Read KIMERU BIBLE PROTESTANT EDITION Kûg 3 Bible Online

Kûg 3 - KIMERU BIBLE PROTESTANT EDITION bible

Kûg 3

¹“Andîkîra mûraîka wa kanisa îrîa îrî Saride ûjû:” “Îîjî nîyo ntûmwa kuuma kîrî ûrîa ûrî na waathi kîrî roho mûgwanja irîa ikaraga mbere ya Mûrungu na njota mûgwanja. “Nî mbijî ûrîa ûthithagia. Nî wijîkeene mono ûrî mwoyo îndî ûrî ûmûkuû.

²Ûkîîra! Wîkîre inya mantû jarîa jatigeere nîûntû kinya jo jarî akuî kûthirîkîra. Nîkwîthîrwa mantû jarîa ûthithagia jatîagîrîte mbere ya Mûrungu waakwa.

³ Rîu ririkana mantû jarîa waritanîrwe na jarîa waaigîrue. Jaathîkagîre na wirire. Waarega gûûkîîra, nkeeja ta mwamba na ûtîmenya rîrîa ngakwithûkîra.

⁴Îndî kûrî na antû babakai kaniseene ya Saride barîa bataaka nguû ciaao rûko. Bau nabo bakariûngania naani beekîrîte nguû înjerû cwee tontû bo nî bagîrîte.

⁵ Ûrîa ûkoombana nîwe ûgatua gwîkagîra nguû injerû, naani ntîangûra riîtwa rîaawe kuuma yukuune rîa ûtûûro. Nkaamumbûra kîrî Baaba na araîka baawe.

⁶Ûrîa ûrî na matû nî aigue ûrîa Roho akwîra kanisa.”

⁷ “Andîkîra mûraîka wa kanisa îrîa îrî Filadefia ûjû: Îîjî nîyo ntûmwa kuuma kîrî ûrîa mûtheru na wa mma. We arî na rûbungûro rwa Daudi. Nawe aarugûra mûrango gûtî we ûûmba kûjwiinga na ningî aainga gûtî we ûûmba kûjûrugûra.

⁸“Nî mbijî mantû jarîa ûthithagia, na rî, nî ndugûrîte mûrango nîûntû bwaaku na gûtî we ûûmba kûjwiinga. Nî mbijî inya yaaku nî înkai îndî nî wathîkîrîte rûteto rwaakwa na ûtakaana riîtwa rîaakwa.

⁹ Atîrî! Kûrî antû ba gîkundi kîrîa kîathagwa nî Nkoma. Nabo nî arongo barîa baciîtaga Ayahudi îndî tîbo. Ngatûma beeje baturie maru magûrûûne jaaku na bamenye atî nî nkwendeete.

¹⁰Nîkwîthîrwa nî wathîkîrîte rûteto rwaakwa rwa kûmîîria, ngakûmenyeera ûtîkoone mîthangîko îrîa yengeerie kwîjîîra nthîgûrû yonthe nîkenda îgeria antû barîa batûûraga ku.

¹¹Ntîthaa ntîreeja. Menyeera kîrîa ûrî nakîo na ûkáreka muntû kinya ûrîkû agûtuunya thirû yaaku ya ûkumio.

¹² Ûrîa wonthe ûkoombana nîwe nkaeethia gîtugî gîa kîûrû gîa Mûrungu waakwa, nawe atîkorouma ku. Ningî nkamwandîka riîtwa rîa Mûrungu waakwa na rîa ntûûra ya Mûrungu waakwa. Ntûûra îîu nayo nî Jerusalemu înjerû îrîa îkenama yumîte îgûrû kuuma kîrî Mûrungu waakwa. Ningî nkamwandîka riîtwa rîaakwa rîrîerû.

¹³Ûrîa ûrî na matû nî aigue ûrîa Roho akwîra kanisa.”

¹⁴ “Andîkîra mûraîka wa kanisa îrîa îrî Laodîkia ûjû: Îîjî nîyo ntûmwa kuuma kîrî ûrîa wîtagwa Amen, mûkûûjî ûrîa ûrî mwîtîkua na wa mma na ningî nîwe kîambîrîria kîa into bionthe birîa Mûrungu ombîre.

¹⁵“Nî mbijî mantû jarîa ûthithagia: gwe ûtî mpio kana mwanki. Nî kaaba ûrîngîthîrwa ûrî mpio kana mwanki.

¹⁶Îndî tontû bwa ûrîa gwe ûrî mûruutîra; ûtî mpio kana mwanki, ngagûtwîra nthî uume kanyueene gaakwa.

¹⁷Gwe uugaga, ‘Ûûni ndî gîtonga; ndî na into bibingî na gûtîkio mbatarîtue nîkîo.’ Îndî gwe ûtiijî ûrî muntû wa ûtheri ûrîa ûbuîri nî kwigîgîîrua kîaao. Ningî gwe ûrî nkîa na ûrî kîthûnû na ûrî mûtumuumu.

¹⁸Tontû bûû, ndîgûtaara ûgûre thaabu îrîa îtheretue mwankiine kuuma kîrî ni nîkenda ûtonga. Ningî gûra nguû injerû cwee wîkîre nîkenda ûthika kîthûnû gîaaku ûtige kûthawa. Ningî gûra maguta wake meetho jaaku nîkenda ûkoona.

¹⁹ Barîa mpendeete nîbo ngondokagîra na ngakanûkia. Tontû bûû, gîa wîru na wirire.

²⁰Atîrî, ûûni nî ndûngi mwariine nkîringaringaga. Muntû ûrîa ûkaigua kajû gaakwa na arugûre mwari, ngakûrûka kîrî we na ndîjanîre nawe, nawe arîjanîre naani.

²¹Ûrîa ûkoombana, nîwe ngeetîkîîria tûkaranîre nawe rûrigeene rwaakwa rwa ûnene o ta ûrîa naani ndoombanîre ndîrakaranîra amwe na Baaba rûrigeene rwaawe rwa ûnene.

²²Ûrîa ûrî na matû nî aigue ûrîa Roho akwîra kanisa.”