Read KIMERU BIBLE PROTESTANT EDITION Kûg 22 Bible Online

Kûg 22 - KIMERU BIBLE PROTESTANT EDITION bible

Kûg 22

¹ Rîu mûraîka arambonia mûuro jwa rûûjî rwa ûtûûro, rûrûkembûku ta kîoo, rûrîa rwaumaga rûrigeene rwa Mûrungu na rwa Gatûrûme.

² Mûuro jûu jwenamagîîra gatîgatî ka njîra ya ntûûra îîu. Nteere cio-ijîîrî cia mûuro jûu nî kwaarî na mûtî jwa ûtûûro jûrîa jûciaraga mîthemba ya matuunda îkûmi na îîrî o mweri. Mabûûra ja mûtî jûu jaarî ndawa ya kworia antû ba mîgongo.

³ Gûtî gîntû kinya kîmwe kîrîa kîrumi nî Mûrungu gîkoonwa ntûûreene îîu. Rûriga rwa Mûrungu na rwa Gatûrûme nîcio ikeethîrwa irî ntûûreene îîu, nacio nthûûmba ciaawe itue kûmûthaathagia.

⁴Nthûûmba îîu ciaawe ikoona ûthiû bwaawe na riîtwa rîaawe rîkaandîkwa moothiûûne jaao.

⁵ Gûtîkarotuka. Tontû bûû batîthîrwa barî na ûbatu bwa taawa kana bwa riûa nîûntû Mwathani Mûrungu nîwe ûkeethîrwa arî weerû bwaao na bakathanaga kenya na kenya.

⁶Rîu mûraîka arambîîra, “Nteto iji nî cia mma na nî cia gwîtîkîka. Nawe Mwathani Mûrungu, ûrîa weejaga iroria Roho waawe nîwe ûtûmîte mûraîka waawe nîkenda akoonia nthûûmba ciaawe mantû jarîa jagakarîka rua.”

⁷“Atîrî! Nî mbîjîte rua mono. Kîtharimo nî kîrî muntû ûrîa ûkathithia ûrîa ûroria bwa yuku rîrî bûkuuga!”

⁸Ni, Johana nî ni ndaigîrue na ndîroona mantû jaja. Rîrîa ndajaigîrue na ndîrajoona nî ndairingîre nthî akuî na magûrû ja mûraîka ûrîa wambonerie mantû jaja, naani ndaarî akuî kûmûthaathayia.

⁹Îndî we arambîîra, “Ûkánthaathayia! Ni ndî nthûûmba o taagwe na ta ataana na aarî ba abaagu barîa iroria na ta bangî bonthe barîa bathîkagîra nteto irîa irî yukuune rîrî. Thaathayia Mûrungu!”

¹⁰Ningî mûraîka ûu arambîîra atîrî, “Ûkáitha nteto cia ûroria bwa yuku rîrî tontû îgiita rîa mantû jaja kûûjûra rîrî akuî.

¹¹ Muntû ûrîa mûûî nî eete na mbere kûthithia ûûî, nawe ûrîa ûrî na rûko nî eete na mbere gûkara na rûko. Ningî ûrîa ûrî ûmwagîru nî eete na mbere kwagîra, na ûrîa ûrî ûmûtheru, nî eete na mbere kwaa ûmûtheru.”

¹² “Thikîîreni!” Jesû ariuga, “Nî mbîjîte o rua na îtuui rîaakwa nîkenda ndîaa o muntû kûringana na mathithio jaawe.

¹³ Nî ni Alfa na Omega, wa mbere na wa mûthia, nî ni kîambîrîria na nî ni mûthia.”

¹⁴ Kîtharimo nî kîrî antû barîa batheretie nguû ciaao nîkenda bakeethîrwa bagîrîte ba kûrîa matuunda ja mûtî jwa ûtûûro na nîkenda bagatonyeera mpingîroone cia ntûûra îîu.

¹⁵Kurû na arogi na atheria na ooragani na arombi ba mîrungu ya mîng'uanano na bonthe barîa bendeete kwaria ûrongo, bakeethîrwa barî oome ya ntûûra îîu.

¹⁶ “Nî ni Jesû ndatûma mûraîka waakwa kîrî buî antû ba kanisa nîkenda abûmenyithia mantû jaja. Ni ndî wa rûrîîjo rwa Daudi, njota ya rûkîîrî îrîa îthaaraga mono.”

¹⁷ Roho na Mûiki bariuga, “Njû!” O muntû wonthe ûrîa ûkaigua ûntû bûu kinya we nî auge, “Njû!” Muntû kinya ûrîkû ûrîa ûrî na nyoonta nî eeje; o ûrîa ûkwenda rûûjî rwa ûtûûro nî anyue na atîrîua.

¹⁸ Ni Johana nî nkûmenyithia muntû wonthe ûrîa ûkaigua nteto cia ûroria bwa yuku rîrî nkîmwîraga atîrî: Muntû ûreeja kwongeera kîrî jarîa jaandîki ku, Mûrungu akamwongeera ikanûkia birîa biarîrîîtue yukuune rîrî.

¹⁹Ningî muntû ûreeja gûtaûrataûra nteto cia yuku rîrî rîa ûroria bûbû, Mûrungu akamûtuunya rûgai rûrîa akeethîrwa arî naru kîrî mûtî jwa ûtûûro na rûrîa akeethîrwa arî naru ntûûreene îrîa ntheru, o ta ûrîa rwarîrîîtue yukuune rîrî.

²⁰Ûrîa ûkweejana ûkûûjî bwegiî mantû jaja ariuga, “Nî mma nî mbîjîte rua!” Amen. Njû Mwathani Jesû!

²¹Ûtugi bwa Mwathani weetû Jesû Kristû bûrokaraga naabuî bwinthe. Amen.