Read KIMERU BIBLE PROTESTANT EDITION Kûg 6 Bible Online

Kûg 6 - KIMERU BIBLE PROTESTANT EDITION bible

Kûg 6

¹Rîu ndîroona Gatûrûme gakîthingûra mûûri jûmwe jwa îrîa mûgwanja na ndîraigua kîûmbe kîmwe kîa biûmbe biu bina birî mwoyo gîkiugaga na mûgambo ta jwa ngorogoro, “Njû!”

² Naani nkîraithîîria ndîroona mbarathi ya rangi înjerû. Ûrîa wamîîtithîtie nî aagwete ûta, nawe aranenkerwa thirû. Rîu araumagara amîîtithîtie akîûmbanaga ndweene nîkenda akoombaga anthû baawe.

³Rîu Gatûrûme karathingûra mûûri jwa îîrî na ndîraigua kîûmbe kîa biîrî kîrîa kîrî mwoyo kîauga, “Njû!”

⁴ Rîu mbarathi ingî îraumîra, nayo yaarî întuune tunî. Ûrîa wamîîtithîtie araewa inya ya kûreeta ndwaa nthîgûrûûne nîkenda antû bakooragana. Ningî aranenkerwa rûchiû rûrûnene.

⁵ Rîu Gatûrûme karathingûra mûûri jwa îthatû. Naani ndîraigua kîûmbe kîa bithatû kîrîa kîrî mwoyo gîkiuga, “Njû!” Nkîraithîîria ndîroona mbarathi înjirû yaumîra. Ûrîa wamîîtithîtie nî aagwete ratiri njareene yaawe.

⁶Rîu nîrîo ndaaigîrue kajû kuuma au biûmbe bina birî mwoyo biaarî gakiugaga, “Mûchaara jwa ntukû jûkeethîrwa jûrî kilo îmwe ya nkano kana jwîthîrwe jûrî kilo ithatû cia mûnyaki. Îndî bûkeenyangieni maguta kana ndibei!”

⁷Rîu Gatûrûme karathingûra mûûri jwa îna na ndîraigua kajû ga kîûmbe kîa bina kîrîa kîrî mwoyo gakiuga, “Njû!”

⁸ Ndîkûraithîîria ndîroona mbarathi ya rangi ya mûju yaumîra. Ûrîa wamîîtithîtie eetagwa Gîkuû, na Gûntû kwa barîa bakuîte nî kwamûthingatîte. Nabo baraewa waatho bwa kwatha gachunchî kamwe kîrî tûna ka nthîgûrû na bathirie antû bagîtumagîra ndwaa na mpara înene na mîrimo na nyomoo.

⁹Rîu Gatûrûme karathingûra mûûri jwa îtaano. Ndîraraithîîria au rungu rwa kîritîro kîa igongwana na ndîroona mîoyo ya barîa booragîtwe nîûntû bwa gûtûmîîria rûteto rwa Mûrungu na nîûntû bwa ûkûûjî bûrîa baumbûrîte.

¹⁰Antû bau barakaya bakiugaga, “Îgwe Mwathani ûrîa mûnene mono, gwe ûrî ûmûtheru na wa mma! Ûgakara îgiita rîng'ana ûtîgambithîtie na gûkanûkia antû barîa barî nthîgûrûûne tontû bwa gûtûûraga?”

¹¹Rîu o ûmwe waao araeewa rwambambio rûrwerû cwee. Bareerwa nî beteere kagiita kangî gagakai mwanka rîrîa namba îrîa îkwendekana ya ataana na aarî ba îthe barîa bakooragwa ta ûrîa bo booragîrwe îkang'ana.

¹² Rîrîa Gatûrûme kaathingûrîre mûûri jwa îtantatû kûrakara atîrî, Nthîgûrû îrainaina mono. Riûa rîrairûwa ta nguû înjirû. Ningî mweri jûraa jûmûtuune ta tharike.

¹³ Nacio njota cia îgûrû iratua kwarûka nthî ta ûrîa nkûû ciarûkaga rîrîa kûrî na ruuo rûrûnene.

¹⁴ Îgûrû rîrakûnjwa rîrarima ta ûrîa yuku rîkûnjagwa. Irîma bionthe na icîgîîrio bia îria birebua birauma arîa biaarî.

¹⁵ Rîu anene ba nthîgûrû na antû barîa barî îgweta na atongeeria barîa anene ba njûûrî na itonga na barîa barî inya o na antû bonthe na nkombo o na barîa barî na ûciathi, bonthe baraiciitha ikurunguune na maigeene jarîa jaarî irîmeene.

¹⁶ Baratua kwîra irîma na maiga jau jamanene, “Tûgwîreni itû, bûtwiithe tuume ûthiûûne bwa ûu ûkarîrîte rûriga rwa ûnene na tûtîgakinyîrwe nî mûthûûro jwa Gatûrûme.

¹⁷ Nîkwîthîrwa ntukû înene ya mûthûûro jwaao îgûkinya, nûû ûûmba kûmîûmîîria?”