Read KIMERU BIBLE PROTESTANT EDITION Kûg 7 Bible Online

Kûg 7 - KIMERU BIBLE PROTESTANT EDITION bible

Kûg 7

¹ Nyuma ya ûu ndîroona araîka bana barûngi koneene cio inya cia nthîgûrû. Nabo nî baaingîrîte ndûûo cio inya nîkenda îtiurutana îgûrû rîa nthî înjûmo kana îgûrû rîa îria kana ciuruta mûtî kinya jûmwe.

²Ningî ndîracoka ndîroona mûraîka ûngî aitîtie bwa îgûrû aumîîrîte kûrîa riûa riumagîîra agwete mûûri jwa Mûrungu ûrîa ûtwîre mwoyo. Mûraîka ûu areeta araîka barîa bana na kajû gakanene. Araîka bau nî barîa baaeei inya ya kwînyangia nthîgûrû înjûmo o na îria.

³ Mûraîka ûu arabeera, “Bûkenyangieni nthî înjûmo kana îria kana mîtî mwanka rîrîa tûkathiria gwîkîra nthûûmba cia Mûrungu weetû rwano moothiû jaao.”

⁴Ningî ndîraigua atî ntari ya antû ba kuuma mîîrîgeene yonthe ya Israeli barîa beekîrîtwe rwano yaarî ngiri îgana rîmwe rîa mîrongo îna na inya.

⁵Baba nîbo beekîrwe rwano: Ngiri îkûmi na ijîîrî kuuma mwîrîga jwa Juda, ngiri îkûmi na ijîîrî kuuma mwîrîga jwa Rubeni, ngiri îkûmi na ijîîrî kuuma mwîrîga jwa Gadi,

⁶ngiri îkûmi na ijîîrî kuuma mwîrîga jwa Asheri, ngiri îkûmi na ijîîrî kuuma mwîrîga jwa Nafutali, ngiri îkûmi na ijîîrî kuuma mwîrîga jwa Manase,

⁷ngiri îkûmi na ijîîrî kuuma mwîrîga jwa Simioni, ngiri îkûmi na ijîîrî kuuma mwîrîga jwa Lawi, ngiri îkûmi na ijîîrî kuuma mwîrîga jwa Isakari,

⁸ngiri îkûmi na ijîîrî kuuma mwîrîga jwa Zebuloni, ngiri îkûmi na ijîîri kuuma mwîrîga jwa Josefu, ngiri îkûmi na ijîîrî kuuma mwîrîga jwa Benjamini.

⁹Nyuma ya ûntû bûu ndîraraithîîria ndîroona ntundu înene mono îrîa îtîngîûmba gûtarwa nî muntû kinya ûrîkû! Ntundu îîu yaarî ya antû ba kuuma mîgongo na mîîrîga yonthe na kîrîndî na nthiomi cionthe cia nthîgûrû. Bonthe baarûngi mbere ya rûriga na mbere ya Gatûrûme beekîrîte ndwambambio injerû cwee na bagwete mpang'i cia mîkîndû njareene ciaao.

¹⁰Nabo nî baatûmagîîria na kajû gakanene bakiugaga, “Wonokio buumaga kîrî Mûrungu weetû ûrîa ûkari nthî rûrigeene rwa ûnene na kuuma kîrî Gatûrûme!”

¹¹Rîu araîka bonthe bararûngama bathiûrûkîrîte rûriga na akûrû bau mîrongo îîrî na bana o na biûmbe bina birîa birî mwoyo. Araîka bau baraturia maru na barenamîîria moothiû jaao nthî au mbere ya rûriga na barathaathayia Mûrungu bakiugaga,

¹²“Amen! Kîtharimo na ûkumio na uume, na nkaatho na gîtîîo na inya na ûûmbani nî bia Mûrungu weetû kenya na kenya Amen!”

¹³Ûmwe wa akûrû bau arambûûria, “A antû baba beekîrîte ndwambambio injerû cwee nî ba na nîkû baumîte?”

¹⁴ Ndîramûcokeria ndîramwîra, “Mûkaathe, gwe nîgwe wiijî kûrîa baumîte.” Nawe arambîîra, “Bau nî barîa baumîte mîthangîkoone îmiingî. Nabo nî barîa bathambîtie nguû ciaao na tharike ya Gatûrûme cierûa cwee.

¹⁵Kîu nîkîo gîtûmi kîa beethîrwa barûngi mbere ya rûriga rwa Mûrungu, nabo bathaathagia Mûrungu kîûrûûne kîaawe mûthenya na ûtukû, ûu ûkarîrîte rûriga agakaraga arî amwe nabo abakarîtie.

¹⁶ Batîkarocoka kwigua mpara kana baigua nyoonta kaîrî; riûa o na mwanki bitîbaîthia kaîrî.

¹⁷ Tontû Gatûrûme kau kaarî au rûrigeene, nîko gonka gakaa mûrîîthi waao, nako gagatua kûbatongagîîria mwanka ithimeene birîa birî na rûûjî rûrîa rûrî mwoyo. Nawe Mûrungu akabaangûra methori jonthe jathire meethoone jaao.”