Read KIMERU BIBLE PROTESTANT EDITION Kûg 8 Bible Online

Kûg 8 - KIMERU BIBLE PROTESTANT EDITION bible

Kûg 8

¹Rîrîa Gatûrûme kaathingûrîre mûûri jwa mûgwanja, kûrakira ki îgûrû nusu îthaa.

²Rîu ndîroona araîka mûgwanja barîa barûngamaga mbere ya Mûrungu. Nabo araîka bau baranenkerwa tarumbeta mûgwanja.

³ Mûraîka ûngî areeja na ararûngama arîa kîritîro kîa igongwana kîaarî agwete karaî kaathithîtue na thaabu ga gwakîîria ubaani. Mûraîka ûu aranenkerwa ubaani înyingî mono nîkenda akamîringanîra na maromba ja atheru bonthe na arabiakîîria au kîritîroone kîa igongwana kîa thaabu kîrîa kîaarî mbere ya rûriga.

⁴Toogi ya ubaani îîu amwe na maromba ja atheru biraitia bwa îgûrû kuuma njareene ya mûraîka ûu warûngi au mbere ya Mûrungu.

⁵ Rîu mûraîka ûu arajûkia karaî ga gwakîîria ubaani na arakoojûria mwanki kuuma kîritîroone kîa igongwana na aracoka arajûgera nthîgûrû. Rîu kûragîta mûrurumo jûmûnene jwa ngorogoro na tûjû na ndweeni o na kwinaina kwa nthîgûrû.

⁶Rîu araîka bau mûgwanja barîa baarî na tarumbeta mûgwanja baraithuranîra kûringa tarumbeta iu.

⁷ Mûraîka wa mbere araringa tarumbeta yaawe. Kûraura ngai ya nchûgû na mwanki yungene na tharike kuuma îgûrû. Gîchunchî kîmwe kîrî bithatû bia nthîgûrû kîrarûngûra buru. Ningî gîchunchî kîmwe kîrî bithatû kîa mîtî yonthe o na nyaki îrîa mbîthî kîrarûngûra buru.

⁸Mûraîka wa baîrî nawe araringa tarumbeta yaawe. Gîntû gîakari ta kîrîma gîkînene gîgwakana mwanki, kîragerwa îrieene.

⁹Gîchunchî kîmwe kîrî bithatû kîa îria kîraa tharike na gîchunchî kîmwe kîrî bithatû kîa biûmbe birîa bitûûraga îrieene birakua. Ningî gîchunchî kîmwe kîrî bithatû kîa meri ireenyangua.

¹⁰ Rîu mûraîka wa bathatû araringa tarumbeta yaawe. Njota înene îraarûka yumîte bwa îgûrû îgîakanaga ta kînyinga. Nayo îraarûkîra gîchunchî kîmwe kîrî bithatû kîa mîuro o na ithima bia ndûûjî.

¹¹ Njota îîu iitagwa Ng'ana. Gîchunchî kîmwe kîrî bithatû kîa ndûûjî cia nthîgûrû kîraa ng'ana. Nabo antû babaingî barakua nîûntû bwa kûnyua rûûjî rûrîa rwaarî na ng'ana.

¹² Rîu mûraîka wa bana araringa tarumbeta. Gîchunchî kîmwe kîrî bithatû kîa riûa kîraringwa, o na gîchunchî kîmwe kîrî bithatû kîa mweri o na kîa njota biraringwa. Tontû bûû, gîchunchî kîmwe kîrî bithatû kîa weerû bwaabio bûraa muundu. Tontû bûû gîchunchî kîmwe kîrî bithatû kîa mûthenya gîtarî na weerû, na kinya gîchunchî kîmwe kîrî bithatû kîa ûtukû.

¹³Rîu ndîroona nderi îbuurûkîte kûu manganyoni îgîtûmagîîria na kajû gakanene îkiugaga, “Wûûi, wûûi, wûûi kîrî barîa bakeethîrwa barî nthîgûrû rîrîa tarumbeta iu itigeere ikaringwa irîa araîka bau bangî bathatû beengerie kûringa!”