jasipa, najo nî maiga ja goro jamatuune. Ntûûra îîu yongwa yaaki na thaabu întheru îrîa yaakembûki ta kîoo.

¹⁹Maiga ja mûsingi jwa nthingo cia ntûûra îîu jaagemetue na twiga twa goro twa mîthemba yonthe: iiga rîa mbere rîagemetue na tuiga tûtûtuune twîtagwa jasipa na rîa jaîrî rîagemetue na satire inthongi cia rangi ya wiirû bwa îgûrû, na rîa jathatû rîagemetue na îra rîrîa rîerû buru rîtagwa agate, na rîa jana rîagemetue na emeradi îrîa nthongi.

²⁰Iiga rîa jataano rîagemetue na tuiga twîtagwa saridoniki, na iiga rîa jatantatû rîagemetue na twiga twîtagwa akiki îrîa ntuune ta nondo, na iiga rîa mûgwanja rîagemetue na twiga twîtagwa kîrisolito na iiga rîa janaana rîagemetue na twiga twîtagwa berili, na iiga rîa kenda rîagemetue na twiga twîtagwa topazi, na iiga rîa îkûmi rîagemetue na twiga twîtagwa kirisoparaso, na iiga rîa îkûmi na rîmwe rîagemetue na twiga twîtagwa jasinto tûtûtuune ja macunkwa jamaguundu, na iiga rîa îkûmi na jaîrî rîagemetue na twiga tûrîa twîtagwa amethisto.

²¹Nacio mpingîro iu îkûmi na ijîîrî ciaarî cia maiga ja goro ja mîthemba îkûmi na îîrî, o mpingîro yaathithîtue na iiga rîa goro rîa mûthemba jûmwe. Njîra ya ntûûra îîu yaarî ya thaabu întheru, înkembûku ta kîoo.

²²Gûtî kîûrû ndoonere ntûûreene îîu, tontû kîûrû kîaayo nî Mwathani Mûrungu Mweneinya na Gatûrûme.

²³ Ntûûra îîu îtî na ûbatu bwa kûthaarîrwa nî riûa kana mweri tontû ûkumio bwa Mûrungu nîbu bûmîthaaragîra na Gatûrûme nîwe taawa yaayo.

²⁴ Antû ba mîgongo bagetaga bamûrîkîrîtwe nî weerû bûu, nabo anene ba nthîgûrû yonthe bagaikia mootonga jaao ku.

²⁵ Mpingîro ciaayo ikethagîrwa irugûri ntukû yonthe nîûntû gûtîkarotuka kaîrî.

²⁶Antû ba mîgongo bagaikia mwago na ûtonga ntûûreene îîu.

²⁷ Îndî gûtî gîntû kinya kîrîkû kîrî mûgiro gîkarokûrûka ku. Gûtî muntû kinya ûmwe ûrîa ûthithagia mantû ja nthao kana ja waîrania ûgatonya ku. Îndî nî barîa akî baandîki yukuune rîa ûtûûro rîa Gatûrûme bagakûrûka ku.